August 30, 2014
މިމަހުގެ ކުރީކޮޅު ގެއްލުނު މިނިވަން ނޫހުގެ ނޫސްވެރިޔާ އަހުމަދު ރިޟްވާން އަބްދުﷲ ފެންނާނެ ކަމުގެ އުންމީދު އެބައޮތް ކަމަށް ޑިފެންސް މިނިސްޓަރު މުހައްމަދު ނާޒިމް މިރޭ ވިދާޅުވެއްޖެ އެވެ.
ބްރޯޑްކާސްޓިންގ ކޮމިޝަންގެ އާ ޗެނަލް ލޯންޗުކުރުމަށާއި ދިޓީވީގެ ވެބްސައިޓް ލޯންޗުކުރުމަށް ދިޓީވީ ކުރިމަތީގައި މިރޭ ބޭއްވި ހާއްސަ ރަސްމިއްޔާތުގައި ވާހަކަފުޅުދައްކަވަމުން ޑިފެންސް މިނިސްޓަރު ވިދާޅުވީ ރިޟްވާން ހޯދުމަށްޓަކައި ދިވެހި ސަރުކާރުން ކުރަން ޖެހުނު ކޮންމެ ކަމެއް ކުރަމުންދާ ކަމަށެވެ.
ސައުތު އޭޝިއާ ރީޖަނަލް އެންވަޔަރަންމެންޓަލް ސެކިއުރިޓީ ފޯރަމް ރަސްމީކޮށް ފެށުމަށް ކުރުނބާގައި ބޭއްވި ރަސްމިއްޔާތުގައި ނާޒިމް – ވަގުތު ފޮޓޯ: އަޝްހާދު އަބްދުﷲ
ޑިފެންސް މިނިސްޓަރ ނާޒިމް – ވަގުތު ފޮޓޯ: އަޝްހާދު އަބްދުﷲ
“އަހުމަދު ރިޟްވާން މިވަނީ ވަރަށް ހިތާމަވެރި ގޮތަކަށް، އަދިވެސް ނުފެނި ގެއްލިފައި، އަޅުގަނޑު ދަންނަވާ ހިތް އޮތީ ދިވެހި ސަރުކާރުން ކުރަން ޖެހުނު ކޮންމެ ކަމެއް އަޅުގަނޑުމެން މިދަނީ ކުރަމުން، ﷲ އިރާދަކުރެއްވިއްޔާ އަހުމަދު ރިޟްވާން ފެންނާނެ ކަމުގެ އުންމީދު އެބައޮތް.” ނާޒިމް ވިދާޅުވި އެވެ.
ނާޒިމް އިތުރަށް ވިދާޅުވީ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ބޭނުންފުޅުވަނީ މީޑިއާ މިނިވަންކަމާއިއެކު ބާއްވަން ކަމަށާއި މީޑިއާގައި އަތް އެޅުމަކީ އެމަނިކުފާނު ބޭނުންފުޅުވާ ކަމެއް ނޫން ކަމަށެވެ. އަދި މިސަރުކާރުގެ އަމާޒަކީ ހުރިހާ ނޫސްވެރިންނަށް މިނިވަންކަމާއިއެކު ހަރަކާތްތެރިވުމުގެ ފުރުސަތު ހުޅުވާލުން ކަމަށް ވެސް މިނިސްޓަރު ވިދާޅުވި އެވެ.
“އަޅުގަނޑުމެން ބޭނުންވަނީ މި ސަރުކާރަށް ފާޑު ކިޔަން، އަޅުގަނޑުމެން ބޭނުންވަނީ ޒިންމާދާރުކަމާއިއެކު ފާޑު ކިޔަން، އަޅުގަނޑުމެން އެކަމަކާއި ފަހަތަކަށް ނުޖެހޭނެ، އަޅުގަނޑުމެން ތިބޭނީ ކެރިގެން ކުރިމަތިލާން، ގޯސްކަމެއް ކޮށްފިނަމަ އެކަމެއް ރިޕޯޓުކުރަންވީ، އަޅުގަނޑުމެން ސަރުކާރުން އެކަމަކާއި ޒިންމާދާރުވާނަން.” ނާޒިމް ވިދާޅުވި އެވެ.
މިނިސްޓަރު ވިދާޅުވީ މިސަރުކާރަކީ ނޫސްވެރިންނަށް ބިރުދައްކާ ނޫސްވެރިން ފަހަތުން ދުވާނެ ސަރުކާރެއް ނޫން ކަމަށާއި ރާއްޖޭގައި ހިނގާ ކަންކަން ރައްޔިތުންނާއި ހަމައަށް ކުރިއަށް އޮތް ތަނުގައި ވެސް ނޫސްވެރިން ގެނެސްދޭނެ ކަމަށް އުންމީދުކުރައްވާ ކަމަށެވެ.
މޮޔަ މީހާ” ގެ ނަމުން ސޯޝަލް މީޑިއާގައި މަޝްހޫރުވެފައިވާ ރިޟްވާން ގެއްލިފައިވަނީ މިމަހުގެ 7 ވަނަ ދުވަހު މާލޭގައި ހުންނަ ހުޅުމާލެ ފެރީ ޓާމިނަލަށް ވަތް ފަހުންނެވެ. ޓިކެޓު ނަގައިގެން ޓާމިނަލް ތެރެއަށް ރިޟްވާން ވަތް ސީސީޓީވީ ފޫޓޭޖް މިހާރު އާންމުވެފައިވާއިރު ރިޟްވާން ހުޅުމާލެއަށް ފޭބިކަން ފުލުހުންނަށް ކަށަވަރެއް ނުވެ އެވެ.
ފުލުހުން ހާމަކޮށްފައިވާ ގޮތުގައި ރިޟްވާންގެ ފޯންގެ ސިގްނަލް އެންމެ ފަހުން ލިބުނީ ހަތް ވަނަ ދުވަހުގެ ރޭ މެންދަމު 2:30 ގައި ހެންވޭރުގެ ސަރަހައްދަކުންނެވެ. އަދި އެންމެ ފަހުން ފޯން ކޯލެއް ކޮށްފައިވަނީ އެ ރޭ 10:19 ގައި އެވެ.
އޭނާ ހޯދުމުގެ މަސައްކަތުގައި ހުޅުމާލޭ ބަލާފައިވާ ކަން ފުލުހުން ހާމަކޮށްފައިވާއިރު ގިނަ އަދަދެއްގެ ސީސީޓީވީ ފޫޓޭޖްތައް ވެސް ބަލަމުން އަންނަ ކަމަށް ފުލުހުން ބުނެ އެވެ.
ރިޟްވާން ގެއްލުނު މައްސަލަ އާއި ގުޅިގެން ހަތަރު މީހެއްގެ ޕާސްޕޯޓް އިމިގްރޭޝަނުން ވަނީ ހިފަހައްޓާފައެވެ.