August 17, 2014
މި މަހުގެ ހަތް ވަނަ ދުވަހުގެ ރެއިން ފެށިގެން ގެއްލިފައިވާ މިނިވަން ނިއުސްގެ ނޫސްވެރިޔާ އަހްމަދު ރިލްވާން އަބްދުﷲގެ ފޯންގެ ސިގްނަލް އެންމެ ފަހުން ލިބިފައި ވަނީ މާލޭގެ ސަރަހައްދަކުން ކަމަށާއި އެ ރޭ އޭނާ ހުޅުމާލެ ފެރީ އަށް އެރިކަން އަދި ކަށަވަރު ނުވާ ކަމަށް ފުލުހުން މިރޭ ބުނެފި އެވެ.
މަރުގެ އިންޒާރުތައް ވެސް ލިބިފައިވަނިކޮށް، ގެއްލުނު އުމުރުން 28 އަހަރުގެ ރިލްވާނުގެ ތަހްގީގާ ގުޅޭ ގޮތުން ފުލުހުން ބޭއްވި ފުރަތަމަ ޕްރެސް ކޮންފަރެންސްގައި، ސީރިއަސް އެންޑް އޯގަނައިޒް ކްރައިމް ޑިޕާޓްމެންޓްގެ ހެޑް، ޗީފް އިންސްޕެކްޓަރު އަބްދުﷲ ޝަތީހު ވިދާޅުވި ގޮތުގައި ރިލްވާންގެ ފޯންގެ ސިގްނަލް އެންމެ ފަހުން ލިބުނީ ހަތް ވަނަ ދުވަހުގެ ރޭ މެންދަމު 2:30 ގައި ހެންވޭރުގެ ސަރަހައްދަކުންނެވެ. އަދި އެންމެ ފަހުން ފޯން ކޯލެއް ކޮށްފައިވަނީ އެރޭ 10:19 ގައި ކަމަށް ވެސް އޭނާ ވިދާޅުވި އެވެ. ނަމަވެސް އެ ކޯލްކޮށްފައި ވަނީ ކާކަށް ކަމެއް ފުލުހުން ނުބުނެ އެވެ.
އުރީދޫގެ ހިދުމަތް ބޭނުންކުރާ ރިލްވާނުގެ ފޯނުގެ މައުލޫމާތުގެ އިތުރުން އޭނާ އަށް ވީ ގޮތެއް ބެލުމަށްޓަކައި މާލޭގައި ހުރި ސީސީޓީވީ ކެމެރާތަކުގެ ފުޓޭޖްތައް ދިރާސާކުރަމުން ގެންދާ ކަމަށް ޝަތީހު ވިދާޅުވި އެވެ. މި ހާދިސާގެ ސަބަބުން ރައްޔިތުން ވަރަށް ބޮޑަށް ކަންބޮޑުވެފައިވާ ކަމަށާއި އެހެންވެ، ތަހްގީގު ކުރިއަށް ގެންދިއުމަށްޓަކައި ރައްޔިތުންގެ އެއްބާރުލުން ވީހާ ވެސް ބޮޑަށް ދިނުމަށް އޭނާ އެދިވަޑައިގަތެވެ. އަދި އެގޮތަށް މައުލޫމާތު ހިއްސާކުރާ ފަރާތްތަކަށް ރައްކާތެރިކަން ދޭނެ ކަމަށް ޝަތީހު ވިދާޅުވި އެވެ.
ޝަތީހް ވިދާޅުވި ގޮތުގައި ރިލްވާންގެ ގެއްލުނު ކަމަށް ބުނާ ރޭގައި އޭނާގެ އާއިލާ މީހުންނާ ވެސް ބައްދަލުކުރި އެވެ. އޭރު ރިލްވާން ހުރީ މަޑު ފެހިކުލައިގެ ގަމީހެއް ލައިގެން ކަމަށް އާއިލާ އިން ބުނާ ކަމަށް އޭނާ ވިދާޅުވި އެވެ. ނަމަވެސް ވީޑިއޯ ފުޓޭޖުން ދައްކާއިރު، ރިލްވާން ހުންނަނީ ކަޅު ހެދުމެއްގަ އެވެ.
ފުލުހުން ބުނި ގޮތުގައި ރިލްވާން ގެއްލުނު މައްސަލައިގެ ތަހްގީގު ކުރިއަށް ގެންދަނީ ވަރަށް ހާއްސަ ސަމާލުކަމެއް ދީގެންނެވެ. ވަކި ކަމަކަށް ތުހްމަތުކުރުމުގެ ބަދަލުގައި މި ތަހްގީގު ކުރިއަށް ގެންދަނީ “ހުޅުވާލެވިގެން” ކަމަށް އޭނާ ވިދާޅުވި އެވެ.
“އަޅުގަނޑުގެ ވަކި ދިމާލަކަށް މުޅިން ފިކްސްކޮށްގެން ތަހުގީގު ކުރިއަށް ގެންދަނީ އަކީ ނޫން،” ރިލްވާން ގެއްލުމާ ގުޅިފައިވާ އެއްވެސް ސަބަބެއް އޮތްތޯ ސުވާލު ދެންނެވުމުން ޝަތީހް ވިދާޅުވި އެވެ.
މާލޭގައި ހުންނަ ހުޅުމާލޭ ފެރީގެ ޓާމިނަލަށް ރިލްވާން ވަދެފައިވާ ކަމަށް ވީޑިއޯ ފުޓޭޖްތަކުން ފެނުނު ނަމަވެސް، އޭނާ ފެރީ އަށް އެރި ކަމެއް އަދި ހުޅުމާލެ އަށް ފޭބިކަން ފުލުހުންނަށް ކަށަވަރެއް ނުކުރެވެ އެވެ. އެކަން ކަށަވަރުކުރުމަށްޓަކައި ހުޅުމާލޭގައި ހުންނަ އެމްޓީސީސީގެ ފެރީ ޓާމިނަލްގެ ސީސީޓީވީގެ ފުޓޭޖާއި މާލޭގެ ޓާމިނަލްގެ ފުޓޭޖްތައް ބަލަމުން އަންނަ ކަމަށް ޝަތީހު ވިދާޅުވި އެވެ.
މިނިވަން ނިއުސްއިން އާންމުކޮށްފައިވާ ފެރީ ޓާމިނަލްގެ ސީސީޓީވީ ފުޓޭޖުން ފެންނަ ގޮތުގައި ރިލްވާން ޓާމިނަލަށް ވަންނަނީ ހަަތް ވަނަ ދުވަހުގެ ރޭ ދަންވަރު 12:45 ގައެވެ.
މީގެ ދެތިން އަހަރު ކުރިން ފެށިގެން ރިލްވާނަކީ ހުޅުމާލޭގައި ކުއްޔަށް ދިރިއުޅެމުންދާ މީހެކެވެ. ސޯޝަލް މީޑިއާގައި “މޮޔަމީހާ” ގެ ނަމުން މަޝްހޫރުވެފައިވާ ރިލްވާނަކީ، ދީނީ ގޮތުން ހަރުކަށި ވިސްނުމުގެ “ޑޮޓް” ގްރޫޕްގައި ކުރިން އުޅުނު މީހެކެވެ. އޭނާ މިގެއްލުނީ މަރުގެ އިންޒާރުތައް ވެސް ލިބިފައިވަނިކޮށެވެ.