September 18, 2014
މިނިވަން ނިއުސްގެ ނޫސްވެރިޔާ، އަހުމަދު ރިލްވާން ހޯދުން ލަސްވަމުންދާތީ އާއި އެ މައްސަލާގައި ހުރި ކަންބޮޑުވުންތައް ފާޅުކުރުމަށް ހުކުރު ދުވަހު ހިނގާލުމެއް ބާއްވަން ނިންމައިފި އެވެ.
މިނިވަން ނިއުސްގެ ޑެޕިއުޓީ އެޑިޓަރު ޒަހީނާ ރަޝީދު ވިދާޅުވީ “ސުވާލު މާޗު”ގެ ނަމުގައި ބާއްވާ ހިނގާލުމަކީ ރިލްވާން ގެއްލުނުތާ 40 އަށް ވުރެ ގިނަ ދުވަސް ވެގެންދިޔަ އިރު ވެސް ޖަވާބު ނުލިބޭ ގިނަ ސުވާލުތަކެއް ހުރުމުންނާއި ފުލުހުން ކުރަމުންދާ ތަހުގީގު އަވަސްކުރުމަށް ބާރު އެޅުމަށް ގޮވާލުމަށް ބާއްވާ ހިނގާލުމެއް ކަމަށެވެ. މި ހިނގާލުމުގައި ވީހާ ވެސް ގިނަ ނޫސްވެރިންނާއި އާންމުން ބައިވެރިވުމަށް އާއިލާ އާއި މިކަން އިންތިޒާމްކުރާ ފަރާތްތަކުން އެދޭ ކަމަށް އޭނާ ވިދާޅުވި އެވެ.
“މިއަދަށް 41 ދުވަސްވީ އިރު ވެސް ފުލުހުން ސާފުކޮށްދީފައެއް ނުވޭ. އާއިލާ އާއި އަދި މި މަސައްކަތުގައި އުޅޭ އެންމެން ވެސް ބަރޯސާ މި ވަނީ ފުލުހުންނަށް. ނަމަވެސް މިހާތަނަށް ވެސް ރިލްވާން ގެއްލުވައިލީތޯ ނުވަތަ ގެއްލުނީތޯ އުފެދޭ ސުވާލަށް ވެސް ޖަވާބެއް ލިބިފައެއް ނުވޭ. އެފަދަ އެތައް ކަންބޮޑުވުންތަކެއް އެބަހުރި. ހިނގާލުމުގެ ބޭނުމަކީ އެ ކަންބޮޑުވުންތައް ފާޅުކުރުން،” ޒަހީނާ ވިދާޅުވި އެވެ.
އޭނާ ވިދާޅުވި ގޮތުގައި ފާއިތުވި އަހަރުތަކުގައި ތަފާތު އެކި ހަމަލާތަކުން 30 އަށް ވުރެ ގިނަ މީހުން މަރުވެފައިވާ އިރު އެ މައްސަލަތަކަށް ވެސް އެކަށީގެންވާ ގޮތެއްގައި އިންސާފު ލިބިފައެއް ނުވެ އެވެ. އަދި އެފަދަ ގިނަ މައްސަލަތަކުގެ ފައިލް ބަންދުކޮށްފައި ހުރީ އެކަށީގެންވާ ހެކި ނުލިބޭތީ ކުރިއަށް ގެންދެވެން ނެތިގެން ކަމަށް ބުނެފައި ކަމަށް ވެސް އޭނާ ވިދާޅުވި އެވެ.
“ކޯޓު މަރުހަލާގައި ދިގު ދެމިގެން ދިއުމުން ހެކިން ހަނދާން ނެތެނީ ކަމަށް ބުނުމާއި މިފަދަ އެތައް ކަމަކާ ހުރެ އިންސާފު ލިބިފައެއް ނުވޭ. އެ މައްސަލަތައް އެ ގޮތުގައި އޮއްވައި ރިލްވާން މި ގެއްލުނީ. އެކަން ތަހުގީގުނުކުރެވޭހާ ހިނދަކު އެހެން މީހަކު ގެއްލެވާލުމުގެ ބިރު އޮންނާނެ. ގެއްލުވާލުމުގެ ސަގާފަތެއް އުފެދުމުގެ ބިރު މި ވަނީ ބޮޑުވެފައި،” ޒަހީނާ ވިދާޅުވި އެވެ.
މި ހިނގާލުން ފެށުމަށް ހަމަޖައްސާފައި ވަނީ ހުކުރު ދުވަހު ހަވީރު 4:00 ގައި އާޓިފިޝަލް ބީޗުންނެވެ. މާލޭގެ ބޮޑެތި މަގުތަކުގައި މި ހިނގާލުން ކުރިއަށްދާ އެވެ.
ރިލްވާން ހޯދުމަށް ކުރިއަށް ގެންދާ ތަހުގީގުގައި ފުލުހުންގެ އިހުމާލެއް އޮތްތޯ ބަލައިދިނުމަށް ރިލްވާންގެ އާއިލާ އިން މިދިޔަ އަންގާރަ ދުވަހު ވަނީ ޕޮލިސް އިންޓެގްރިޓީ ކޮމިޝަން (ޕީއައިސީ) އަށް ހުށަހަޅައިފަ އެވެ.