November 16, 2014

މިނިވަން ނިއުސްގެ ނޫސްވެރިޔާ އަހުމަދު ރިލްވާން ގެއްލުނު މައްސަލާގައި ފުލުހުން ހައްޔަރުކޮށްފައި ހުރި 25 އަހަރުގެ މީހާ އިއްޔެ ގޭބަންދަށް ބަދަލުކޮށްފި އެވެ.
އޭނާ ގޭ ބަންދަށް ބަދަލުކޮށްފައި މިވަނީ، ފަސް ފަހަރަށް ބަންދުގެ މުއްދަތު އިތުރުކޮށްފަ އެވެ.

ފުލުހުންގެ މީޑިއާ އޮފިޝަލް މިއަދު ވިދާޅުވީ ރިލްވާން ގެއްލުނު މައްސަލާގައި ފުލުހުންގެ ބެލުމުގެ ދަށުގައި ހުރި މީހާ ގޭބަންދަށް ކޯޓުން ބަދަލުކުރީ ހަތް ދުވަހަށް ކަމަށެވެ. އޭގެ ފަހުން ބަންދުގެ މުއްދަތު ޖެހުމަށް އަލުން ކޯޓަށް ހާޒިރުކުރާނެ ކަމަށް ވެސް އޮފިޝަލް ވިދާޅުވި އެވެ.

މިނިވަން ނޫހުގައި ލިޔާ ލިޔުންތަކާއި ސޯޝަލް މީޑިއާގައި ފާޅުކުރާ ހިޔާލުތަކާ ގުޅިގެން ތަކުރާރުކޮށް މަރުގެ އިންޒާރުދީފައި ވަނިކޮށް، ރިލްވާން ގެއްލުމާއި ގޭންގްތަކާ ގުޅުން އޮތް ކަމަށް ތަހުގީގަށް ފާހަގަކުރެވޭ ކަމަށް ހޯމް މިނިސްޓަރު އުމަރު ނަސީރު ވަނީ ވިދާޅުވެފަ އެވެ.

އޭނާ ހޯދަން ކުރާ ތަހުގީގުގައި ފުލުހުންގެ އިހުމާލު އޮތް ކަމަށް ބުނެ އާއިލާ އިން ވަނީ އެ މައްސަލަ ޕޮލިސް އިންޓެގްރިޓީ ކޮމިޝަނަށް ހުށަހަޅައިފަ އެވެ.

ރިލްވާން އެންމެ ފަހުން ފެނިފައި ވަނީ އޯގަސްޓް 8 ވަނަ ދުވަހުގެ ރޭ ހުޅުމާލޭ ފެރީ ޓާމިނަލުންނެވެ.