September 4, 2014

މިނިވަން ނޫހުގެ ނޫސްވެރިޔާ އަހުމަދު ރިޟްވާން އަބްދުﷲ ގެއްލުނު މައްސަލައިގައި 5000 އަށް ވުރެ ގިނަ މީހުންގެ ސޮޔާއިއެކު ރައްޔިތުންގެ މަޖިލީހަށް ޕެޓިޝަނެއް މިއަދު ހުށަހަޅައިފި އެވެ.

އާންމުންގެ ފަރާތުން ރައްޔިތުންގެ މަޖިލީހަށް މި ޕެޓިޝަން ހުށަހެޅީ ރިޟްވާންގެ އާއިލާގެ ފަރާތުން މިއަދު ހެނދުނުގެ ވަގުތެއްގައި އެވެ. މި ޕެޓިޝަން ހުށަހަޅާފައިވަނީ މަޖިލީހުގެ ގައުމީ ސަލާމަތާ ބެހޭ ކޮމިޓީއަށެވެ.

ޕެޓިޝަން ހަވާލުކުރުމަށްފަހު ރިޟްވާންގެ އާއިލާއިން ބުނީ ދައުލަތުގެ ކަމާބެހޭ އެއްވެސް އިދާރާއަކުން އެކަށީގެންވާ ގޮތެއްގައި ރިޟްވާން ހޯދުމަށް އެކަށީގެންވާ މަސައްކަތެއް ނުކުރާ ކަމަށާއި އެއީ އާއިލާއަށާއި ރިޟްވާނަށް ހެޔޮއެދޭ ފަރާތްތަކަށް ލިބޭ ވަރަށް ބޮޑު ނިކަމެތި ކަމެއްކަމަށެވެ.

ނޫސްވެރިންނާ ވާހަކަ ދައްކަމުން ރިޟްވާންގެ ބޭބެ މޫސާ ރިޟްވާން ބުނީ ގައުމީ ސަލާމަތު ކޮމެޓީ އަށް ހުށަހެޅި އެ ޕެޓިޝަނުގެ ސަބަބުން ރިޟްވާން ހޯދުމަށް ކުރަމުންދާ މަސައްކަތަށް އިތުރު ކުރިއެރުމެއް ލިބިގެންދާނެ ކަމަށް އުންމީދު ކުރާ ކަމަށާއި މި ޕެޓިޝަނަކީ ފުލުހުން ޒިންމާދާރު ކުރުވުމަށް ހުށަހެޅި ޕެޓިޝަނެއް ކަމަށެވެ.

މޫސާ ރިޟްވާން ބުނީ ރައްޔިތުންގެ މަޖިލީހުގެ އެކިއެކި ކޮމެޓީތަކަށް އެމަސައްލަ ހުށަހެޅިފައިވާ އިރު މަޖިލީހުން ވެސް އެމައްސަލަ އެއްވެސް ވަރަކަށް ދިރާސާކޮށް ބަލަން ބޭނުންނުވާ ކަން ހާމަވަމުންދާ ކަމަށާއި އެގޮތުން މަޖިލީހުގެ މިނިވަން މުއައްސަސާތަކާބެހޭ ކޮމެޓީއަށް ހުށަހެޅިފައިވާ މައްސަލަ ބެލުމަށް އެކޮމެޓީން ރޭ ބޭއްވި ބައްދަލުވުން ސިއްރުކޮށް އެމައްސަލަ އެކޮމެޓީން ބޭރު ކޮށްފައިވާތީ އާއިލާއިން އެކަމާ ހިތާމަ ކުރާ ކަމަށެވެ.

މި ޕެޓިޝަންގައި ރިޟްވާން ގެއްލުމާ ގުޅޭ ގޮތުން އުފައްދާފައިވާ ގިނަ ސުވާލުތަކަކަށް ފުލުހުންގެ ފަރާތުން ޖަވާބު ހޯދައި ދިނުމަށް އެދިފައިވެ އެވެ.

އެގޮތުން ހުޅުމާލެއިން މިދިޔަ މަހުގެ 7 ވަނަ ދުވަހުގެރޭ ކާރަކަށް އަރުވައިގެން ގެންދިޔަ މައްސަލާގައި ފުލުހުން ތަހްގީގުކޮށްފައިވަނީ ކޮން ގޮތަކަށްތޯ ބަލައިދިނުމަށާއި ގަދަކަމުން ކާރަކަށް އަރުވައިގެން ގެންދިޔައީ ރިޟްވާންކަން ކަށަވަރުވޭތޯ އާއި އެ ރޭ ހުޅުމާލޭގެ ލަފާފުރާ ހުރިހާ ހިސާބެއް ފުލުހުންގެ ބެލުމުގެ ދަށަށް ގެންދިޔަތޯ އޮޅުން ފިލުވައިދިނުމަށް އެދިފައިވެ އެވެ.

މޮޔަ މީހާ” ގެ ނަމުން ސޯޝަލް މީޑިއާގައި މަޝްހޫރުވެފައިވާ ރިޟްވާން ގެއްލިފައިވަނީ މިދިޔަ މަހުގެ 7 ވަނަ ދުވަހު މާލޭގައި ހުންނަ ހުޅުމާލެ ފެރީ ޓާމިނަލަށް ވަތް ފަހުންނެވެ. ޓިކެޓު ނަގައިގެން ޓާމިނަލް ތެރެއަށް ރިޟްވާން ވަތް ސީސީޓީވީ ފޫޓޭޖް މިހާރު އާންމުވެފައިވާއިރު ރިޟްވާން ހުޅުމާލެއަށް ފޭބިކަން ފުލުހުންނަށް ކަށަވަރެއް ނުވެ އެވެ.

ފުލުހުން ހާމަކޮށްފައިވާ ގޮތުގައި ރިޟްވާންގެ ފޯންގެ ސިގްނަލް އެންމެ ފަހުން ލިބުނީ ހަތް ވަނަ ދުވަހުގެ ރޭ މެންދަމު 2:30 ގައި ހެންވޭރުގެ ސަރަހައްދަކުންނެވެ. އަދި އެންމެ ފަހުން ފޯން ކޯލެއް ކޮށްފައިވަނީ އެ ރޭ 10:19 ގައި އެވެ.

އޭނާ ހޯދުމުގެ މަސައްކަތުގައި ހުޅުމާލޭ ބަލާފައިވާ ކަން ފުލުހުން ހާމަކޮށްފައިވާއިރު ގިނަ އަދަދެއްގެ ސީސީޓީވީ ފޫޓޭޖްތައް ވެސް ބަލަމުން އަންނަ ކަމަށް ފުލުހުން ބުނެ އެވެ.

ރިޟްވާން ގެއްލުނު މައްސަލަ އާއި ގުޅިގެން ހަތަރު މީހެއްގެ ޕާސްޕޯޓް އިމިގްރޭޝަނުން ވަނީ ހިފަހައްޓާފައެވެ.