August 17, 2014

މިނިވަން ނޫހުގެ ރިޕޯޓަރ އަޙުމަދު ރިޟުވާން ޢަބްދުﷲ ގެއްލުނު ފަހުން އެއްހަފުތާ ފާއިތުވެ ގޮސްފައިވާއިރު، އެ މައްސަލަ ތަޙުޤީޤުކުރުމަށް ފުލުހުން މާބޮޑު ސަމާލުކަމެއްދޭތަން ނުފެންނަކަމަށާއި އެކަމާ ކަންބޮޑުވާ ކަމަށް އިދިކޮޅު ޕާޓީ އެމްޑީޕީން ބުނެފިއެވެ.

އެޕާޓީން ނެރެފައިވާ ބަޔާނެއްގައި ބުނެފައިވަނީ، ރިޟުވާން މީގެ އެއް ހަފުތާ ކުރިން ވީނުވީ ތަނެއް ނޭގި ގެއްލިފައިވަނީ ނޫސްވެރިންނަށް ވަރަށް ފާޅުކަން ބޮޑުގޮތެއްގައި މަރުގެ އިންޒާރުތައް ދެމުން ދަނިކޮށް ކަމަށާއި، ރިޟްވާނަށްވެސް އެފަދަ އިންޒާރުތަކެއް ލިބެމުންގޮސްފައިވާ ކަމަށެވެ. އެހެންކަމުން އޭނާ ހޯދާ، އެ މައްސަލަ ތަޙުޤީޤުކުރުމުގެ މަސައްކަތް ސަރުކާރުން މިހާރަށްވުރެ ބޮޑަށް ސަމާލުކަމެއް ދީގެން ކުރުމަށް އެޕާޓީން ގޮވާލާކަމަށްވެސް ބުނެފައިވެއެވެ. މިކަމާ ގުޅިގެން އެމް.ބީ.ސީ ނިއުސްއަށް މައުލޫމާތުދެއްވަމުން ފުލުހުންގެ މީޑިއާ އޮފިޝަލް ވިދާޅުވީ، ރިޟްވާން ހޯދުމުގެ މަސައްކަތް ހާއްސަ ސަމާލުކަމެއް ދީގެން ކުރަމުންދާ ކަމަށާއި، ފުލުހުންގެ ތަޙްޤީޤަށް މިހާތަނަށް ފާހަގަވެފައިވާ ކަންތައްތައް ވަރަށް އަވަހަށް މީޑިއާއަށް ހިއްސާކުރާނެ ކަމަށެވެ.

މި މައްސަލައާ ގުޅިގެން ހިއުމަން ރައިޓްސް ކޮމިޝަނުންވެސް ވަނީ، ކަންބޮޑުވުން ފާޅުކޮށް ނޫސްބަޔާނެއް ނެރެފައެވެ. އެޗް.އާރް.ސީ.އެމްގެ ނޫސްބަޔާނުގައި، މިހާރަކަށް އައިސް ނޫސްވެރިންނަށް މަރުގެ އިންޒާރާއި އެހެނިހެންވެސް ބިރުވެރިކަމާއި، ހިތްނުތަނަވަސްކަން ކުރިމަތިވާފަދަ އިންޒާރުތައް ދެމުންގެންދާ ކަމުގެ މައުލޫމާތު އެކޮމިޝަނަށްވެސް ލިބިފައިވާކަން ހާމަކޮށްފައިވެއެވެ. އަދި ނޫސްވެރިކަމާއި ޚިޔާލު ފާޅުކުރުމުގެ މިނިވަންކަން ކަށަވަރުވެފައި އޮތުމަށްޓަކައި ނޫސްވެރިންގެ ރައްކާތެރިކަމަކީ ދައުލަތުން ޔަޤީންކުރަން ޖެހޭކަމެއްކަމަށާއި، މިފަދަ މައްސަލަތަކުގައި ދައުލަތުން އަމަލުކުރަމުންގެންދާ ގޮތް މޮނިޓަރކޮށް، މިކަންކަމުގެ މައުލޫމާތު އދ.ގެ ސްޕެޝަލް ޕްރޮސީޖަރޒްގެ ސަމާލުކަމަށް ގެނެސްފައިވާކަމަށްވެސް އެޗް.އާރް.ސީ.އެމްގެ ބަޔާނުގައި ހާމަކޮށްފައިވެއެވެ.

ރިޟްވާން ގެއްލިގެން އާއިލާގެ ފަރާތުން ރިޕޯޓްކޮށްފައިވަނީ މިމަހުގެ 13 ވަނަ ދުވަހުއެވެ. މިމައްސަލަ ފުލުހުންނަށް ރިޕޯޓްކުރުމާ ގުޅިގެން އޭނާ ހޯދަމުންދާކަމަށާއި އެންމެ ފަހުން އޭނާ ފެނިފައިވަނީ މިއޮގަސްޓް މަހުގެ 7 ވަނަ ދުވަހުގެ ރޭ ހުޅުމާލެ-މާލެ ފެރީން ހުޅުމާލެއަށް ފައިބަނިކޮށް ކަމަށް ފުލުހުން މައުލޫމާތުދެއެވެ.