August 27, 2014

މިނިވަން ނިއުސްގެ ނޫސްވެރިޔާ އަހުމަދު ރިލްވާން އަބްދުﷲ ވަގަށް ނެގި ކަމަށް ތުހުމަތު ކުރޭ މައްސަލައިގައި ހޯމް މިނިސްޓަރު އުމަރު ނަސީރާއި ކޮމިޝަނަރު އޮފް ޕޮލިސް ހުސައިން ވަހީދު ގައުމީ ސަލާމަތާބެހޭ ކޮމެޓީއަށް ހާޒިރު ކޮށް މިރޭ އެކޮމެޓީގެ ބައްދަލުވުން ބޭއްވުމަށް ނިންމައިފި އެވެ.

ރައްޔިތުންގެ މަޖިލީހުގެ ގައުމީ ސަލާމަތުގެ ކޮމެޓީން އިއްޔެ ބޭއްވި ބައްދަލު ވުމުގައި ރިލްވާން ވަގަށް ނަގާފައިވާ ކަމަށް ތުހުމަތު ކުރެވޭ މައްސަލައާ ގުޅިގެން މައުލޫމާތު ސާފްކުރުމަށް އެ ކޮމިޓީއަށް ކޮމިޝަނަރު އޮފް ޕޮލިސް ހުސައިން ވަހީދާއި އެމައްސަލަ ތަހުގީގު ކުރާ ފުލުހުންގެ ޓީމާއި ހޯމް މިނިސްޓަރު ހާޒިރު ކުރުމަށް ހުށަހެޅުއްވީ ކިނބިދޫ ދާއިރާގެ މެންބަރު އަބުދުﷲ ރިޔާޒެވެ. ރިޔާޒުގެ އެ ހުށަހެޅުއްވުން ފާސް ކުރީ ކޮމިޓީއަށް ހާޒިރުވެ ތިއްބެވި މެންބަރުންގެ އިއްތިފާގުންނެވެ.

މިމައްސަލަ ގައުމީ ސަލާމަތާ ބެހޭ ކޮމިޓީގެ އިތުރުން ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީ އާއި ސަލާމަތީ ހިދުމަތްތަކާ ބެހޭ 241 ކޮމިޓީއަށް ވެސް އެމްޑީޕީން ވަނީ ހުށަހަޅައިފަ އެވެ.

ރާއްޖެއެމްވީއަށް މައުލޫމާތު ލިބިފައިވާ ގޮތުން ކްރިމިނަލް ކޯޓުގެ އަމުރެއްގެ ދަށުން 04 މީހެއްގެ ޕާސްޕޯޓް މިއަދު ވަނީ ހިފަހައްޓާފަ އެވެ. އެމީހުންނަކީ 20 އަހަރާއި 25 އަހަރާ ދެމެދުގެ 04 މީހުން ކަމަށްވެސް ރާއްޖެއެމްވީއަށް ވަނީ ކަށަވަރުވެފަ އެެވެ.