August 27, 2014
ކާކުކަން ނޭނގޭ ނަންމަބުރުތަކުން މީހުންނަށް އެކިއެކި އިންޒާރު ދޭ އެސްއެމްއެސްތައް ފޮނުވާ މީހުން ހޯދުމުގެ ތަހުގީގުތައް ކުރަނީ ރާއްޖޭން ބޭރުގެ އެކި ފަރާތްތަކާ ގުޅިގެން ކަމަށާއި އެސްއެމްއެސް ފޮނުވާ ފަރާތްތައް ހޯދިދާނެ ކަމަށް ގަބޫލު ކުރާ ކަމަށް ފުލުހުން ބުނެފި އެވެ.
މިރޭ ބޭއްވި ނިއުސް ކޮންފަރެންސެއްގައި އިންސްޕެކްޓަރު އޮފް ޕޮލިސް އަހުމަދު ޝިފާއު ވިދާޅުވީ މި ދުވަސްވަރަކީ ސައިބަ ކްރައިމާ ގުޅުންހުރި ގިނަ މައްސަލަތަކެއް ފުލުހުން ތަހުގީގު ކުރަމުންދާ ދުވަސްވަރެއް ކަމަށާއި އެ މައްސަލަތަކުގެ ތެރޭގައި ކާކުކަން ނޭނގޭ ނަމްބަރުތަކުން އެކި މީސް މީހުންނަށް އިންޒާރުދޭ ތަފާތު މެސެޖްތައް ފޮނުވަމުންދާ މައްސަލަ ހިމެނޭ އިރު އެ މައްސަލަތައް ތަހުގީގު ކުރަނީ ރާއްޖެ އާއި ރާއްޖޭން ބޭރުގެ ތަފާތު ފަރާތްތަކާ ގުޅިގެން ކަމަށެވެ.
ޝިފާއު ވިދާޅުވީ ތަހުގީގުތަކަށް ފެންނަ ގޮތުން މިހާރު ފޮނުވަމުންދާ މެސެޖްތައް ފޮނުވަނީ ކޮމްޕިއުޓާ އްޕެލިކޭޝަނެއް ބޭނުންކޮށްގެން ކަމަށް ބެލެވޭ ކަމަށެވެ.
“މި މައްސަލައިގައި މިހާތަނަށް ފާހަގަ ކުރެވިފައި ވަނީ މެސެޖްތައް ފޮނުވަމުންދަނީ ކޮމްޕިއުޓާ އެޕްލިކޭޝަނެއް ބޭނުންކޮށްގެންކަން… ގަބޫލު ކުރަން [މެސެޖް] ފޮނުވާ ފަރާތްތައް ހޯދި ދާނެ ކަމަށް. އެގޮތަށް ބަލައިގެން މި މަސައްކަތް ކުރަނީ،” އޭނާ ވިދާޅުވި އެވެ. އޭނާ އަދި ވިދާޅުވީ މި މައްސަލައަކީ ތަހުގީގު ކުރާ މައްސަލައަކަްވާތީ އިތުރު މައުލޫމާތެއް ދެވެން އަދި ނެތް ކަމަށެވެ.