September 4, 2014
ގެއްލިގެން ހޯދަމުންދާ މިނިވަން ނޫހުގެ ނޫސްވެރިޔާ އަހްމަދު ރިލްވާން ހުރީ ރަހީނުކުރެވިފައި ކަމުގައި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރައީސް ނަޝީދު މިހެން ވިދާޅުވީ މިދިޔަ އަންގާރަ ދުވަހު އެމަނިކުފާނު ކުރައްވާފައިވާ ޓްވީޓެއްގަ އެވެ.
ނަޝީދުގެ ޓްވީޓުގައި ވިދާޅުވީ ރަހީނުކޮށްފައިވާ ނޫސްވެރިޔާއާ ގުޅޭގޮތުން ރައީސް އަބްދުﷲ ޔާމިން ބަސްފުޅެއް ވިދާޅުވުމަށް އެދިވަޑައިގަންނަވާ ކަމަށެވެ. އަދި މިމައްސަލައިގެ ތަހުގީގު ކުރިއަށް ގޮސްފައިވާ މިންވަރު އޮޅުންފިލުއްވައިދެއްވުމަށް ވެސް ނަޝީދު ވަނީ އެދިވަޑައިގެންފަ އެވެ.
ގެއްލިގެން ހޯދާ ނޫސްވެރިޔާ ރަހީނުކުރެވިފައިވާ ކަމަށް ނަޝީދު ވިދާޅުވި ނަމަވެސް އެކަމުގެ އިތުރު އެއްވެސް މައުލޫމާތެއް އެމަނިކުފާނު ހިއްސާކުރައްވާފައެއް ނުވެ އެވެ.
ރައީސް ޔާމީން މިދިޔަ މަހު ޗައިނާއަށް ކުރެއްވި ރަސްމީ ދަތުރުފުޅަށްފަހު މާލެ ވަޑައިގެން އެއާޕޯޓުގައި ބޭއްވި ނޫސްވެރިންގެ ބައްދަލުވުމުގައި ގެއްލިގެން ހޯދާ ނޫސްވެރިޔާއާ ގުޅޭގޮތުން ނޫސްވެރިޔަކު ސުވާލު ދެންނެވުމުން ރައީސް ޔާމީން ވިދާޅުވީ “ނޫން ތިޔަކަށް ދެން އަޅުގަނޑު ބުނާނެ އެއްޗެއް ނޯންނާނެ ދެއްތޯ” ކަމަށެވެ.
އެހެން ނަމަވެސް އެ މައުލޫގައި ކުރުކުރުކޮށް ރައީސް ވާހަކަފުޅު ދެއްކެވި އެވެ. ވިދާޅުވީ އެފަދަ ކަންކަމުގައި މިހާތަނަށް އެއްޗެހި ބުނެފައި ހުންނާނީ ފުލުހުން ނުވަތަ ހޯމް މިނިސްޓްރީން ކަމަށެވެ.
“ނޫސްވެރިޔަކު ގެއްލުނީ، ދެން އަޅުގަނޑަށް ހީވަނީ ހޯދުމުގެ މަސައްކަތް ހިނގާނެހެން ދެއްތޯ؟ އެހެންވީމަ އެ މަސައްކަތް ހަމަ އިރާދަކުރެއްވިއްޔާ ކާމިޔާބުވެސް ވާނެ،” ރައީސް ވިދާޅުވި އެވެ.
ރައީސް ޔާމީންގެ މިވާހަކަތަކަށް ވެސް މީގެ ކުރިން ރައީސް ނަޝީދު ވަނީ ރައްދުދެއްވާފަ އެވެ. އެގޮތުން ރައީސް ނަޝީދު ވިދާޅުވީ ގެއްލިގެން ހޯދަމުންދާ ނޫސްވެރިޔާ އަހްމަދު ރިލްވާންގެ މައްސަލާގައި ރައީސް އަބްދުﷲ ޔާމީނަށް ވިދާޅުވާނެ އެއްޗެއް ނެތުމުން ދޭހަވަނީ ކަމެއް ފޮރުވަން އުޅެނީ ކަމުގައި ކަމަށެވެ.
“ރިލްވާން ގެއްލުމާއި ގުޅިގެން އެންމެ ފަރާތްތަކުން ކަންބޮޑުވުން ފާޅުކުރާއިރު ރައީސް ޔާމީން ވިދާޅުވާނެ އެއްޗެއް ނެތުމުން ދޭހަވަނީ މިކަން ފޮރުއްވަވާ ކަމަށް،” ރައީސް ޔާމީނަށް ފާޑު ވިދާޅުވަމުން ނަޝީދު ވިދާޅުވެފައިވެ އެވެ.
ރިލްވާން ގެއްލުނު މައްސަލާގައި އޭނާގެ އާއިލާ އިން ކުރަމުންދާ މަސައްކަތްތަކުގައި އެމްޑީޕީން ފުރިހަމައަށް އެއްބާރުލުން ދޭނެ ކަމުގައި އެޕާޓީން ބުނެ އެވެ. އެގޮތުން އެމްޑީޕީގެ ޕާލިމެންޓްރީ ގުރޫޕުން ވަނީ ރިލްވާން މައްސަލަ ބެލުމަށާއި އެ މައްސަލައިގެ ތަހުގީގު ހިނގަމުންދާ ގޮތް ސާފުކުރުމަށް މަޖިލީހުގެ ހަތަރު ކޮމިޓީއަކަށް މައްސަލަ ހުށަހަޅާފަ އެވެ.
ރިލްވާން ގެއްލުނީ މިދިޔަ މަހުގެ ހަތްވަނަ ދުވަހުގެ ރެ އެވެ. އޭގެ ފަހުން އޭނާގެ އެއްވެސް މައުލޫމާތެއް ލިބިފައި ނުވާ ކަމަށް ރިލްވާންގެ އާއިލާ އިން ބުނެ އެވެ.