August 17, 2014

މިމަހުގެ 7 ވަނަ ދުވަހުން ފެށިގެން ވީނުވީއެއް ނޭގި ގެއްލިފައިވާ މިނިވަން ނޫހުގެ ނޫސްވެރިޔާ އަހުމަދު ރިލްވާންއާ ބެހޭ އެއްވެސް ،މައުލޫމާތެއް ލިބިފައި ނުވާއިރު ރިލްވާން ގެއްލުނު ދުވަހުގެ ރޭ ދަންވަރު ހުޅުމާލޭގައި ހިނގި ވަރަށް އާދަޔާ ޚިލާފް ޙާދިސާއެއްގެ މައުލޫމާތު ރާއްޖެ އެމްވީއަށް ލިބިއްޖެއެވެ.

އެ ހާދިސާ ހިނގަމުން ދިޔައިރު އެތަނާ މާދުރުނޫން ހިސާބެއްގައި ހުރި މަންޒަރު ދުށް މީހަކު ރާއްޖެ އެމްވީއަށް ކިޔައިދިން ގޮތުގައި ރިލްވާން ހުޅުމާލޭގައި ދިރިއުޅޭ އެޕާޓްމަންޓް ހުންނާ އިމާރާތުގެ ތެރެއިން ގަދަކަމުން ގްރޫޕެއް އައިސް މީހަކު ނެރެގެން ވަނީ ގެންގޮސްފައެވެ.

އޭނާ ކިޔައިދިން ގޮތުގައި އޭނާއަށް އެކަމަށް ސަމާލުކަން ދެވުނީ އިވުނު އަޑުފައްގަނޑަކުން ކަމަށާއި، އެއާއެކު މަންޒަރު ހިނގަމުން ދިޔައީ އޭނާގެ ލޯމަތީގައި ކަމަށެވެ.

ގަދަކަމުން ގެންދިޔަ މީހާ ގެންގޮސް އެރުވީ ރަތްކުލައިގެ ކާރަކަށް ކަމަށް އޭނާ ކިޔައިދިނެވެ.

އަމިއްލަ ރައްކަލަށްޓަކައި ނަންހާމަ ނުކުރުމަށް އެދެމުން އެމީހާ ރާއްޖެ އެމްވީއާ މައުލޫމާތު ހިއްސާ ކޮށްފައިވާ ގޮތުގައި އެރޭ އޭނާ ދަންވަރުގެ ވަގުތެއްގައި ރިލްވާން ދިރިއުޅޭ ގެއިން ނެރެގެން ގަދަކަމުން ކާރަށް އަރުވާތަން ބަލަން ހުރިއިރު ހިފަހައްޓައިގެން އުޅޭ މީހާގެ މޫނުގައި އަތްއަޅާފައިވާ ކަމަށާއި ކާރުތެރެއަށް ކޮއްޕާލުމަށްފަހު ކާރު ނައްޓާލީ ރަނގަޅަށް ދޮރުވެސް ނުލެއްޕެނީސް ކަމަށް އޭނާ ބުންޏެވެ.

ރާއްޖެއެމްވީއަށް މައުލޫމާތު ދިން ފަރާތުން ބުނާގޮތުން ކާރަށް އެމީހާ ގަދަކަމުން އަރުވަން އުޅުމުގެ ތެރޭގައި އެކަމުގައި ހަރަކާތްތެރިވި މީހެއްގެ އަތުން ބިންމައްޗަށް އެއްޗެއް ވެއްޓުނެވެ. އެއެއްޗެއް ވެއްޓުނުކަން އޭނާއަށް އެނގުނީ ގޮވި އަޑުން ކަމަށާއި، ކާރު ނައްޓާލުމާއެކު އެ ސަރަހައްދަށް ގޮސް ބެލިއިރު އެމީހުންގެ އަތުން ވެއްޓިފައި އޮތީ ބެނެޓް ވަޅިއެއް ކަމަށް އޭނާ ބުނެފައިވެއެވެ.

އަދި ވަގުތުން އެ ހާދިސާ ފުލުހުންނަށް ރިޕޯޓް ކުރި ކަމަށާއި ފުލުހުން އައިސް އެވަޅި ގެންދިއަ ކަމަށްވެސް އޭނާ ބުނެފައިވެއެވެ.

ފުލުހުން ރަސްމީކޮށް ހިންގާ ތަހްގީގުގައި މާ ބޮޑު ކުރިއެރުމެެއް މިހާތަނަށް ލިބިފައި ނުވާއިރު، ފުލުހުން ބުނެފައިވަނީ ވަރަށް ސީރިއަސްކޮށް ރިލްވާން ހޯދުމުގެ މަސައްކަތް ކުރަމުންދާ ކަމަށެވެ.