September 16, 2014
މިނިވަން ނިއުސްގެ ނޫސްވެރިޔާ، އަހުމަދު ރިލްވާން ގެއްލުނުތާ މަހަކަށްވުރެ ގިނަ ދުވަސްވެފައިވާއިރު، އޭނާ ހޯދުމަށް ކުރިއަށް ގެންދާ ތަހުގީގުގައި ފުލުހުންގެ އިހުމާލެއް އޮތްތޯ ބަލައިދިނުމަށް ރިލްވާންގެ އާއިލާ އިން ޕޮލިސް އިންޓެގްރިޓީ ކޮމިޝަން (ޕީއައިސީ) އަށް ހުށަހަޅައިފި އެވެ.
މިދިޔަ މަހުގެ ހަތް ވަނަ ދުވަހުން ފެށިގެން ގެއްލިގެން ހޯދަމުން އަންނަ ރިލްވާންގެ އާއިލާ އިން މިއަދު ޕީއައިސީގެ މެމްބަރުންނާ ބައްދަލުކުރުމަށް ފަހު ނޫސްވެރިންނާ ވާހަކަ ދައްކަމުން ބުނީ ރިލްވާން ގެއްލުނާ 39 ދުވަސްވެފައިވާއިރު، މިހާތަނަށް އޭނާގެ އެއްވެސް މައުލޫމާތެއް ނުލިބުމަކީ އާއިލާ އިން ކަންބޮޑުވާ ކަމެއް ކަމަށެވެ. ރިލްވާން ހޯދުމަށް ފުލުހުން ކުރިއަށް ގެންދާ ތަހުގީގުން ވެސް މިހާތަނަށް އޭނާއާ ބެހޭ އެއްވެސް މައުލޫމާތެއް ލިބިފައި ނުވާ ކަމަށް އާއިލާ އިން ބުންޏެވެ.
އާއިލާ އިން ބުނިގޮތުގައި ރިލްވާން ހޯދަން ފުލުހުން ކުރިއަށް ގެންދާ ތަހުގީގުގައި އިހުމާލެއްވޭތޯ ބަލައިދޭނެ ކަމުގެ ޔަގީންކަން އެ ކޮމިޝަނުން ވަނީ ދީފަ އެވެ.
ޕީއައިސީ ބައްދަލުވުމަށް ފަހު އާއިލާގެ ފަރާތުން ވާހަކަ ދެއްކެވި މިނިވަން ނިއުސްގެ ޑެޕިއުޓީ އެޑިޓަރު ޒަހީނާ ރަޝީދު ވިދާޅުވީ ރިލްވާންގެ މައްސަލަ ތަހުގީގުކުރާތާ މަހަކަށްވުރެ ގިނަ ދުވަސްވިއިރު ވެސް އޭނާ ގެއްލުނީތޯ ނުވަތަ ވަގަށް ނެގީތޯ ނުވަތަ އެ ނޫން ކަމެއްތޯ ވެސް ފުލުހުންގެ ފަރާތުން މިހާތަނަށް ސާފުވެފައި ނުވާ ކަމަށެވެ.
“ޕީއައިސީ އަށް އަޅުގަނޑުމެން މި ހުށަހެޅީ ރިލްވާން ގެއްލުނު ރޭ އަދި އޭނާ ހޯދުމަށް ކުރާ ތަހުގީގުގައި ފުލުހުންގެ އިހުމާލެއް އެއްވެސް ވަރަކަށް އޮތްތޯ ބަލައިދިނުމަށް މި ހުށަހެޅީ،” ޒަހީނާ ވިދާޅުވި އެވެ.
އޭނާ ވިދާޅުވި ގޮތުގައި ރިލްވާނަށް ވީގޮތެއް ހޯދުމަށް ފުލުހުންގެ ތަހުގީގަށް އާއިލާ އާއި ރައްޓެހިން އަދި ހެޔޮއެދޭ ފަރާތްތަކުން ވެސް ތިބީ ބަރޯސާވެގެންނެވެ. އެކަމަކު ރިލްވާނަށް ވީގޮތެއް ނޭނގި މައްސަލަ ދިގުދެމިގެން ދިއުމަކީ ރާއްޖެ އިން އަދިވެސް މީހުން “ގެއްލުމުގެ ސަގާފަތެއް ފެތުރުމުގެ ބިރުއޮތް” ކަމެއް ކަމަށް ވެސް އޭނާ ވިދާޅުވި އެވެ.
ވީނުވީއެއް ނޭނގި ރިލްވާން ގެއްލިފައިވާއިރު، އޭނާގެ އާއިލާ އާއި މިނިވަން ނިއުސް އިން ވެސް ބުނެފައި ވަނީ ފަހަކަށް އައިސް ރިލްވާނަށް ވަރަށް ބޮޑެތި އިންޒާރުތަކާއި ޕްރެޝަރު އައިސްފައިވާ ކަމުގެ މައުލޫމާތު ލިބޭ ކަމަށެވެ. އޭނާ އެންމެ ފަހުން ފެނިފައި ވަނީ އޮގަސްޓު އަށް ވަނަ ދުވަހުގެ ރޭ 12:55 ގައި ހުޅުމާލެ ފެރީ ޓާމިނަލުންނެވެ.