August 22, 2014

ގެއްލިފައިވާ މިނިވަން ނޫހުގެ ނޫސްވެރިޔާ އަހުމަދު ރިލްވާން ގެއްލުމުގެ ކަންބޮޑުވުން ފާޅު ކުރައްވާ ކަމަށާއި، ރާއްޖޭގެ ނޫސްވެރިންނަށް ފަރުދީ ފެންވަރުގައި އަދި ޤައުމީ ފެންވަރުގައި ރައްކާތެރިކަން ފޯރުކޮށްދޭން ޖެހޭ ކަމަށް ހާރިޖީ ވަޒީރު ދުންޔާ މައުމޫން ގޮވާލައްވައިފި އެވެ.

ހާރިޖީ ވުޒާރާގެ ވެބްސައިޓްގައި އިއްޔެ އާންމުކޮށްފައިވާ ބަޔާނެއްގައި ދުންޔާ ވިދާޅުވީ، ނޫސްވެރިންނަށް ދެވޭ ހަމަލާތަކާއި މެދު ކަންބޮޑުވެލައްވާ ކަމަށެވެ.
އަދި މިނިވަން މީޑިއާއެއްގެ މަސައްކަތް ކުރެވޭނީ މުޖުތަމައުގެ ހޭލުންތެރިކަމުގެ އިތުރުން އެއްބާރުލުން ލިބިގެން ކަމަށެވެ. އަދި މިނިވަން މީޑިއާއަކީ ޑިމޮކްރެޓިކް މުޖުތަމައުއެއްގެ ބިންގާ ކަމަށެވެ.

ރިލްވާން ގެއްލިގެން ހޯދާތާ 13 ދުވަސް ވީ އިރު މިނިސްޓަރ ދުންޔާ މިކަމުގެ ކަންބޮޑުވުން ފާޅު ކުރައްވާފައިވަނީ އިންސާނީ ހައްޤުތަކާއި ނޫސްވެރިކަމާއި ގުޅޭ ބައިނަލް އަގްވާމީ ޖަމްއިއްޔާތަކުން މި މައްސަލައިގެ ކަންބޮޑުވުން ފާޅުކޮށް ތަހްޤީޤީ އިދާރާތަކުން ރިލްވާން ގެއްލުނު މައްސަލައަށް ސަމާލުވުމަށް ގޮވާލި ފަހުންނެވެ.

ގެއްލިގެން ހޯދަމުންދާ ނޫސްވެރިޔާ ރިލްވާން ގެއްލުނީ މިނިސްޓަރ ދުންޔާގެ ބައްޕާފުޅު ކުރީގެ ރައީސް މައުމޫން އަބުދުލް ޤައްޔޫމާއި ދެކޮޅަށް ޓްވީޓެއް ކުރެއްވި ފަހުންނެވެ.

މޮޔަމީހާގެ ނަމުގައި ޓްވިޓަރގައި އުޅޭ ރިލްވާން މައުމޫން އާއި ގުޅޭ ގޮތުން ކޮށްފައިވާ ޓްވީޓްގައި ބުނެފައިވަނީ “ކަލޭ ހަނދު ބެލީމަ ހަނދުވެސް ނުފެނުން، ބޯޅަ ބަލަން ދިޔައީމަ ޓީމް މޮޅެއް ނުވޭ، މޭ ގޯޑް ހެލްފް ދިން ޕުއަރ ކަޕްލް”. މިއީ އޮގަސްޓް 07 ވަނަ ދުވަހު އޭނާ ކޮށްފައިވާ ޓްވީޓެކެވެ.

@maumoonagayoom kaley handhu beleema handhuves nufenun, boalha balan dhiyaima team molheh nuvey. may god help this poor couple.. 🙁

— مجنون (@moyameehaa) August 7, 2014 “> loading..
ރިލްވާން އެންމެފަހުން ފެނިފައިވަނީވެސް އޮގަސްޓް 07 ވަނަ ދުވަހުގެ ރެއެވެ، އެރޭ 12:45 ހާއިރު އެމްޓީސީސީ މާލެ – ހުޅުމާލެ، މާލޭ ޓާމިނަލް އިން ފެނުނު ފަހުން ރިލްވާންގެ ހަބަރެއް ނުވެ، ވީނުވީއެއް ނޭންގި އޭނާ ވަނީ ގެއްލިފައެވެ.

ރިލްވާން ގެއްލިފައިވާތީ ހާރިޖީ ވަޒީރު ނެރުއްވާފައިވާ ބަޔާނުގައި ބުނެފައިވަނީ ރާއްޖޭގެ ހުރިހާ އެންމެންނަށް ސަލާމަތާއި ރައްކާތެރިކަން ފޯރުކޮށްދިނުމަކީ މުހިންމު ކަމެއް ކަމަށާއި، ރިލްވާން ހެޔޮހާލުގައި ހުއްޓާ ފެންނާނެ ކަމަށް އުންމީދު ކުރައްވާ ކަމަށެވެ.

ރާއްޖޭގެ ނޫސްވެރިއެއް ގެއްލިގެން ހޯދަމުންދާއިރު، ހިއުމަން ރައިޓްސް ކައުންސިލުގައި، ނޫސްވެރިންނަށް ރައްކާތެރިކަން ދިނުމާއި ބެހޭ އދ. ގެ މުއާހަދާގައި ދިވެހިރާއްޖެއިން ވަނީ 2012 ވަނަ އަހަރު ބައިވެރިވެފައެވެ.

އދ. ގެ އިންސާނީ ޙައްޤުތަކާއި ބެހޭ ކޮމިޝަނަރުގެ އޮފީހުން މިދިޔަ ހަފްތާގައި ނެރެފައިވާ ބަޔާނެއްގައި، ޒިންމާ އަދާކުރުމުގެ ގޮތުން ނޫސްވެރިން ކުރާ ކަންތައްތަކާއި ގުޅޭ ގޮތުން ރާއްޖޭގައި އެމީހުންނަށް އިންޒާރު ދިނުން ހުއްޓާލުމަށް ވަނީ ގޮވާލާފަ އެވެ.

އެގޮތުން މިނިވަން ނޫހުގެ ނޫސްވެރިޔާ ރިލްވާން ގެއްލިފައި ވަނީ ރާއްޖޭގައި ހިންގި ގޭންގު މާރާމާރީ ތަކާއި ގުޅޭ ގޮތުން ނޫސްވެރިން ޚަބަރު ގެނެސް ދިނުމުން، ބައެއް ނޫސްވެރިންނަށް މަރުގެ އިންޒާރު ލިބުމަށްފަހުގައި ކަމަށް އެ ބަޔާނުގައި ފާހަގަ ކޮށްފައިވެ އެވެ.