December 3, 2014

މިނިވަން ނިއުސްގެ ނޫސްވެރިޔާ އަހުމަދު ރިލްވާން ގެއްލުނު މައްސަލާގައި ބަންދުގައި ހުރި ހަމައެކަނި މީހާ ދޫކޮށްލައިފި އެވެ.

ފުލުހުންގެ މީޑިއާ އޮފިޝަލަކު މިއަދު ވިދާޅުވި ގޮތުގައި ގޭބަންދުގައި ހުރި 25 އަހަރުގެ އެ މީހާ ދޫކޮށްލާފައިވަނީ އޭނާގެ ބަންދުގެ މުއްދަތު އިތުރުކުރުމަށް މިދިޔަ ހޯމަދުވަހު ކްރިމިނަލް ކޯޓަށް ގެންދިއުމުން އެ ކޯޓުންނެވެ.

ރިލްވާން ގެއްލުނު މައްސަލާގައި ފުލުހުން ހަތަރު މީހަކު ހައްޔަރުކުރި އެވެ. އެހެން ނަމަވެސް، ގޭބަންދުގައި ހުރި މީހާ ދޫކޮށްލުމާ އެކު، މިހާރު މި މައްސަލާގައި އެއްވެސް މީހަކު ބަންދަކު ނެތެވެ.

ރިލްވާން އެންމެ ފަހުން ފެނިފައިވަނީ މި އަހަރުގެ އޯގަސްޓް 8 ވަނަ ދުވަހުގެ ރޭ ހުޅުމާލޭ ފެރީ ޓާމިނަލުންނެވެ.

މިނިވަން ނޫހުގައި ލިޔާ ލިޔުންތަކާއި ސޯޝަލް މީޑިއާގައި ފާޅުކުރާ ހިޔާލުތަކާ ގުޅިގެން ތަކުރާރުކޮށް މަރުގެ އިންޒާރުދީފައި ވަނިކޮށް، ރިލްވާން ގެއްލުމާއި ގޭންގްތަކާ ގުޅުން އޮތް ކަމަށް ތަހުގީގަށް ފާހަގަކުރެވޭ ކަމަށް ހޯމް މިނިސްޓަރު އުމަރު ނަސީރު ވަނީ ވިދާޅުވެފަ އެވެ.

އޭނާ ހޯދަން ކުރާ ތަހުގީގުގައި ފުލުހުންގެ އިހުމާލު އޮތް ކަމަށް ބުނެ އާއިލާ އިން ވަނީ އެ މައްސަލަ ޕޮލިސް އިންޓެގްރިޓީ ކޮމިޝަނަށް ހުށަހަޅާފަ އެވެ.