September 28, 2014
މިނިވަން ނިއުސްގެ ނޫސްވެރިޔާ އަހުމަދު ރިލްވާން ގެއްލުނު މައްސަލައިގެ ތުހުމަތަށް ތިން މީހަކު ހައްޔަރުކޮށް އެ މީހުންގެ ބަންދުގެ މުއްދަތު ކްރިމިނަލް ކޯޓުން މިއަދު ޖަހައިފި އެވެ.
ފުލުހުން ބުނި ގޮތުގައި އެ ތިން މީހުންގެ ތެރެއިން ދެ މީހެއްގެ ބަންދުގެ މުއްދަތަށް މިއަދު ވަނީ ފަސް ދުވަސް ޖަހައިފަ އެވެ. އަދި އަނެއް މީހާގެ ބަންދުގެ މުއްދަތަށް ހަތް ދުވަސް ޖަހައިދީފައިވާ ކަމަށް ފުލުހުން ބުންޏެވެ.
އެހެން ނަމަވެސް އެ ތިން މީހުންނާ ގުޅޭ އެއްވެސް މައުލޫމާތެއް ފުލުހުން ހާމައެއް ނުކުރެ އެވެ.
ރިލްވާން ގެއްލުނުތާ މަހަކަށް ވުރެ ގިނަ ދުވަސްވެފައިވާއިރު ފުލުހުން ބުނެފައި ވަނީ ހާއްސަ މައްސަލައެއްގެ ގޮތުގައި އެކަން ބަލަމުން އަންނަ ކަމަށެވެ. އެންމެ ފަހުން ފުލުހުން ބުނީ ރިލްވާން ހޯދުމުގެ މަސައްކަތް ކިތަންމެ ގިނަ ދުވަސްތަކަކަށް ދިގުލައިގެން ދިޔަސް، ހަގީގަތާ ހަމައަށް ވާސިލް ވުމަށް ކުރެވެން ހުރި ހުރިހާ މަސައްކަތެއް، ފޫހިކަމެއް ނެތި ފުލުހުން ކުރަމުންދާނެ ކަމުގެ ޔަގީންކަން ރިލްވާންގެ އާއިލާ އަށް ދޭ ކަމަށެވެ.
ރިލްވާން ހޯދުން ދިގުލާތީ އާއިލާ އަދި އެހެން އެތައް ބަޔަކު ދަނީ ކަންބޮޑުވުން ފާޅުކުރަމުންނެވެ.