September 21, 2014

ގެއްލިގެން ހޯދަމުން އަންނަ ނޫސްވެރިޔާ އަހުމަދު ރިލްވާނާގުޅޭ ހާއްސަ ތަހުގީގީ ރިޕޯޓެއް މާދަމާ އާންމު ކުރާނެ ކަަމަށް މޯލްޑިވިއަން ޑިމޮކްރެސީ ނެޓްވޯކް (އެމްޑީއެން) ބުނެފި އެވެ.

އެމްޑީއެން އިން މިއަދު ނެރުނު ނޫސް ބަޔާނެއްގައި ބުނެފައި ވަނީ ރިލްވާން ގެއްލުމާއި ގުޅިގެން އެ ޖަމިއްޔާ އިން ވަރަށް ކަންބޮޑުވާ ކަމަށާއި ރިލްވާންގެ މައްސަލަ ތަހުގީގު ކުރުމަށް ނިންމާ އެ ތަހުގީގު ރާއްޖޭން ބޭރުގެ އިންވެސްޓިގޭޓަރަކާއި ހަވާލުކޮށްފައިިވާ ކަމަށެވެ. އަދި ބުނެފައި ވަނީ ތަހުގީގު ނިންމައި ތަހުގީގުގެ ޕްރިލިމިނަރީ މައުލޫމާތު އެ ޖަމިއްޔާއަށް މިހާރު ލިބިފައިވާ ކަމަށެވެ. އެހެން ކަމުން އެ ތަހުގީގުގައި ހިމެނޭ އަސާސީ މައުލޫމާތުތައް މާދަމާ ރައްޔިތުންނާއި ހިއްސާ ކުރާނެ ކަަމަށް ވެސް ބުނެފައި ވެއެވެ.

ޑިމޮކްރެސީ ނެޓްވޯކުން މިފަދަ ބަޔާނެއް ނެރެފައިވާއިރު މިދިޔަ ހުކުރު ދުވަހު ރިލްވާން ގެއްލުމުން އުފެދިފައިވާ ސުވާލުތަކަށް ޖަވާބު ހޯދުމަށް ވަނީ “ސުވާލު މާޗެއް” ބާއްވާފަ އެވެ. މި ސުވާލު މާޗު ބާއްވާފައި ވަނިކޮށް މިއަދު ފުލުހުން ބުނެފައި ވަނީ މަގުމައްޗައް ނުކުތަސް ތަހުގީގަށް ހުރަސް އެޅޭފަދަ އެއްވެސް މައުލޫމާތެއް ހިސްސާ ނުކުރާނެ ކަމަށެވެ.

ރިލްވާން ގެއްލިފައި ވަނީ މިދިޔަ މަހުގެ ހަތް ވަނަ ދުވަހު އެވެ. އޭނާ ގެއްލިގެން ރިޕޯޓު ކުރެވުނީ މި މަހުގެ 14 ވަނަ ދުވަހު އެވެ. މި މައްސަލައިގައި ފުލުހުން ދަނީ “ބޮޑު” ތަހުގީގެއް ހިންގަމުން ކަމަށް ފުލުހުން ބުނެ އެވެ. ނަަމަވެސް އޭގެ މާ ބޮޑު ތަފްސީލެއް ފުލުހުން މިހާތަނަށް އާންމު ކޮށްފައެއް ނުވެއެވެ.