September 3, 2014

މިނިވަން ނިއުސްގެ ނޫސްވެރިޔާ އަހްމަދު ރިލްވާން ގެއްލުނު މައްސަލަ ކުރިއަށް ގެންދަން އެޖެންޑާ ކޮށްފައި އޮތް ރައްޔިތުންގެ މަޖިލިހުގެ ސަލާމަތީ ހިދުމަތްތަކާބެހޭ ކޮމިޓީ (241 ކޮމިޓީ)ގެ ކުޑަ ކޮމިޓީގެ މިއަދުގެ ބައްދަލުވުން، އެ ކޮމިޓީގެ މުގައްރިރު، ކެނދިކުޅުދޫ ދާއިރާގެ މެމްބަރު އަލީ މައުރޫފު ކާނާ ވިހަވުމުގެ ސަބަބުން ކެންސަލްކޮށްފި އެވެ.

“ކެވުނު އެއްޗެއްގެ ސަބަބުން އަޅުގަނޑު އުޅުނީ ސިއްހީ ހާލަތު ވަރަށް ދަށްކޮށް. ރޭ ނުވެސް ނިދޭ،” ކޮމިޓީގެ ބައްދަލުވުން ކެންސަލްކުރީ ކީއްވެތޯ ސުވާލު ކުރުމުން، މައުރޫފް “ހަވީރަ”ށް ވިދާޅުވި އެވެ.

ނަމަވެސް ކާނާ ވިހަވީ މަޖިލީހުގެ އިދާރާއިން ފަރިއްކުޅުވި އެއްޗަކުންނެއް ނޫން ކަމަށް އޭނާ ވިދާޅުވި އެވެ.

މިދިޔަ މަހުގެ ހަތް ވަނަ ދުވަހުގެ ރޭ ގެއްލުނު ރިލްވާންގެ މައްސަލަ ބަލައިދިނުމަށް އެމްޑީޕީގެ މެމްބަރުން ހުށަހެޅުމުން، އެ މައްސަލަ ދިރާސާކުރުމަށްޓަކައި ހަ މެމްބަރުންގެ ކުޑަ ކޮމިޓީއެއް ނެގީ އިއްޔެ އެވެ.

މިއަދު 10:00 ގައި ބާއްވަން ހަމަޖެއްސި އެ ކޮމިޓީގެ ފުރަތަމަ ބައްދަލުވުން ކެންސަލް ކުރަން ޖެހުނު ނަމަވެސް، މައުރޫފު ވިދާޅުވީ މާދަމާ ހެނދުނު ބައްދަލުވުން ބާއްވާނެ ކަމަށެވެ. އަދި ފުލުހުންގެ އިތުރުން ކަމާގުޅޭ ހުރިހާ ފަރާތްތައް ކޮމިޓީއަށް ހާޒިރުކުރާނެ ކަމަށް އޭނާ ވިދާޅުވި އެވެ.

ރިލްވާން ގެއްލިގެން ހޯދަމުންދާތާ މިއަދަށް 26 ދުވަސްވެފައި ވާއިރު، އޭނާ ގެއްލުނު ގޮތެއް ފުލުހުން ހާމައެއް ނުކުރެ އެވެ. މި މައްސަލާގައި ހަތަރު މީހެއްގެ ޕާސްޕޯޓް ހިފަހައްޓާފައި ވާއިރު، ޕްރައިވެޓް ކާރެއް ފުލުހުންގެ ބެލުމުގެ ދަށަށް ގެންގޮސްފައިވެ އެވެ.