September 11, 2014

މިނިވަން ނޫހުގެ ނޫސްވެރިއާ އަހުމަދު ރިޟްވާނަށް ވީނުވީއެއް ސަރުކާރުން އޮޅުން ފިލުވައި ނުދެނީސް ބޯހިމެނުގައި ބައިވެރިނުވާ މަޝްވަރާކުރަމުން އަންނަކަމަށް އެމްޑީޕީން ހާމަކޮށްފިއެވެ.

އެމްޑީޕީގެ ނައިބުރައީ މުހައްމަދު ޝީފާޒް މިއަދު ވިދާޅުވީ، ބޯހިމެނުމަކީ މުހިންމުކަމެއް ކަމަށް އެމްޑީޕީން ދެކޭކަމަށެވެ. އެހެން ނަމަވެސް ދިވެހި ރައްޔިތަކަށް ވީނުވީއެއް ނޭގި ގެއްލިފައިވަނިކޮށް އޭނާއާއި ނުލައި ބޯހިމެނުމަކީ ގަބޫލުކުރަން ދަތިކަމެއްކަމަށެވެ. މިހެން ކަމުން އެ މައްސަލައިގައި މަޝްވަރާކޮށް ގޮތެއް ނިންމުމަށް އެމްޑީޕީގެ ގައުމީ މަޖިލީހަށް ހުށަހެޅުމަށް ނިންމާފައިވާކަމަށެވެ.

“ބޯހިމެނުމަކީ ވަރަށް މުހިންމުކަމެއް ކަމަށް އަޅުގަނޑުމެން ގަބޫލުކުރަން. އެހްން ނަމަވެސް ދިވެހި ރައްޔިތަކު ގެއްލިފައިވަނިކޮށް. އޭނާއަށް ވީނުވީއެއް ނޭގި އޮއްވާ ބޯހިމަނައިގެން ނުވާނެކަމަށް އަޅުގަނޑުމެންގެ ބައެއް މެމްބަރުން ދެކޭ،” ޝިފާޒު ވިދާޅުވިއެވެ.

އެމްޑީޕީ ގައުމީ މަޖިލީހުގެ ޖަލްސާއެއް ވަރަށް އަވަހަށް ބާއްވާނެކަމަށް ވެސް އޭނާ ވިދާޅުވިއެވެ. މިހާރުވެސް ބައްދަލުވުމެއް ނުބޭއްވިގެން އުޅެނީ ބައްދަލުވުން ބޭއްވުމަށް ސަރުކާރުން ތަނެއް ނުދީގެންކަމަށް ވެސް އޭނާވިދާޅުވިއެވެ.

އުމުރު 28 އަހަރުގެ އަހުމަދު ރިޟްވާން އެންމެ ފަހުން ފެނިފައިވަނީ އޮގަސްޓު ހަތް ވަނަ ދުވަހުގެ ރޭގައެވެ. އެރޭ އޭނާވަނީ ހުޅުމާލެ އަށް ދިއުމަށްޓަކައި ފެރީ ޓާމިނަލަށް ވަދެފައެވެ. އޭނާއެތަނަށް ވަދެފައިވާ މަންޒަރުވަނީ ސީސީޓީވީ ކެމެރާތަކަށް އަރައިފިއެވެ. އެރޭ އޭނާ ލައިގެންހުރީ ކަޅުކުލައިގެ ފަޓުލޫނަކާއި ގަމީހެކެވެ.ރިޟްވާނާ ބެހޭ އެއްވެސް މައުލޫމާތެއް ލިބިއްޖެނަމަ 7791120 އާއި 7773250 މި ދެނަންބަރަށް ގުޅައި މައުލޫމާތު ހިއްސާ ކުރުމަށް އާއިލާއިންވަނީ އެދިފައެވެ.

ބޭހިމެނުން ބޭއްވުމަށް ނިންމައިފައިވަނީ މިމަހު 20 ވަނަ ދުވަހުއެވެ. ރާއްޖޭގައި އެންމެ ފަހުން ބޯހިމަނާފައިވަނީ 2006 ވަނަ އަހަރުއެވެ.