August 21, 2014

މިނިވަން ނިއުސްގެ ޖާނަލިސްޓް އަހުމަދު ރިލްވާން ގެއްލުނު މައްސަލައާ ގުޅޭގޮތުން، ކަށަވަރުނުކުރެވޭ ތަފާތު ވާހަކަތައް ފަތުރައި އެ މައްސަލަ ސިޔާސީ ނުކުރުމަށް ފުލުހުން މިއަދު އެދެފި އެވެ.

ރިލްވާން ގެއްލުނު މައްސަލައާ ގުޅޭގޮތުން ފުލުހުން ނެރުނު ނޫސް ބަޔާނެއްގައި ބުނީ ފުލުހުންގެ ހުރިހާ ވަސީލަތެއް ބޭނުންކޮށްގެން އޭނާ ހޯދުމުގެ މަސައްކަތް މިހާރު ކުރަމުން އަންނަ ކަމަށެވެ. އެ ތަހުގީގު ކުރިއަށް ގެންދަނިކޮށް، އެހެން މައްސަލަތަކެކޭ އެއްގޮތަށް މި މައްސަލަ ވެސް ސިޔާސީކޮށް، ތަހުގީގުކުރުމުގެ ނަމުގައި މަސައްކަތްކޮށް ކަށަވަރު ނުކުރެވޭ މައުލޫމާތުތައް ހާމަކުރުމަކީ ތަހުގީގާއި އޭނާ ހޯދަން ކުރާ މަސައްކަތަށް ހުރަސްއެޅޭނެ ކަމެއް ކަމަށް ފުލުހުން ބުންޏެވެ.

“ރިލްވާން އަބްދުﷲ، )28އ(، ވީނުވީތަނެއް ނޭނގި ގެއްލިފައިވާ މައްސަލައާ ގުޅިގެން ލިބޭ ހުރިހާ މަޢުލޫމާތެއް ފުލުހުންނާ ހިއްސާކޮށް މި މަސައްކަތުގައި ރައްޔިތުންގެ ފުރިހަމަ އެއްބާރުލުން ފުލުހުންގެ ތަހުގީގަށް ދެއްވުމަށް މިފުރުސަތުގައި ވެސް އިލްތިމާސް ކުރަމެވެ،” ފުލުހުންގެ ބަޔާނުގައިވެ އެވެ.

ފުލުހުން ބުނިގޮތުގައި ރިލްވާން ހޯދުމަށް އެ މުއައްސަސާ އިން އަންނަނީ ހާއްސަ މަސައްކަތްތަކެއް ކުރަމުންނެވެ. އެގޮތުން ތަހުގީގަށް ހާއްސަ ޓީމެއް އެކުލަވާލައި ހޯދަން ޖެހޭ ހޯދުންތައް ހޯދައި ބަލައި ފާސްކުރަން ޖެހޭ ތަންތަން ވެސް ފާސްކުރަމުން އަންނަ ކަމަށް އެ ބަޔާނުގައިވެ އެވެ.

“ދިރާސާ ކުރަންޖެހޭ ސީސީޓީވީ ފުޓޭޖާއި އެހެނިހެން ތަކެތި މި ދަނީ ދިރާސާކުރަމުންނެވެ. މިކަމާ ގުޅިގެން އަޅަންޖެހޭ ފިޔަވަޅުތައް އަޅައި، އޭނާ ހޯދުމަށާއި ފުރިހަމަ ތަހުގީގެއް ކުރުމަށް ކުރަންޖެހޭ މަސައްކަތް ފުލުހުންގެ ހުރިހާ ވަސީލަތެއް ބޭނުންކޮށްގެން މި ދަނީ ކުރަމުންނެވެ. އެފަދަ މަސައްކަތްތަކުގެ ތަފްސީލްތަކަކީ މިފަދަ ނާޒުކު މައްސަލައެއްގައި ރައްޔިތުންނާ ހިއްސާކުރެވޭނެ މައުލޫމާތުތަކެއް ނޫނެވެ،” އެ ބަޔާނުގައިވެ އެވެ.

ފުލުހުން ބުނީ ރިލްވާން ހޯދަން ކުރާ މަސައްކަތުގެ ހަގީގަތެއް އަދި ކުޑަބޮޑުމިނެއް ނުބަލައި ސިޔާސީ ފަރާތްތަކުންނާއި ބައެއް މީޑިއާތަކުން ދަނީ ފުލުހުންގެ މަސައްކަތާ ދޭތެރޭ ރައްޔިތުންގެ ހިތުގައި ކަންބޮޑުވުން އުފެދޭގޮތަށް ވާހަކަ ދައްކަމުން ކަމަށެވެ. ފުލުހުންނަކީ ކުށްތައް ތަހުގީގުކޮށް، ޕްރޮސިކިއުޓާ ޖެނެރަލަށް ފޮނުވުމުގެ އިތުރުން ރައްޔިތުންގެ މަސްލަހަތު ހިފަހައްޓައި އަމާން ވެއްޓެއް ގާއިމްކުރަން ތިބޭ ބައެއް ކަމަށް ވެސް ބަޔާނުގައި ފާހަގަކޮށްފައިވެ އެވެ.

މީޑިއާތަކަށް ކުރިމަތިވި މައްސަލަތަކުގައި ވެސް ފުލުހުން ތަހުގީގު ކުރިއަށް ގެންގޮސް އަޅަން ޖެހޭ ފިޔަވަޅު އަޅާފައިވާ ކަން ފާހަގަކޮށް ފުލުހުން ބުނީ އަޅާ ކޮންމެ ފިޔަވަޅަކާއި ކުރާ ކޮންމެ މަސައްކަތެއްގެ ތަފްސީލު ހާމަނުކުރި ނަމަވެސް އަންގަން ޖެހޭ ފަރާތްތަކަށް އަންގަމުންދާ ކަމަށެވެ. ހާއްސަކޮށް ރާއްޖޭގެ މިނިވަން ނޫސްވެރިކަން ހިމާޔަތްކޮށް، ދަމަހައްޓައި މީޑިއާތަކަށް ދޭ ގެއްލުން ކުޑަކުރުމަށް ކުރަން ޖެހޭ މަސައްކަތް ކުރަމުން އަންނަ ކަމަށް ވެސް ފުލުހުން ބުންޏެވެ.

މި މަހުގެ ހަތް ވަނަ ދުވަހުގެ ރެއިން ފެށިގެން ރިލްވާން ގެއްލިފައިވާ އިރު އޭނާ އެންމެ ފަހުން ފެނިފައި ވަނީ ހުޅުމާލޭ ފެރީ ޓާމިނަލަށް ވަންނަނިކޮށް އެރޭ 12:45ގަ އެވެ. އެއީ ޓާމިނަލްގެ ސީސީޓީވީ ފުޓޭޖުންނެވެ. އޭނާ ހޯދުމުގެ މަސައްކަތް ފުޅާކޮށް މިހާރު އަންނަނީ ހުޅުމާލޭގެ ކަނޑުގެ ސަރަހައްދު ވެސް ބަލަމުންނެވެ.