September 8, 2014
މިދިޔަ މަހުގެ ހަތް ވަނަ ދުވަހުން ފެށިގެން ގެއްލިފައިވާ މިނިވަން ނިއުސްގެ ނޫސްވެރިޔާ އަހުމަދު ރިލްވާން ހޯދުމުގައި ސަރުކާރުން އިހުމާލުވެފައި ނުވާ ކަމަށް ކުރީގެ ރައީސް އަދި ޕީޕީއެމްގެ ރައީސް މައުމޫން އަބްދުލް ގައްޔޫމް މިރޭ ވިދާޅުވެއްޖެ އެވެ.
މި މަހުގެ 1-4 އަށް ސަމޮއާގައި ބޭއްވި ކުދި ޖަޒީރާތައް ތަރައްގީ ކުރުމާ ބެހޭ ބައްދަލުވުމަށް ފަހު މާލެވަޑައިގެން އިބްރާހިމް ނާސިރު އިންޓަނޭޝަނަލް އެއާޕޯޓުގައި ބޭއްވި ނިއުސް ކޮންފަރެންސްގައި ނޫސްވެރިއަކު ދެންނެވި ސުވާލަކާ ގުޅިގެން މައުމޫން ވިދާޅުވީ ރިލްވާން ހޯދުމަށް ސަރުކާރުން މަސައްކަތް ކުރަމުން އަންނަ ކަމަށެވެ. އެކަމުގައި ސަރުކާރުން އިހުމާލުވެފައ ނުވާ ކަމަށް ވެސް އެމަނިކުފާނު ވިދާޅުވި އެވެ.
ކުރީގެ ރައީސް މައުމޫން މިރޭ ނޫސްވެރިންނާ ވާހަކަފުޅު ދައްކަވަނީ.—ހަވީރު ފޮޓޯ: ނިޝާން އަލީ
ކުރީގެ ރައީސް މައުމޫން މިރޭ ނޫސްވެރިންނާ ވާހަކަފުޅު ދައްކަވަނީ.—ހަވީރު ފޮޓޯ: ނިޝާން އަލީ
“[ރިލްވާން ހޯދަން[ ސަރުކާރުން ވަރަށް ބާރަށް މަސައްކަތް ކުރަމުން އަންނަނީ. އިރާދަކުރެއްވިޔާ އަޅުގަނޑުމެންނަށް ވީ އެންމެ އަވަހަކަށް އެ މައްސަލަ ހައްލުވެ، އޭނާ ގަދަވެ ސަލާމަތުން ހުއްޓާ ފެނުމަށް އެދެން،” މައުމޫން ވިދާޅުވި އެވެ.
އެ މަނިކުފާނު ވިދާޅުވީ ރިލްވާން ގެއްލުނު މައްސަލަ ޕީޕީއެމް އިން ވަރަށް ގާތުން ބަލަމުން އަންނަ ކަމަށެވެ. ރިލްވާން ގެއްލުނު މައްސަަލާގައި ކަންބޮޑުވުންފާޅުކޮށް އެ ޕާޓީން ނޫސް ބަޔާނެއް ނެރެފައިވާނެ ކަމަށް ވެސް މައުމޫން ވިދާޅުވި އެވެ.
ކުރީގެ ރައީސް މައުމޫން މިރޭ ނޫސްވެރިންނާ ބައްދަލުކުރައްވަނީ.—ހަވީރު ފޮޓޯ: ނިޝާން އަލީ
ކުރީގެ ރައީސް މައުމޫން މިރޭ ނޫސްވެރިންނާ ބައްދަލުކުރައްވަނީ.—ހަވީރު ފޮޓޯ: ނިޝާން އަލީ
ރިލްވާން ހޯދަން ސަރުކާރުން އިހުމާލުވެފައި ނުވާ ކަމަށް މައުމޫން ވިދާޅުވި ނަމަވެސް އޭނާ ހޯދަން ފުލުހުންނާއި ސަރުކާރުން ވެސް އެކަށީގެންވާ މަސައްކަތްތަކެއް ކުރަމުން އަންނަ ކަމަށް ގަބޫލު ނުކުރާ ކަމަށް ރިލްވާންގެ އާއިލާ އިން ވަނީ ބުނެފަ އެވެ.
ރިލްވާން ގެއްލުނީ ބޮޑެތި އިންޒާރުތަކެއް ލިބިފައި ވަނިކޮށެވެ. އަދި ރިލްވާން ގެއްލުނު ރޭ އޭނާ ދިރިއުޅޭ އެޕާޓްމެންޓްގެ ކައިރިން ގަދަކަމުން މީހަކު ކާރަކަށް އަރުވައިގެން ގެންދިޔަ ކަމަށް ބުނާ މައްސަލައެއް ފުލުހުން އަންނަނީ ބަލަމުންނެވެ. އޭނާ އެންމެ ފަހުން ފެނުނީ ހުޅުމާލެ އަށް ދާން ފެރީ ޓާމިނަލްގައި ހުއްޓަ އެވެ.