August 16, 2014
މި މަހު ހަތް ވަނަ ދުވަހުގެ ރެއިން ފެށިގެން ގެއްލިފައިވާ މިނިވަން ނިއުސްގެ ނޫސްވެރިޔާ އަހްމަދު ރިލްވާން އަބްދުﷲ ހޯދުމަށް ފުލުހުން މަސައްކަތް ކުރަމުންދާއިރު އާއިލާއިން ވެސް އޭނާ ހޯދުމުގެ މަސައްކަތްކުރަމުން އެބަ ދެ އެވެ.
ހުޅުމާލޭގައި ދިރިއުޅޭ އުމުރުން 28 އަހަރުގެ ރިލްވާން ފެނޭތޯ ބެލުމަށްޓަކައި އޭނާގެ އާއިލާ އާއި އެކުވެރިނާއެކު ގާތްގަނޑަކަށް 30 މީހުން، އިއްޔެ ހުޅުމާލެ އަށް ގޮސް އޭނާ ހޯދުމަށްޓަކައި މުޅި ހުޅުމާލެ ބެލި އެވެ. އަދި ޑްރޯން ބޭނުންކޮށްގެން ވެސް އޭނާ ފެނޭތޯ ބެލި އެވެ.
“އަޅުގަނޑުމެން އަދިވެސް އުއްމީދެއް ނުގެއްލޭ. އަޅުގަނޑުމެން އުއްމީދުކުރަން އޭނާ ސަލާމަތުން ހުއްޓައި ފެންނާނެ ކަމަށް،” ރިލްވާންގެ އެއްބަނޑު ދައްތަ ފާތުމަތު ޝެހެނާޒު ބުންޏެވެ.
އޭނާ ހޯދުމަށް އިއްޔެ މަސައްކަތް ކުރަމުންދަނިކޮށް އެ އާއިލާއަށް އިތުރު ކަންބޮޑުވުމެއް ވަނީ ގެނުވައިފަ އެވެ. އެއީ ރިލްވާން ހޯދުމުގެ މަސައްކަތް ހުއްޓާލުމަށް، ކާކުކަން ނޭނގޭ މީހަކު އެ އާއިލާގެ މީހެއްގެ ގާތު ބުނުމުންނެވެ.
ރިލްވާން ހޯދުމުގެ މަސައްކަތް ހުއްޓާލުމަށް ކާކުކަން ނޭނގޭ އެ މީހާ ބުނީ، ރިލްވާންގެ އެއްބަނޑު ބޭބެ، މުހައްމަދު އިނާޒު ގާތުގަ އެވެ. އޭނާ ބުނި ގޮތުގައި އެ ވާހަކަ އޭނާއާ ދިމާއަށް އެ މީހާ ބުނީ ހުޅުމާލޭގައި އަޅާފައިވާ ޗައިނާ ފްލެޓްތައް ކައިރީގައި ހުންނަ މިސްކިތުން އިއްޔެ ހަވީރު 5:00 ހާއިރު އޭނާ ފައިބަނިކޮށެވެ.
“އަޅުގަނޑު އަސުރު ނަމާދު ކޮށްލައިގެން ފައިބަނިކޮށް، މީހަކު އައިސް ކުއްލިއަކަށް އަޅުގަނޑުގެ ކުރިމައްޗަށް ހުއްޓި ބުނީ، ތިކަން ހުއްޓާލާފަ ގެއަށް ދާށޭ،” އިނާޒު ބުންޏެވެ.
“އެއީ ކާކުކަން ނަގައިގަނެވުމުގެ ކުރިން، ވަރަށް ހަލުއިކޮށް އެ މީހާ ހިނގައްޖެ. އަޅުގަނޑު ދުވެފައި ގޮސް ސައިކަލަށް އަރައިގެން މުޅި ސަރަހައްދު ބެލިއިރު ވެސް އެ މީހަކު ނުފެނުނު.”
އެ މީހާ ހުރީ ހެޔޮވަރު ވަރަކަށް ބޯކޮށާފައި ކަމަށާއި އޭނާ ހުރީ ތުނބުޅި ބާލާފައި ކަމަށް އިނާޒު ބުންޏެވެ. އަދި އެ މީހާ ހުރީ ވަރަށް ސްމާޓްކޮށް، އޮފީސް ގަމީހެއް ލައިގެން ކަމަށް އޭނާ ބުންޏެވެ.
އެ “އިންޒާރު” ދިނުމާ ގުޅިގެން އެކަން ރިލްވާންގެ އާއިލާއިން ޕޮލިހަށް ހުށަހަޅާފައިވެ އެވެ.
ރިލްވާން ހޯދުމުގެ މަސައްކަތް އެއާއިލާން މިއަދު ވެސް ހުޅުމާލޭގައި ކުރަމުން އެބަދެ އެވެ. އަދި އަމިއްލަ މީހުންގެ ގޭގެއާއި އިމާރާތްތަކުގައި ހުރި ސީސީޓީވީ ކެމެރާތަކުގެ ފުޓޭޖްތަކުން ވެސް ރިލްވާނު ފެނޭތޯ ބަލައިދިނުމަށް އެ އާއިލާއިން އެދެ އެވެ.
ރިލްވާން އެންމެ ފަހުން ފެނިފައިވަނީ މިމަހު ހަތް ވަނަ ދުވަހުގެ ރޭ ދަންވަރު އެވެ. އޭނާ އެންމެ ފަހުން ފެނިފައިވަނީ އެރޭ ހުޅުމާލޭ އަށް ފައިބަނިކޮށް ކަމަށް ފުލުހުން ބުނި ނަމަވެސް، އެކަން މުޅިން ކަށަވަރު ކުރެވިފައި ނުވާ ކަމަށް ފުލުހުން ފަހުން ބުންޏެވެ.
މިނިވަން ނިއުސް އިން ބުނިގޮތުގައި އެ ނޫހުން ސީސީޓީވީ ފުޓޭޖް ބެލި އިރު، އެ ރޭ މެންދަމާއި ދަންވަރު 3:00 އާ ދެމެދު ރިލްވާން މާލޭ ފެރީ ޓާމިނަލަށް ވަދެފައެއް ނުވެ އެވެ.
ައަދި އުރީދޫ ތެރެއިން ނުރަސްމީކޮށް ލިބުނު މައުލޫމާތުތަކަކާ ހަވާލާދީ މިނިވަން ނިއުސް އިން ބުނީ ރިލްވާންގެ ފޯނުން އެންމެ ފަހުން ޑޭޓާ ބޭނުންކޮށްފައި ވަނީ ހަތް ވަނަ ދުވަހުގެ ރޭ 2:36 ގައި ހެންވޭރުގައި ކަމަށެވެ.