September 10, 2014

ނޫސްވެރިޔާ އަހްމަދު ރިލްވާން ގެއްލިފައިވާ މައްސަލައާއި މެދު ކަންބޮޑުވެވަޑައިގަންނަވާ ކަމަށް އިގިރޭސިވިލާތުގެ ފޮރިން އެންޑް ކޮމަންވެލްތް އޮފީހުގެ ސްޓޭޓް މިނިސްޓަރު ހޫގޯ ސްވަޔާ ވިދާޅުވެއްޖެ އެވެ.

މިނިސްޓަރު ސްވަޔާ މިހެން ވިދާޅުވީ އިގިރޭސިވިލާތުގެ ޕާލިމެންޓް މެންބަރެއް ކަމަށްވާ ކަރެން ލަމްލީ ކުރެއްވި ސުވާލަށް ޖަވާބު ދެއްވަމުންނެވެ.

އޭނާ އިތުރަށް ވިދާޅުވީ ރާއްޖޭގައި އިންސާނީ ހައްގުތައް ހަނިވެފައިވާ މިންވަރާމެދު ކަންބޮޑުވެ ވަޑައިގަންނަވާ ކަމަށާއި ރާއްޖޭގެ ސިޔާސީ ދާއިރާ އާއި ގުޅުންހުރި ފަރާތްތަކާއި ނޫސްވެރިންނަށް މަރުގެ އިންޒާރު އަންނަކަމީ ކަންބޮޑުވެ ވަޑައިގަންނަވާ ކަމެއް ކަމަށެވެ. މީގެ އިތުރުން، ފަރުދީ މިނިވަންކަމާއި ދީނީ މިނިވަންކަމުގެ އިތުރުން ގާނޫނީ މިނިވަންކަން ނެތުމުގެ މައްސަލައަށް ސްވަޔާ ވަނީ ވާހަކަފުޅު ދައްކަވާފަ އެވެ.

އަދި ވިދާޅުވީ ރިލްވާން ގެއްލުނު މައްސަލައިގައި ސްރީލަންކާގައި ހުންނަ އިގިރޭސިވިލާތުގެ އެމްބަސީ އިން ސަރުކާރާއި ވާހަކަދައްކާފައިވާނެ ކަމަށާއި މައްސަލައިގެ ތަހުގީގު ފުރިހަމައަށް ކުރިއަށް ގެންދިޔުމަށް ބާރު އަޅުއްވާފައިވެސް ވާނެ ކަމަށެވެ.