September 8, 2014

ރިލުވާން ގެއްލިގެން އުޅޭ މައްސަލަ ސަރުކާރުގެ ސަމާލުކަމަށް އިތުރަށް ގެނައުމަށްޓަކައި އިތުރު ކަންތައްތަކެއް ހިންގަން ނިންމާފައިވާ ކަމަށް ރިލުވާންގެ ބޭބެ މޫސާ ރިލްވާން ބުނެފިއެވެ. ރިލްވާން ގެ ބޭބެ މިހެން ބުނީ ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަމުންނެވެ. މޫސާ ރިލްވާން ބުނީ އެގޮތުން ސުލްހަވެރި ހިނގާލުމެއް ބާއްވަން ރާވަމުންދާ ކަމަށެވެ.

މި ހިނގާލުން ބޭއްވުމަށްޓަކައި ޖަމިއްޔާތަކާއި ވާހަކަ ދައްކަން ނިންމާފައިވާ ކަމަށާއި، އެތަންތަނަށް ސިޓީ ފޮނުވައިވާނެ ކަމަށް ރިލްވާންގެ ބޭބެ ބުންޏެވެ. އަދި އެތަންތަނުން ޖަވާބު ލިބުނުހާ އަވަހަކަށް އެހަރަކާތް ފަށާނެ ކަމަށް އޭނާ ބުންޏެވެ.

މި ހަރަކާތުގައި އަނިޔާ ލިބިފައިވާ ފަރާތްތަކާއި ޖަމިއްޔާތަކާއި އަދި ސިޔާސީ ޕާޓީތަކުން ވެސް ބޭނުންވާނަމަ ބައިވެރިވެވޭނެ ކަމަށް ރިލުވާންގެ ބޭބެ ބުންޏެވެ.

ރިލުވާން ގެއްލުނު ފަހުން އިއްޔެ އަށް 30 ދުވަސް ހަމަވެގެން ދިޔައިރު ރިލްވާން ހޯދުމުގެ މަސަތްކަތަށް މާ ބޮޑު ކުރިއެރުމެއް ލިބިފައި ނުވާ ކަމަށް ރިލުވާނުގެ އާއިލާއިން ބުނެ އެވެ.

ރޭ އޮތް ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަމުން ރިލުވާން ގެއްލިގެން އުޅޭ މައްސަލާގައި ތައްޔާރު ކުރި ޕެޓިޝަނަށް ސޮއި ހޯދުމަށް މަސައްކަތް ކުރި ޓީމުގެ މެންބަރު މާރިޔަތު މުހައްމަދު ބުނީ ޕެޓިޝަން ތައްޔާރު ކުރުމުގައި އާއްމުންގެ ފަރާތުން ވަރަށް ބޮޑު އެއްބާރުލުމެއް ލިބުނު ނަމަވެސް، ބައެއް މީހުންނަށް މި މައްސަލައިގެ ޚަބަރު ލިބިފައިނުވާ ކަމަށް ބުނުމުން އެކަމާއި ހައިރާންވި ކަމަށެވެ. އަދި އެއީ ވަރަށް ހާސްވާ ކަމެއް ކަމަށާއި، ގައުމުގައި މިވަރުގެ ބޮޑު ކަމެއް ހިނގައިގެން އުޅޭ އިރު ބައެއް ރައްޔިތުންނަށް މިކަން ނޭގެންވީ ސަބަބާއި މެދު ސުވާލު އުފެދޭ ކަމަށް އޭނާ ބުންޏެވެ.

މާރިޔަތު ބުނީ ރިލުވާން ގެއްލުވާލަން ބަޔަކު ކުރި މި މަސައްކަތުގެ މަޤުސަދަކަށް ވާނީ ޒުވާނުންގެ އަޑު ކަނޑާލުމާއި ނޫސްވެރިންގެ އަޑު ކަނޑުވާލުން ކަމަށެވެ. ނަމަވެސް އެއާ ޚިލާފަށް ފެނިގެން ދަނީ ވަރަށް ގިނަ ޒުވާނުންތަކެއް އެކުވެގެން މިކަމާއި އަޑު އުފުލައި ރައްޔިތެއް ގެއްލުވާލުމަކީ ނުބައި ބިރުވެރި ކަމެއްކަން އެންގުމަށް ސަރުކާރަށް ގޮވާލަމުންދާ މަންޒަރު ކަމަށެވެ.