September 4, 2014

މިނިވަން ނިއުސްގެ ނޫސްވެރިޔާ އަހްމަދު ރިލްވާން، 28، ގެއްލުނު މައްސަލާގައި ފުލުހުން ޒިންމާދާރު ކުރުމަށް އެދި، 5،000 މީހުންގެ ސޮޔާއެކު ޕެޓިޝަނެއް ރައްޔިތުންގެ މަޖިލީހަށް ހުށަހަޅައިފި އެވެ.

ރިލްވާންގެ އާއިލާ އާއި ރަހްމަތްތެރިން އިސް ނަގައިގެން ތައްޔާރުކުރި މި ޕެޓިޝަންގައި ޔޫތު މިނިސްޓަރު މުހައްމަދު މަލީހާއި ޓޫރިޒަމް މިނިސްޓަރު އަހްމަދު އަދީބާއި އިކޮނޮމިކް މިނިސްޓަރު މުހައްމަދު ސައީދު ސޮއި ކުރެއްވި އެވެ.

މަޖިލީހުގެ ގައުމީ ސަލާމަތާ ބެހޭ ކޮމިޓީ އަށް ފޮނުވި މި ޕެޓިޝަންގައި ޕޮލިސް އިންޓެގްރިޓީ ކޮމިޝަންގެ ނާއިބު ރައީސް މުހައްމަދު ފަރުހާދު ވެސް ސޮއި ކުރައްވާފައިވާ ކަމަށް މިނިވަން ނިއުސްގެ ޑެޕިއުޓީ އެޑިޓަރު ޒަހީނާ ރަޝީދު ވިދާޅުވި އެވެ.

އެމްޑީޕީގެ އިސް ބައެއް ބޭފުޅުންނާއި އެމްޑީޕީ އަށް ނިސްބަތްވާ މަޖިލީހުގެ ގިނަ މެމްބަރުންގެ އިތުރުން ޖުމްހޫރީ ޕާޓީ އަށް ނިސްބަތްވާ މަޖިލީހުގެ ބައެއް މެމްބަރުން މި ޕެޓިޝަންގައި ސޮއިކުރެއްވި ކަމަށް ވެސް ޒަހީނާ ވިދާޅުވި އެވެ.

އޯގަސްޓް 29 ސޮއި ހޯދުމަށް ފެށި، މި ޕެޓިޝަންގައި ރިލްވާން ގެއްލުމާ ގުޅޭ ގޮތުން އުފައްދާފައިވާ ގިނަ ސުވާލުތަކަކަށް ފުލުހުންގެ ފަރާތުން ޖަވާބު ހޯދައި ދިނުމަށް އެދިފައިވެ އެވެ.

އެ ސުވާލުތަކުގެ ތެރޭގައި ރިލްވާނަށް ލިބުނު މަރުގެ އިންޒާރުތަކާ ގުޅޭ ގޮތުން ފުލުހުން އަމަލުކޮށްފައިވާ ގޮތާއި އެ ކަންކަމުގައި އެއްވެސް ބަޔަކަށް ތުހުމަތު ކުރެވި ސުވާލު ކޮށްފައިވާތޯ ސާފުކުރުމަށް އެދިފައިވެ އެވެ.

އެގޮތުން، ރިލްވާން ގެއްލުނު ރޭ ހުޅުމާލޭގައި އޭނާ ދިރިއުޅޭ އެޕާޓްމަންޓްގެ ކުރިމަތިން މީހަކު ގަދަކަމުން ކާރަކަށް އަރުވައިގެން ގެންދިޔަ މަންޒަރު ފެނުނު މައްސަލާގައި ފުލުހުން އަމަލުކުރީ، އެފަދަ މައްސަލައެއްގައި އަމަލުކުރަން އޮންނަ އުސޫލުތަކާ އެއްގޮތަށްތޯ އާއި އެއީ ކާކު ކަން ޔަގީންކުރަން އާންމުންގެ އެހީތެރިކަން ހޯދަން ފުލުހުން، އެކަން އާންމު ނުކުރީ ކީއްވެގެންތޯ އަދި އެ މީހާ ކާރަކަށް އަރުވައިގެން ގެންދިޔަ މައްސަލާގައި ފުލުހުން ތަހްގީގުކޮށްފައިވަނީ ކޮން ގޮތަކަށްތޯ ބަލައިދިނުމަށް ވެސް ޕެޓިޝަންގައި އެދިފައިވެ އެވެ. އަދި ގަދަކަމުން ކާރަށް އެރުވީ ރިލްވާން ކަން ކަށަވަރުވޭތޯ އާއި އެ ރޭ ހުޅުމާލޭގެ ލަފާފުރާ ހުރިހާ ހިސާބެއް ފުލުހުންގެ ބެލުމުގެ ދަށަށް ގެންދިޔަތޯ އޮޅުންފިލުވައި ދިނުމަށް ވެސް އެދިފައިވެ އެވެ.

ސޯޝަލް މީޑިއާގައި “މޮޔަމީހާ” ގެ ނަމުން މަޝްހޫރުވެފައިވާ ރިލްވާން، އޯގަސްޓް ހަތް ވަނަ ދުވަހުގެ ރެ އިން ފެށިގެން ގެއްލިފައިވާ އިރު، އޭނާ އަށް ވީ ކިހިނެއް ކަމެއް އަދި ނޭނގެ އެވެ. މި މައްސަލާގައި ފުލުހުންގެ ބެލުމުގެ ދަށަށް ކާރެއް ގެންގޮސްފައިވާ އިރު، ހަތަރު މީހެއްގެ ޕާސްޕޯޓް ވަނީ ހިފަހައްޓައިފަ އެވެ. ނަމަވެސް އެއްވެސް މީހަކު އަދި ހައްޔަރުކުރި ކަމެއް ފުލުހުން ނުބުނެ އެވެ.

ރިލުވާން ހޯދުމުގެ މަސައްކަތް ހަލުވިކަމާ އެކު ކުރިއަށް އެބަދާ ކަމަށާއި އޭނާ ގެއްލުނު މައްސަލައިގައި މިހާތަނަށް ދުއިސައްތައެއްހާ މީހުންނާ ސުވާލުކޮށް 80 އަށް ވުރެ ގިނަ މީހުންގެ ބަޔާން ނަގާފައިވާ ކަމަށް ފުލުހުން ވަނީ ބުނެފައިވެ އެވެ.