September 16, 2014

މިނިވަން ނޫހުގެ ނޫސްވެރިޔާ އަހުމަދު ރިޟްވާން އަބުދުﷲ ގެއްލުނު މައްސަލައާ ގުޅިގެން ހިނގާލުމެއް ބޭއްވުމަށް ހަމަޖއްސައިފި އެވެ.

ރިޟުވާން އަބްދުﷲ ހޯދުމަށް ކުރާ މަސައްކަތުގައި ފުލުހުންގެ އިހުމާލެއް އޮތްތޯ ބެލުމަށް އޭނާގެ އާއިލާގެ ފަރާތުން ޕޮލިސް އިންޓެގްރިޓީ ކޮމިޝަން (ޕީއައިސީ) އަށް މައްސަލަ ހުށަހެޅުމަށްފަހު މީޑިއާއަށް މައުލޫމާތުދެއްވަމުން މިނިވަން ނޫހުގެ ޑެޕިއުޓީ އެޑިޓަރު ޒަހީނާ ރަޝީދު ވިދާޅުވީ، މި ހިނގާލުމަކީ ރިޟްވާންގެ އާއިލާއިންނާއި އަދި އޭނާގެ އެކުވެރިން އިންތިޒާމްކޮށްގެން ބާއްވާ ހިނގާލުމެއް ކަމަށެވެ.

މި ހިނގާލުން އޮންނާނީ ހުކުރު ދުވަހުގެ ހަވީރު ހަތަރެއް ޖަހާއިރު އާޓިފިޝަލް ބީޗުގައި ކަމަށް ވެސް އޭނާ ވިދާޅުވި އެވެ.

ރިޟްވާންގެ އާއިލާއާއި އޭނާގެ އެކުވެރިން މިއަދު ވަނީ މި މައްސަލައާ ގުޅިގެން ޕޮލިސް އިންޓެގްރިޓީ ކޮމިޝަނާއި ވެސް ބައްދަލުކޮށްފައެވެ. ޕޮލިސް އިންޓަގްރިޓީ ކޮމިޝަނާއި ބައްދަލުކުރީ ރިޟުވާނު ގެއްލުނު މައްސަލައިގައި ފުލުހުން މަސައްކަތް ކުރަމުންދާ ކަމުގެ ޔަޤީންކަން ހޯދުމަށް ކަމަށް އެ ބައްދަލުވުމުގައި ބައިވެރިވި މިނިވަން ނޫހުގެ ޑެޕިއުޓީ އެޑިޓަރު ޒަހީނާ ވިދާޅުވި އެވެ.

ބައްދަލުވުމުގައި ބައިވެރިވި، ރިޟުވާނުގެ އާއިލާގެ ވަކީލު ވިދާޅުވީ ޕޮލިސް އިންޓަރގްރިޓީ ކޮމިޝަނުގައި އެ މައްސަލަ ރަޖިސްޓްރީ ނުކުރި ކަމުގައި ވިޔަސް އެކަން ބައްލަވާނެ ކަމުގެ ޔަޤީންކަން އެ ކޮމިޝަނުން ދެއްވި ކަމަށެވެ.

ރިޟްވާން ގެއްލުނު މައްސަލައާ ގުޅިގެން ފުލުހުން މިއަދު ނެރުނު ބަޔާނެއްގައި ބުނެފައިވަނީ ރިޟްވާން ގެއްލިގެން އޮގަސްޓް 13 ވަނަ ދުވަހު ހުށަހެޅިއިރު އޮގަސްޓް 7 ވަނަ ދުވަހުގެރޭގެ 00:00 މިނެޓުގެ ފަހުން ރިޟްވާން ހުޅުމާލެއިން އެއްވެސް މީހަކަށް ފެނި އެއްވެސް މީހަކާ މުޢާމަލާތް ކުރިކަން މިހާތަނަށް ކަށަވަރުކޮށްދެވިފައިވާ ކަމަށެވެ.

ނަމަވެސް އޮގަސްޓް 8 ވަނަ ދުވަހުގެ 00:55 ހާއިރު ރިޟްވާން ހުޅުމާލެ، މާލޭ ފެރީ ޓާމިނަލަށް ވަތްތަން މިހާތަނަށް ދިރާސާކުރި ސީސީޓީވީ ފުޓޭޖުން ފެނިފައިވާ ކަމަށާއި އޭގެފަހުން މާލެއިން ހުޅުމާލެއަށް ދަތުރުކުރި ފެރީއަކުން ރިޟްވާން ޢަބްދުﷲ އާއި ވާހަކަދެއްކިކަމުގެ މަޢުލޫމާތު އަމިއްލަ ފަރާތަކުން ފުލުހުންނަށް ދީފައިވާ ކަމަށް ވެސް ބަޔާނުގައިވެ އެވެ.