September 29, 2014

މީގެ މަހެއްހާ ދުވަސް ކުރިން ވީނުވީއެއް ނޭނގި ގެއްލުނު މިނިވަން ނިއުސްގެ ޖާނަލިސްޓް އަހުމަދު ރިލްވާން ހޯދުމަށް ކުރާ ތަހުގީގުގައި މަސައްކަތް ކުރަމުން އަންނަނީ ރަނގަޅު ނަތީޖާއަކާ ހަމައަށް ދިއުމަށް ކަމަށް ފުލުސް އޮފީހުން މިއަދު ބުނެފި އެވެ.

ރިލްވާން ގެއްލުނުތާ މިއަދަށް 52 ދުވަސްވެފައިވާއިރު، އެ މައްސަލާގައި ފުލުހުން ވަނީ ކޯޓު އަމުރެއްގެ ދަށުން 22 އަހަރުގެ ދެ ފިރިހެނުންނާއި 24 އަހަރުގެ ފިރިހެނަކު ހައްޔަރުކޮށްފަ އެވެ.

ފުލުހުންގެ އޮފިޝަލަކު މިއަދު ވިދާޅުވީ ރިލްވާން ގެއްލުނު މައްސަލާގައި ތިން މީހަކު ހައްޔަރުކުރީ، ވަރަށް ކެތްތެރިކަމާ އެކު ފުލުހުން ކުރި މަސައްކަތުން ކަމަށެވެ. ބަޔަކު ހައްޔަރުކުރުމަކީ ފުލުހުންގެ ތަހުގީގުން ލިބުނު ވަރަށް ބޮޑު ކުރިއެރުމެއް ކަމަށް ވެސް އޭނާ ވިދާޅުވި އެވެ.

“ފުލުހުން މަސައްކަތް ކުރަމުން މި އަންނަނީ ރަނގަޅު ނަތީޖާއަކާ ހަމައަށް ދާން،” އޭނާ ވިދާޅުވި އެވެ.
ރިލްވާން ގެއްލުނު މައްސަލާގައި ބަޔަކު ހައްޔަރުކުރީ، މޯލްޑިވިއަން ޑިމޮކްރަސީ ނެޓްވޯކުން ޕްރައިވެޓް އިންވެސްޓިގޭޓަރަކާ ހަވާލުކޮށްގެން ކުރި ތަހުގީގަށް ފަހު ނެރުނު ރިޕޯޓުގައިވާ މައުލޫމާތުތަކުގެ މައްޗަށް ބިނާކޮށް ކަމަށް ބައެއް ފަރާތްތަކުން ސޯޝަލް މީޑީއާގައި ދަނީ ބުނަމުންނެވެ.

ނަމަވެސް ފުލުހުން ބުނީ، ރިލްވާން ގެއްލުނު މައްސަލާގައި ތިން މީހަކު ހައްޔަރުކުރީ ބަޔަކު ދިން މައުލޫމާތެއްގެ މައްޗަށް ނޫން ކަމަށާއި ފުލުހުންގެ ތަހުގީގުން ކަމަށެވެ. އޭނާ ހޯދަން ފުލުހުން ހުއްޓުމެއް ނެތި ކުރާ މަސައްކަތުގައި ރައްޔިތުންގެ އެއްބާރުލުން ފުރިހަމަ އަށް ދިނުމަށް ވެސް ފުލުހުން އެދެ އެވެ.
ރިލްވާން ގެއްލުމާ ގުޅޭގޮތުން އެއްވެސް މައުލޫމާތެއް ލިބިފައިވާ ނަމަ ލަސްނުކޮށް ފުލުހުންނާ ހިއްސާކުރަން ފުލުސް އޮފީހުން އެދެ އެވެ.

މިދިޔަ މަހުގެ އަށް ވަނަ ދުވަހުގެ ރޭ ރިލްވާން ގެއްލުނީ މިނިވަން ނިސްގައި އޭނާ ލިޔާ ލިޔުންތަކާއި ސޯޝަލް މީޑިއާގައި ފާޅުކުރާ ހިޔާލުތަކާ ގުޅިގެން ތަކުރާރުކޮށް މަރުގެ އިންޒާރު ދީފައި ވަނިކޮށެވެ. އޭނާ އެންމެ ފަހުން ފެނުނީ އެ ރޭ ދަންވަރު ހުޅުމާލެ އަށް ދާން ޓިކެޓް ގަންނަން ފެރީ ޓާމިނަލްގައި ހުއްޓަ އެވެ.

އެ ރޭ އޭނާ ހުޅުމާލެ އަށް ދަނިކޮށް ފެރީ ތެރެއިން ދިމާވި ކަމަށް އޭނާގެ ރައްޓެއްސަކު ބުނާއިރު، ހަމައެރޭ ރިލްވާން ދިރިއުޅޭ އެޕާޓްމެންޓް ކައިރިން ގަދަކަމުން މީހަކު ކާރަކަށް އަރުވައިގެން ގެންދިޔަ ކަމަށް ވެ އެވެ. އަދި ރިލްވާން ގެއްލުމާ ގުޅޭގޮތުން ޕްރައިވެޓް އިންވެސްޓިގޭޓަރަކު ކުރި ތަހުގީގަށް ފަހު ނެރުނު ރިޕޯޓުގައި، ރިލްވާން “ވަގަށް ނެގީ” ކަމަށް ބެލުމުގެ ފުރުސަތު ބޮޑު ކަމަށް ބުނެފައިވެ އެވެ.