September 5, 2014

ވީނުވީ ނޭނގި ގެއްލިފައިވާ މިނިވަންނޫހުގެ ނޫސްވެރިޔާ އަހްމަދު ރިލްވާން ހޯދަން ކުރާ މަސައްކަތުގައި ނަގާފައިވާ ބައެއް ސާމްޕަލްތަކުގެ އިތުރަށް ތަހުލީލުތައް ކުރަން ރާއްޖެއިން ބޭރަށް ފޮނުވުމުގެ މަސައްކަތް ފަށައިފި އެވެ.

ފުލުހުން ރޭ ބުނީ މި މައްސަލައިގައި ރިލްވާނާ ގުޅުން ހުރިކަމަށް ތަހުގީގަށް ބެލެވޭ އެއްވެސް ނިޝާނެއް ފެނޭތޯ ހުޅުމާލޭގެ ފަޅުތެރެއާއި ހުޅުމާލޭ ކައިރި ސަރަހައްދުތަކުގެ 521 މިނިޓްގެ ޑައިވް ކޮށް 267197.5 އަކަމީޓަރުގެ މޫދުގެ ސަރަހައްދެއް ބަލާފައިވާ ކަމަށާއި ހުޅުމާލޭ ފަޅުގެ ސަރަހައްދުގައި އަޅާފައި އޮތް ސަފާރީތަކާއި އޮޑިދޯނިފަހަރު ބަލައި ފާސްކޮށް ކުރި އިރު މައްސަލައާ ގުޅިގެން 18 އުޅަނދެއް ވެސް ބަލާފައިވާ ކަމަށެވެ. މީގެ އިތުރުން މި މައްސަލައިގައި މިހާތަނަށް ބަލައިފާސްކޮށް މާއްދީ ހެކި ހޯދަން ނަގާފައިވާ ސާމްޕަލްތައް ރާއްޖެއިން ބޭރުގައި ތަހުލީލް ކުރާނެ ކަމަށާއި ކޯޓް އަމުރެއްގެ ދަށުން ދެ ކާރެއް ފުލުހުންގެ ބެލުމުގެ ދަށަށް ގެންގޮސް ސާންޕަލްތައް ތަހުލީލު ކުރަން ފޮރެންސިކް ޑިޕާޓްމަންޓަށް ފޮނުވާފައިވާ ކަމަށް ވެސް ބުންޏެވެ.

ރިލްވާން ހޯދަނމް މާލޭގެ އަށް ގެއެއް ފާސްކޮށް ހުޅުމާލޭގެ ގޭގެއާއި ގުދަންތަކާއި ގަރާޖްތައް ހިމެނޭގޮތަށް 139 އަށް ވުރެ ގިނަ ތަން ބަލައި ފާސްކޮށް ހުޅުމާލޭގެ ބީޗް ސަރަހައްދާއި ހުސްބިންތަކާއި، ވަށައިގެންވާ މޫދުގެ ސަރަހައްދު އަދި ކަނޑުގެ ސަރަހައްދުތައް ޑައިވްކޮށްފައިވާ ކަމަށާއި ފަރުކޮޅުފުށީގެ ހުރިހާ ސަރަހައްދެއް ތަކުރާރުކޮށް ބަލާފައިވާ ކަމަށެވެ. މީގެ އިތުރުން ވިލިމާލާގެ ހުސްބިން ހިމެނޭ ބައެއް ސަރަހައްދު ތަކާއި ގޮނޑުދޮށާއި ހަތަރު ގެއެއް ފާސްކޮށް ބައެއް ރަށްރަށުގެ ގެސްޓްހައުސްތަކާއި ގެތައް ވެސް ބަލާފައިވާ ކަމަށެވެ.

ފުލުހުން ބުނީ މިމައްސަލައިގެ ތަހުގީގަށް ހާޒިރުކުރަން ބޭނުންވާ ހަތަރު މީހަކު ރާއްޖެއިން ބޭރަށް ނުދެވޭގޮތަށް ފުރުން މަނާކޮށް ރިލްވާން ދަތުރުކޮށްފައިވާކަމަށް ބެލެވޭ މަގުތަކުގައި ހުރި ސެލް ޓަވަރުތަކަށް ހިޓްވެފައިވާ 638000 އަށްވުރެ ގިނަ ފޯނުނަންބަރުތައް ވެސް އެނަލައިޒް ކުރަމުން އަންނަ ކަމަށާއި މިހާތަނަށް 111 މީހުންނާ ސުވާލުކޮށް ބަޔާން ނެގިފައިވާއިރު 318 މީހަކާ ސުވާލުކޮށް މައުލޫމާތު ހޯދައި ހުޅުމާލޭގައި މީހުން ދިރިއުޅޭ 77 އެޕަޓްމަންޓަށް ގޮސް އެތަންތަނުގައި ދިރިއުޅޭ މީހުންނާ ސުވާލުކުރެވި މަޢުލޫމާތު އެއްކޮށްފައިވާ ކަމަށެވެ