October 5, 2014

މިިނިވަން ނިއުސްގެ ނޫސްވެރިޔާ އަހުމަދު ރިލްވާން ގެއްލުނު މައްސަލާގައި ހައްޔަރުކުރި ހަތަރު މީހުންގެ ތެރެއިން އެކަކު ދޫކޮށްލައި އިތުރު މީހަކު ކްރިމިނަލް ކޯޓުން ގޭ ބަންދަށް ބަދަލުކޮށްފި އެވެ.

މީގެ ދެ މަހެއްހާ ދުވަސްކުރިން ގެއްލިފައިވާ ރިލްވާންގެ މައްސަލައިގައި ފުރަތަމަ ބަޔަކު ހައްޔަރުކުރީ މިދިޔަ މަހުގެ ފަހުކޮޅު އެވެ. މިދިޔަ މަހުގެ 28 ވަނަ ދުވަހު އެ މައްސަލައިގައި ތިން މީހަކު ހައްޔަރު ކުރިއިރު ޖެހިގެން އައި ދުވަހު ވަނީ އިތުރު މީހަކު ހައްޔަރުކޮށްފަ އެވެ.

އެ އެންމެން ވެސް ފުލުހުންގެ ބަންދުގައި ބައިތިއްބަން ކޯޓުން ފުރަތަމަ އަމުރުކުރި ނަމަވެސް އޭރު ކޯޓުން ދިން މުއްދަތު ހަމަވާތީ ކޯޓަށް ގެންދިއުމުން އެކަކު ދޫކޮށްލާފައިވާއިރު އަނެއް މީހާ ފަސް ދުވަހަށް ގޭ ބަންދުގައި ބަހައްޓަން ކޯޓުން އަމުރުކޮށްފައިވާ ކަމަށް ފުލުހުން ބުންޏެވެ.

ބާކީ ތިބި ދެ މީހުންގެ ތެރެއިން އެކަކު ހަތް ދުވަހަށް ފުލުހުންގެ ބަންދުގައި ބަހައްޓަން އަމުރު ކުރިއިރު އަނެއް މީހާ 10 ދުވަހަށް ފުލުހުންގެ ބަންދުގައި ބަހައްޓަން ކޯޓުން އަމުރުކޮށްފައިވާ ކަމަށް ފުލުހުން ބުންޏެވެ.

ރިލްވާން ގެއްލުނު މައްސަލައިގެ ތަހުގީގު ފުލުހުން ކުރިއަށް ގެންދާއިރު ރިލްވާން އެންމެ ފަހުން ފެނިފައިވަނީ މިދިޔަ އޮގަސްޓް މަހުގެ ހަތް ވަނަ ދުވަހުގެ ރޭ ދަންވަރު ހުޅުމާލެ ދިއުމަށް ފެރީޓާމިނަލް ތެރޭގައި ހަރަކާތްތެރި ވަނިކޮށެވެ. އޭގެފަހުން ރިލްވާނަށް ވީނުވީއެއް ނޭނގި ގެއްލިފައިވާއިރު އޭނާ ހޯދުމަށް ފުލުހުން ވަނީ ވީޑިއޯ ފުޓޭޖްތައް ބަލައި، ފޯން ކޯލްތައް އެނަލައިޒް ކުރުމުގެ އިތުރުން ހުޅުމާލޭގެ ކަނޑުގެ ސަހަރައްދު ވެސް ބަލައިިފަ އެވެ.