August 25, 2014

މިނިވަން ނިއުސްގެ ނޫސްވެރިޔާ އަހުމަދު ރިލްވާން އަބްދުﷲ ގެއްލުނު މައްސަލާގައި އިންސާފު ލިބެންދެން އިހްތިޖާޖް ކޮށް، ހައްޔަރުވާން ތައްޔާރަށް ހުންނެވި ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެ އެވެ.

އެ މަނިކުފާނު ކުރެއްވި ޓްވީޓެއްގައި ވިދާޅުވެފައިވަނީ، ރިލްވާން ހޯދަން އަޑުއުފުލުމަށް މަގުމައްޗަށް ނުކުންނަން ތައްޔާރަށް ހުންނެވި ކަމަށާއި ރިލްވާން “ވަގަށް ނެގި” ބަޔަކު އިންސާފުގެ ކުރިމައްޗަށް ގެންނަން ދެން އިހްތިޖާޖް ކޮށް، ފުލުހުންގެ ހައްޔަރަށް ވަޑައިގެންނެވުމަށް ވެސް ތައްޔާރަށް ހުންނެވި ކަމަށެވެ.

މިމަހުގެ ހަތްވަނަ ދުވަހުން ފެށިގެން ރިލްވާންގެ އެއްވެސް ހަބަރެއް ނުވާ ކަމަށް އޭނާގެ އާއިލާއިން ބުނި ނަމަވެސް ފުލުހުން ބުނީ މިމައްސަލަ ފުލުހުންނަށް ރިޕޯޓް ކޮށްފައިވަނީ މިމަހުގެ 13 ވަނަ ދުވަހު މެންދުރު 1:15 އެހާއިރު ކަމަށެވެ.

ހުޅުމާލޭގައި ދިރިއުޅޭ ރިލްވާން މި މަހުގެ ހަތް ވަނަ ދުވަހުގެ ރޭ ދަންވަރު 12:45 އެހާއިރު، ހުޅުމާލޭ ފެރީ ޓާމިނަލުން ޓިކެޓު ގަނެގެން ފެރީއަށް އެރުމަށް ދާ މަންޒަރު މާލޭގައި ހަދާފައި ހުންނަ ހުޅުމާލެ ފެރީ ޓާމިނަލްގެ ސީސީޓީވީ މަންޒަރުތަކުން ވަނީ ފެނިފަ އެވެ. ނަމަވެސް އޭނާ އެރޭ ފެރީއަށް އެރި ކަމާއި އަދި އޭނާ ހުޅުމާލެއަށް ދިޔަކަން ޔަގީން ނުވާ ކަމަށް ފުލުހުން ބުނެ އެވެ. ރިލްވާން ފެނޭތޯ ރާއްޖޭގެ ހުރިހާ ރަށެއް ވެސް މިހާރު ބަލާފައިވާ ކަމަަށް ފުލުހުން ބުނެ އެވެ.