September 28, 2014

ނޫސްވެރިޔާ އަހުމަދު ރިލުވާން އަބްދުﷲ ގެއްލުނުތާ 50 ދުވަސްވެފައި ވަނިކޮށް އެ މައްސަލައާ ގުޅިގެން ތުހުމަތަށް ތިން މީހަކު ހައްޔަރުކޮށް އެ މީހުންގެ ބަންދުގެ މުއްދަތު ޖަހައިފި އެވެ.

މި މައްސަލައާ ގުޅިގެން އިއްޔެ ތިން މީހަކު ހައްޔަރުކޮށްފައިވާ ކަން ފުލުހުން ވެސް ވަނީ ކަށަވަރުކޮށްދީފަ އެވެ.

ފުލުހުން ބުނީ އެ ތިން މީހުން ހައްޔަރުކޮށް މުއްދަތު ޖެހުމަށް މިއަދު ކްރިމިނަލް ކޯޓަށް ހާޒިރު ކުރުމުން އޭގެ ތެރެއިން އެކެއްގެ ބަންދަށް 7 ދުވަސް އަދި އަނެއް ދެމީހުންގެ ބަންދަށް ފަސް ދުވަސް ދީފައިވާ ކަމަށެވެ. އެމީހުންގެ ބަންދު އިތުރުކޮށްދިނީ ހޯމް މިނިސްޓްރީން އަންގާ ތަނެއްގައި ބައިތިއްބައިގެން ތަހުގީގު ހިންގާށެވެ.

ތުހުމަތަށް ހައްޔަރު ކުރި ތިން މީހުންގެ ތެރޭގައި ހިމެނެނީ 22 އަހަރުގެ ދެ މީހުންނާއި 24 އަހަރުގެ މީހެކެވެ. އޭގެ ތެޜޭގައި އަންހެނަކު ނުހިމެނެ އެވެ. އިތުރު މައުލޫމާތެއް ފުލުހުން އަދި ނުދެ އެވެ.

ރިލްވާން ގެއްލިފައި ވަނީ މިދިއަ މަހުގެ އަށް ވަނަ ދުވަހު އެވެ. އެ މައްސަލައިގައި ފުލުހުން ބުނެފައި ވަނީ ރިލްވާން ގެއްލުނު ފަހުން އެއްވެސް މީހަކަށް ހުޅުމާލެއިން އޭނާ ފެނި މުއާމަލާތް ކުރިން ކަށަވަރުކޮށްދެއްވިފައި ނުވާ ކަމަށާއި ރިލްވާން ދިރިއުޅޭ ފްލެޓް ސަރަހައްދުގައި ހިނގި ހާދިސާއާ ރިލްވާން ގެއްލުނު ހާދިސާއާ ގުޅުންހުރި ކަމުގެ ސާބިތު އެއްވެސް ހެއްކެއް މިހާތަނަށް ލިބިފައި ނުވާ ކަމަށެވެ.

މިހާތަނަށް ހޯދުނު މަޢުލޫމާތަށް ބަލާއިރު އޮގަސްޓް 7، 2014 ވަނަ ދުވަހުގެރޭގެ މެންދަމު 12:00 އިގެ ފަހުން ރިލްވާން ހުޅުމާލެއިން އެއްވެސް މީހަކަށް ފެނި އެއްވެސް މީހަކާ މުޢާމަލާތް ކުރިކަން މިހާތަނަށް ކަށަވަރުކޮށްދެވިފައި ނުވި ނަމަވެސް އޯގަސްޓް އަށް ވަނަ ދުވަހުގެ ރޭ 12:55 ގައި ހުޅުމާލޭ، މާލޭ ފެރީ ޓާމިނަލަށް ރިލްވާން ވަތްތަން މިހާތަނަށް ދިރާސާކުރި ސީސީޓީވީ ފުޓޭޖުން ފެނިފައިވާ ކަމަށާއި އޭގެފަހުން މާލެއިން ހުޅުމާލެއަށް ދަތުރުކުރި ފެރީއަކުން ރިލްވާނާއި ވާހަކަދެއްކި ކަމުގެ މަޢުލޫމާތު އަމިއްލަ ފަރާތަކުން ފުލުހުންނަށް ދީފައިވާ ކަމަށެވެ.

ރިލްވާން ގެއްލުނު ހާދިސާ އާއި އޮގަސްޓް 7 ވަނަ ދުވަހުގެރޭ ހުޅުމާލޭގައި އޭނާ ދިރިއުޅުނު ފްލެޓް ސަރަޙައްދުގައި ހިނގައިދިޔަ ހާދިސާއާ ގުޅުން ހުރިކަމުގެ ސާބިތު އެއްވެސް ހެއްކެއް މިހާތަނަށް ފުލުހުންގެ ތަޙުޤީޤަށް ލިބިފައެއް ނުވާ ކަމަށާއި އަދި އޮގަސްޓް 15 ވަނަދުވަހު ހުޅުމާލޭގައި ހިނގި އަލިފާނުގެ ޙާދިސާއާ ރިލްވާން ގެއްލުނު ޙާދިސާއާ ވެސް ގުޅުމެއް ނެތްކަން ތަހުގީގަށް އެނގޭ ކަމަށާއި މީގެ އިތުރުން އޮގަސްޓް 7 ވަނަ ދުވަހުގެރޭ މާލެ، ހުޅުމާލެ ފެރީޓާމިނަލްގައި ރިލްވާން ހަރަކާތްތެރިވަނިކޮށް ފެންނަ ސީސީ ޓީވީ ފުޓޭޖް ބަލައި ދިރާސާކޮށް، އެ ފުޓޭޖުން ފެންނަ ބައެއް މީހުން ހާޒިރުކޮށް ސުވާލުކޮށްފައިވާ ކަމަށް ވެސް ފުލުހުން ވަނީ ބުނެފައެވެ.

މިހާތަނަށް މާލެއިން ނުވަ ގެއެއް ބަލައ ފާސްކޮށް ހުޅުމާލޭގެ ގޭގެއާއި ގުދަންތަކާއި ގަރާޖްތައް ހިމެނޭގޮތަށް 139 އަށް ވުރެ ގިނަ ތަން ބަލައި ބައެއް ރަށްރަށުގެ ގެސްޓްހައުސްތަކާއި ގޭގެ މިހާރުވެސް ބަލަމުން އަންނަ ކަމަށާއި މިހާތަނަށް 128 މީހުންނާ ސުވާލުކޮށް ބަޔާން ނަގައި 387 މީހަކާ ސުވާލުކޮށްފައިވާ ކަމަށާއި ހުޅުމާލޭގައި މީހުން ދިރިއުޅޭ 77 އެޕަޓްމަންޓަކުން 192 މީހުންނާ ސުވާލުކޮށްފައިވާ ކަމަށް ވެސް ފުލުހުން ވަނީ ބުނެފަ އެވެ.