October 15, 2014

މިނިވަން ނިއުސްގެ ނޫސްވެރިޔާ އަހުމަދު ރިލްވާން ގެއްލުނު މައްސަލާގައި ހައްޔަރުކުރި ހަތަރު މީހުންގެ ތެރެއިން މިހާރު ބަންދުގައި ހުރި ހަމައެކަނި މީހާގެ ބަންދުގެ މުއްދަތު އަނެއްކާ ވެސް އިތުރުކޮށްފި އެވެ.

އުމުރުްނ 25 އަހަރުގެ އެ މީހާގެ ބަންދަށް ކްރިމިނަލް ކޯޓުން މިއަދު ވަނީ 10 ދުވަސް ދީފަ އެވެ. މިއީ އޭނާގެ ބަންދުގެ މުއްދަތު އިތުރުކުރި ތިން ވަނަ ފަހަރެވެ.

މަރުގެ އިންޒާރު ދީފައި ވަނިކޮށް ރިލްވާން ގެއްލުނު މައްސަލާގައި ހައްޔަރުކުރި ތިން މީހަކު މީގެ ކުރިން ކޯޓުން ވަނީ ދޫކޮށްލައިފަ އެވެ.

އޮގަސްޓު މަހުގެ އަށް ވަނަ ދުވަހުގެ ރޭ ރިލްވާން ގެއްލުނީ މިނިވަން ނިސްގައި އޭނާ ލިޔާ ލިޔުންތަކާއި ސޯޝަލް މީޑިއާގައި ފާޅުކުރާ ހިޔާލުތަކާ ގުޅިގެން ތަކުރާރުކޮށް މަރުގެ އިންޒާރު ދީފައި ވަނިކޮށެވެ. އޭނާ އެންމެ ފަހުން ފެނުނީ އެ ރޭ ދަންވަރު ހުޅުމާލެ އަށް ދާން ޓިކެޓް ގަންނަން ފެރީ ޓާމިނަލްގައި ހުއްޓަ އެވެ.

އެ ރޭ އޭނާ ހުޅުމާލެ އަށް ދަނިކޮށް ފެރީ ތެރެއިން ދިމާވި ކަމަށް އޭނާގެ ރައްޓެއްސަކު ބުނާއިރު، ހަމަ އެ ރޭ ރިލްވާން ދިރިއުޅޭ އެޕާޓްމެންޓް ކައިރިން ގަދަކަމުން މީހަކު ކާރަކަށް އަރުވައިގެން ގެންދިޔަ ކަމަށް ވެ އެވެ. އަދި ރިލްވާން ގެއްލުމާ ގުޅޭގޮތުން ޕްރައިވެޓް އިންވެސްޓިގޭޓަރަކު ކުރި ތަހުގީގަށް ފަހު ނެރުނު ރިޕޯޓުގައި، ރިލްވާން “ވަގަށް ނެގީ” ކަމަށް ބެލުމުގެ ފުރުސަތު ބޮޑު ކަމަށް ބުނެފައިވެ އެވެ.