August 30, 2014

ގެއްލިފައިވާ ނޫސްވެރިޔާ ރިލްވާން އަބްދުﷲ ހޯދުމަށް ފުލުހުން ކުރިއަށް ގެންދާ ތަހުގީގުގެ މަސައްކަތްތަކާއި މައުލޫމާތުތައް ޕޮލިސް އިންޓަގްރިޓީ ކޮމިޝަން (ޕީއައިސީ) ގެ މެންބަރުންނާއި ފުލުހުން ހިއްސާ ކުރައްވައިފި އެވެ.

މި މައުލޫމާތު ހިއްސާ ކުރެއްވީ މިއަދު ޕީއައިސީގެ މެންބަރުންނާއި ބައްދަލުކުރައްވާ ދެއްކެވި ވާހަކަފުޅުގަ އެވެ.

މިއަދުގެ ބައްދަލުވުމުގައި ކޮމިޝަނަރ އޮފް ޕޮލިސް ހުސައިން ވަހީދު ވިދާޅުވީ ރިލްވާން ހޯދުމަށް މަސައްކަތް ފުލުހުން ކުރަމުންދާ ކަމަށާއި ތަހުގީގުގައި އާންމު ރައްޔިތުންގެ އެއްބާރުލުން ލިބޭ ކަންވެސް ފާހަގަކުރެއްވި އެވެ.

ޕީއައިސީގެ މެންބަރުންނާއި މިއަދު މަޝްވަރާތައް ބާއްވާ، ތަހުގީގެ ތަފްސީލްތައް ޕީއައިސީގެ މެންބަރުންނާއި ހިއްސާކުރައްވާފައިވާ އިރު، މިހާތަނަށް 198 މީހަކާ ސުވާލުކޮށް 80 އަށްވުރެ ގިނަ މީހުންގެ ބަޔާން ނަގާފައިވާ ކަމަށް ފުލުހުން ވަނީ ހާމަކޮށްފަ އެވެ. އަދި މީގެ އިތުރުން، މާލެ އާއި ހުޅުމާލޭގެ އެކި ސަރަޙައްދުތައް ހިމެނޭ ގޮތުން 30 އަށްވުރެ ގިނަ ތަނަކުން 293 ގަޑިއިރުގެ ވީޑިއޯ ފުޓޭޖް ހޯދައި އެތަކެތި ދިރާސާކުރުމުގެ މަސައްކަތް ފަށާފައިވާ ކަމަށާއި މައްސަލައާއި ގުޅޭ ހެކިތައް ހޯދައި އެތަކެތި ތަހުލީލު ކުރުމުގެ މަސައްކަތް ކުރިއަށް ގެންދާ ކަމަށްވެސް ފުލުހުން ވަނީ ބުނެފަ އެވެ.

މިއަދުގެ ބައްދަލުވުމުގައި ޕީއައިސީގެ ރައީސާ ފާތިމަތު ސަރީރާ އަލީ ޝަރީފް ގެ އިތުރުން ކޮމިޝަންގެ މެންބަރުން ބައިވެރިވެ ވަޑައިގެންނެވި އެވެ.