August 25, 2014

ފަހަކަށް އައިސް އެކި މީހުންގެ ފޯނުތަކަށް ފޮނުވާ އިންޒާރުގެ މެސެޖްތައް ފޮނުވާ ފަރާތްތައް ދެނެގަތުމަށް ފުލުހުން ކުރާ މަސައްކަތުގައި މުއާސަލަތީ ކުންފުނި އުރީދޫގެ އިސް ފަރާތްތަކާ ބައްދަލުކޮށްފި އެވެ.

ފުލުސް އޮފީހުން ބުނީ ޕޮލިސް ކޮމިޝަނަރު ހުސެން ވަހީދާއެކު ބޭއްވި އެ ބައްދަލުވުމުގައި ރައްޔިތުންގެ ހިތްތަކަށް ބިރުވެރިކަން ވެއްދުމަށް އެކި ފަރާތްތަކުން ފޮނުވަމުންދާ މެސެޖްތައް ފޮނުވާ ފަރާތްތައް މިހާރަށް ވުރެ ފަސޭހައިން ދެނެގަނެ، އެފަދަ ކަންކަން ހުއްޓުވުމާއި ގުޅޭގޮތުން ދެ ފަރާތުން މަޝްވަރާތައް ކޮށްފައިވާ ކަމަށެވެ. އަދި މިއީ މިހާރު ރައްޔިތުންގެ ވަރަށް ބޮޑު ކަންބޮޑުވުމަކަށް ވާތީ، މި މައްސަލަ ވީހާ ވެސް އަވަހަކަށް ހައްލު ކުރެވޭނެ ގޮތަކާމެދު ވެސް މަޝްވަރާ ކޮށްފައިވާ ކަމަށެވެ.

މި ބައްދަލުވުމުގައި އުރީދޫގެ އާ ސީއީއޯ ވިކްރަމް ސިނާ ވެސް ބައިވެރިވެ ވަޑައިގެންނެވި އެވެ.

މީހުންނަށް އަންނަ އިންޒާރުގެ ފޯން ކޯލުގެ އިތުރުން، އުރީދޫން މިހާރު ފުލުހުންނަށް ދެމުން އަންނަ ހިދުމަތްތަކާ ގުޅޭގޮތުން ވެސް މި ބައްދަލުވުމުގައި ވަނީ މަޝްވަރާ ކޮށްފަ އެވެ. އެގޮތުން ސީސީ ޓީވީ އެކްސްޕެންޝަން ޕްރޮޖެކްޓްގައި ދެ ފަރާތުން ގުޅިގެން އިތުރު މަސައްކަތްތަކެއް ކުރުމަށް އެއްބަސްވެފައިވާއިރު ކޯލް ސެންޓަރުގެ މުވައްޒަފުންނަށް ދޭންޖެހޭ ތަމްރީނުތައް ދެ ފަރާތުގެ އެއްބާރުލުމާއެކު ކުރިއަށް ގެންދިޔުމަށް ވެސް އެއްބަސްވެފައި ވެއެވެ.