September 17, 2014

މިނިވަން ނިއުސްގެ ޖާނަލިސްޓް، އަހުމަދު ރިލްވާން ހޯދުމަށް ފުލުހުން އެކަށީގެންވާ ތަހުގީގެއް ހިންގާ ކަމަކަށް ގަބޫލު ނުކުރެއްވޭ ކަމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

މިދިޔަ މަހުގެ ހަތް ވަނަ ދުވަހުން ފެށިގެން ގެއްލިގެން ހޯދަމުންދާ ރިލްވާންގެ އާއިލާއާ ބައްދަލުކުރެއްވުމަށް ފަހު، ރާއްޖެ ޓީވީ އަށް ނަޝީދު ވިދާޅުވީ ރިލްވާން ގެއްލުނުތާ މަހަކަށްވުރެ ގިނަ ދުވަސްވެފައިވާއިރު، އެއްވެސް މައުލޫމާތެއް މިހާތަނަށް އެނގިފައި ނުވުމަކީ ކަންބޮޑުވާންޖެހޭ ކަމެއް ކަމަށެވެ. ރިލްވާން ހޯދުމަކީ ރައީސް އަބްދުﷲ ޔާމީން ހާއްސަ ކަމެއް ދެއްވައިގެން ބައްލަވާ މައްސަލައަކަށް ހައްދަވައި އެކަން ވީހާވެސް ގާތުން ބައްލަވައިދެއްވުމަށް ނަޝީދު އެދިވަޑައިގެންނެވި އެވެ.

އެމަނިކުފާނު ވިދާޅުވި ގޮތުގައި ރިލްވާން ހޯދަން ފުލުހުން އެކަށީގެންވާ މަސައްކަތްތަކެއް ކުރަމުން އަންނަ ކަމަށް އާއިލާއަކަށް ގަބޫލެއް ނުކުރެވެ އެވެ.

“އަޅުގަނޑުމެންނަކަށް ވެސް ނުފެނޭ ރަނގަޅު ތަހުގީގެއް ކުރައްވަމުން ގެންދަވާ ކަމަކަށް. އަޅުގަނޑު ދެކޭގޮތުގައި ދިވެހި ރާއްޖޭގެ ފުލުހުންނާއި ސިފައިންގެ މިފަދަ ތަހުގީގެއް ހިންގޭވަރުގެ ގާބިލްކަން ހުންނާނެ. އެ ބޭފުޅުންގެ ތަޖުރިބާ ވެސް ހުންނާނެ. އެ ފަންނީ އެހީތައް ވެސް އެ ބޭފުޅުންނަށް ލިބޭނެ،” އެމަނިކުފާނު ވިދާޅުވި އެވެ.

ނަޝީދު ވިދާޅުވީ ރިލްވާން ހޯދުމުގެ މަސައްކަތް ހުއްޓާނުލައި، ސަރުކާރާއި ސިޔާސީ ޕާޓީތަކާއި މީޑިއާ އާއި އެހެންވެސް ދާއިރާތަކުން އެކަމުގައި މަސައްކަތް ކުރަން ޖެހޭ ކަމަށެވެ.

ނަޝީދު މީގެ ކުރިން ކުރައްވާފައިވާ ޓްވީޓެއްގައި، ރިލްވާން ވަނީ ރަހީނުކޮށްފައި ކަމަށް ވަނީ ވިދާޅުވެފަ އެވެ.

އެމަނިކުފާނު ވިދާޅުވި ގޮތުގައި މީހުން ރަހީނުކުރުމާއި ތޫނު ހަތިޔާރު ބޭނުންކޮށްގެން މީހުންނަށް އަނިޔާ ދިނުން ވެސް ރާއްޖޭގައި އަންނަނީ ދުވަހެއް ދުވަހަކަށް އިތުރުވަމުންނެވެ. އެގޮތުން ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު ޑރ. އަފްރާޝީމް އަލީ އަވަހާރަކޮށްލުމާއި، ހިލްއަތު ރަޝީދު ގަޔަށް ވަޅިހެރުން ފަދަ ގިނަ މައްސަލަތަކެއްގެ ސަބަބު ނޭނގޭ ކަމަށް ވެސް ނަޝީދު ވިދާޅުވި އެވެ.

ރިލްވާން އެންމެ ފަހުން ފެނުނީ މިދިޔަ މަހުގެ ހަތް ވަނަ ދުވަހުގެ ރޭ 12:55 ހާއިރު ހުޅުމާލެ ފެރީ ޓާމިނަލުންނެވެ. އޭގެ ފަހުން އޭނާގެ އެއްވެސް ހަބަރެއް ނުވާއިރު، އޭނާ ގެއްލުނީ ބޮޑެތި އިންޒާރުތަކެއް ލިބިފައި ވަނިކޮށެވެ.