August 16, 2014

މިނިވަން ނިއުސްގެ ޖާނަލިސްޓް އަހުމަދު ރިލްވާން ގެއްލުނުތާ ހަފުތާއަކަށް ވުރެ ގިނަ ދުވަސްވެފައިވާއިރު، އޭނާގެ އާއިލާ އާއި ހެޔޮއެދޭ ފަރާތްތަކަށް ހިތްހަމަޖެހުމެއް ލިބޭ މިންވަރަށް ހޯދަމުން ނުދާ ކަމަށް އެމްޑީޕީން ރޭ ބުނެފި އެވެ.

އެ ޕާޓީން ނެރުނު ނޫސް ބަޔާނެއްގައި ބުނީ ރިލްވާން ގެއްލުނު މައްސަލަ ތަހުގީގުކުރަން ސަރުކާރުން ހާއްސަ ސަމާލުކަމެއް ދީގެން ކުރިއަށް ނުގެންދާތީ ކަންބޮޑުވާ ކަމަށެވެ. ރިލްވާން ގެއްލުނީ އޭނާ އާއި އެހެން ނޫސްވެރިންތަކަކަށް ވެސް ވަރަށް ފާޅުކަންބޮޑުގޮތެއްގައި މަރުގެ އިންޒާރުދީ، އެކި ބާވަތުގެ ފިއްތުންތައް ކުރިމަތިކުރުވަމުން ދަނިކޮށް ކަން އެމްޑީޕީގެ ބަޔާނުގައި ފާހަގަކޮށްފައިވެ އެވެ.

“އަދި ޒުވާނުން ރަޙީނުކޮށްގެން ވަކިތަނަކަށް ގެންގޮސް މަރުގެ އިންޒާރުދީ ބިރުދައްކަމުންދާކަމުގެ ހާދިސާތަކެއްގެ މައުލޫމާތު މި ޕާޓީ އަށް މީގެކުރިން ލިބިފައިވުމުން މިކަން ސަރުކާރުގެ ސަމާލުކަމަށް ގެނައުމަށްޓަކައި މި ޕާޓީން ވާނީ މީގެ ކުރިން ވެސް ނޫސްބަޔާނުގެ ޒަރިއްޔާއިން 9 ޖުލައި 2014 ވަނަ ދުވަހު ސަރުކާރުގެ ސަމާލުކަމަށް ގެނެސްފައިކަން ފާހަގަކުރަމެވެ. ނަމަވެސް އެކަމާ ގުޅިގެން ވެސް ސަރުކާރުން އެޅުއްވި ފިޔަވަޅެއް ފެންނަން ނެތްކަން ހިތާމައާ އެކު ފާހަގަކުރަމެވެ،” ބަޔާނުގައިވެ އެވެ.

ސަރުކާރުން އެކަށީގެންވާ ގޮތެއްގައި ރިލުވާން ހޯދަމުން ނުދާކަމަށް އެމްޑީޕީން ބުނި ނަމަވެސް ސީރިއަސް މައްސަލައެއް ގޮތުގައި ފުލުހުން އޭނާ ހޯދުމުގެ މަސައްކަތް ކުރަމުން އަންނަ ކަމަށް ހޯމް މިނިސްޓަރު އުމަރު ނަސީރު މިދިޔަ ބުދަ ދުވަހު ވަނީ ވިދާޅުވެފަ އެވެ.

އެމްޑީޕީން ބުނީ ރިލްވާން ގެއްލިގެން ސަރުކާރުގެ ކަމާބެހޭ ފަރާތްތަކުން އޭނާ ހޯދަމުންދާ މިންވަރުގެ މައުލޫމާތު ހިއްސާނުކުރުމަކީ ވެސް ގިނަ ރައްޔިތުންގެ ކަންބޮޑުވުން އޮތް ކަމެއް ކަމަށެވެ. ވަކިން ހާއްސަކޮށް އޭނާގެ އާއިލާ އާއި މިނިވަންކަމާ އެކު ނޫސްވެރިކަން ކުރަމުންދާ ނޫސްވެރިންނަށް އެކަމުގެ ސަބަބުން ވަރަށް ބޮޑު ނުތަނަވަސްކަމަކާއި ހިތާމައެއްވެރިވެފައިވާ ކަމަށް ވެސް ބަޔާނުގައިވެ އެވެ.

ރިލްވާން ހޯދުމަށް މިހާރަށް ވުރެ ބޮޑަށް ސަމާލުކަމެއްދީގެން މައްސަލަ ތަހުގީގުކުރުމަށް ބަޔާނުގައި އެމްޑީޕީން ގޮވާލާފައިވެ އެވެ.

ރިލްވާންގެ އާއިލާ އިން ބުނެފައިވާ ގޮތުގައި ހުޅުމާލޭގައި އެޕާޓްމަންޓެއް ކުއްޔަށް ހިފައިގެން އެކަނި ދިރިއުޅޭ ރިލްވާނާ އެންމެ ފަހުން ބައްދަލުވީ ބުރާސްފަތި ދުވަހުގެ ރޭ 10:00 ހާއިރު މާލެއިންނެވެ. އޭގެ ފަހުން އޭނާގެ ފޯނަށް ނުގުޅޭއިރު އޭނާގެ ހަބަރެއް ނުވެ އެވެ.

ފުލުހުން ބުނާގޮތުގައި ރިލްވާން ގެއްލިގެން އާއިލާ އިން ހުށަހެޅި ރިޕޯޓަކާ ގުޅިގެން އޭނާ ހޯދަމުން އަންނައިރު، ރިލްވާން އެންމެ ފަހުން ފެނިފައި ވަނީ ބުރާސްފަތި ދުވަހުގެ ރޭ 2:00 ގައި ފެރީން ހުޅުމާލެ އަށް ފައިބަނިކޮށެވެ.

ވީނުވީއެއް ނޭނގި ރިލްވާން ގެއްލިފައިވާއިރު، އޭނާގެ އާއިލާ އާއި މިނިވަން ނިއުސް އިން ވެސް ބުނެފައި ވަނީ ފަހަކަށް އައިސް ރިލްވާނަށް ވަރަށް ބޮޑެތި އިންޒާރުތަކާއި ޕްރެޝަރު އައިސްފައިވާ ކަމުގެ މައުލޫމާތު ލިބޭ ކަމަށެވެ. އަދި އޭނާ އަށް ބިރުދައްކާފައިވާ ކަމުގެ މައުލޫމާތު ލިބިފައިވާ ކަމަށް ހިއުމަން ރައިޓްސް ކޮމިޝަން (އެޗްއާރުސީއެމް) އިން ވެސް ވަނީ ބުނެފަ އެވެ.