September 4, 2014

މިނިވަން ނޫހުގެ ނޫސްވެރިޔާ އަހްމަދު ރިލްވާންގެ މައްސަލާގައި އާންމުން ތައްޔާރުކުރި ޕެޓިޝަނެއް އޭނާގެ އާއިލާގެ ފަރާތުން ރައްޔިތުންގެ މަޖިލީހުގެ ގައުމީ ސަލާމަތުގެ ކޮމިޓީއަށް ހުށަހަޅައިފި އެެވެ.

މި ޕެޓިޝަން ގައުމީ ސަލާމަތުގެ ކޮމިޓީއަށް ފޮނުވުމަށްޓަކައި ރިލްވާންގެ އާއިލާގެ ފަރާތުން މަޖިލީހުގެ އިދާރާގެ ރިސެޕްޝަނާ މި ޕެޓިޝަން ހަވާލުކުރީ މަޖިލީހުގައި ހިމެނޭ އެމްޑީޕީގެ މާފަންނު އުތުރު ދާއިރާގެ މެންބަރު އިމްތިޔާޒް ފަހްމީގެ ހާޒިރުގައި މިއަދު ހެނދުނު 9:15 އެހާއިރު އެވެ.

ޕެޓިޝަން ތައްޔާރުކުރުމުގައި އުޅުނު ފަރާތްތަކުން ބުނީ 5،000 އަށް ވުރެ ގިނަ މީހުން މި ޕެޓިޝަނުގައި ސޮއިކޮށްފައިވާ ކަމަށާއި އޭގެ ތެރޭގައި ދައުލަތުގެ ތަފާތު އިސް މަގާމު ތަކުގައި ތިއްބެވި ބޭފުޅުން ވެސް ހިމެނޭ ކަމަށެވެ.

މައިގަނޑު ނުވަ ކަމެއް ހިމަނައިގެން ތައްޔާރުކޮށްފައިވާ މި ޕެޓިޝަންގައި ރިލްވާން ހޯދުމުގައި ގާނޫނީ ގޮތުން ލިބެންޖެހޭ ހައްގުތަކާއި އެއްބާރުލުން އޭނާގެ އާއިލާއަށް ލިބިފައި ނުވާ ކަމަށް ބުނެފައިވެ އެވެ.

ރިލްވާންގެ މައްސަލަ އެމްޑީޕީން ވަނީ މަޖިލީހުގެ ހަތަރު ކޮމިޓީއަކަށް ވެސް ހުށަހަޅާފަ އެވެ. އޭގެ ތެރޭގައި ހިމެނެނީ ގައުމީ ސަލާމަތުގެ ކޮމިޓީއާއި 241 ކޮމިޓީއާއި ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއާއި މިނިވަން މުއައްސަސާތަކުގެ ކޮމިޓީ އެވެ. މިއީ އެއް މައްސަލައެއް މަޖިލީހުގެ ހަތަރު ކޮމިޓީއަކަށް ހުށަހެޅުނު ފުރަތަމަ ފަހަރެވެ.

ރިލްވާން ގެއްލުނީ މިދިޔަ މަހުގެ ހަތްވަނަ ދުވަހުގެ ރެ އެވެ. އޭގެ ފަހުން އޭނާގެ އެއްވެސް މައުލޫމާތެއް ލިބިފައި ނުވާ ކަމަށް ރިލްވާންގެ އާއިލާ އިން ބުނެ އެވެ.