August 18, 2014

ގެއްލިގެން ހޯދަމުންދާ މިނިވަން ނޫހުގެ ނޫސްވެރިޔާ އަހުމަދު ރިޟްވާން ގެއްލުނުރޭ ދަންވަރު ރިޟްވާން ދިރިއުޅޭ އެޕާޓްމަންޓް ކައިރިން މީހަކު ގަދަކަމުން ކާރަކަށް އަރުވައިގެން ގެންދިއަ މަންޒަރު ފެނުނު ކަމަށް ދެމީހަކާއި ހަވާލާދީ މިނިވަން ނޫހުން ބުނެފިއެވެ.

ގަދަކަމުން މީހަކު ކާރަކަށް އަރުވާފައި ވަނީ ރިޟްވާން ގެއްލުނު ކަމަށް ބުނާ ރޭ ގެ ދަންވަރު 02:00 ކަންހާއިރު ކަމަށް އެމީހުންނާއި ހަވާލާދީ މިނިވަން ނޫހުން ބުނެއެވެ.

ރިޟްވާން ހޯދުމަށް ފުލުހުން ކުރަމުންދާ ތަޙްޤީޤާއި ގުޅޭ ގޮތުން ފުލުހުން ރޭ ބުނެފައި ވަނީ ރިޟްވާން ހުޅުމާލެ އަށް ދިއަ ކަން އަދި މިހާތަނަށް ކަށަވަރު ކުރެވިފައި ނުވާ ކަމަށެވެ. ނަމަވެސް އޭނާ މިމަހުގެ 7 ވަނަ ދުވަހުގެ ރޭ 00:44 ހާއިރު ހުޅުމާލޭ ފެރީ ޓާމިނަލްގައި އުޅޭ މަންޒަރު ފެންނަ ސީސީޓީވީ ފޮޓޭޖެއް މިހާރު ވަނީ އާންމުވެފައެވެ.

މިނިވަން ނޫހުން ބުނެފައި ވަނީ ރިޟްވާން ގެއްލުނު ރޭ ގެ 01:02 މިނެޓްގައި އޭނާ އިނީ ފެރީގައި ކަމަށް ބުނެ ޓްވީޓެއް ކޮށްފައިވާ ކަމަށެވެ. އެހެން ކަމުން ރިޟްވާން އަށް އޭނާގެ އެޕާޓްމަންޓަށް ދެވޭނެ ކަމަށް ލަފާކުރެވެނީ އެރޭ ދަންވަރު 01:30 އާއި 02:00 އާއި ދެމެދުގެ ވަގުތެއްގައި ކަމަށް ލަފާކުރެވޭ ކަމަށް މިނިވަން ނޫހުން ބުނެއެވެ.

ރިޟްވާންގެ އެޕާޓްމަންޓް ކައިރިން މީހަކު ކާރަކަށް އެރުވި މަންޒަރު ފެނުނު ކަމަށް ބުނާ މީހަކާއި ހަވާލާދީ މިނިވަން ނޫހުގައި ބުނެފައި ވަނީ ކާރަށް އެމީހާ ގަދަކަމުން އަރުވަން އުޅުމުގެ ތެރޭގައި އެކަމުގައި ހަރަކާތްތެރިވި މީހެއްގެ އަތުން ބިންމައްޗަށް އެއްޗެއް ވެއްޓު ކަމަށެވެ. އެއެއްޗެއް ވެއްޓުނުކަން އޭނާއަށް އެނގުނީ ގޮވި އަޑުން ކަމަށާއި، ކާރު ނައްޓާލުމާއެކު އެ ސަރަހައްދަށް ގޮސް ބެލިއިރު އެމީހުންގެ އަތުން ވެއްޓިފައި އޮތީ ވަޅިއެއް ކަމަށް ވެސް އޭނާ އާއި ހަވާލާދީ މިނިވަން ނޫހުން ބުނެއެވެ.

އަދި އެމައްސަލަ ފުލުހުންނަށް ރިޕޯޓްކުރުމުން ފުލުހުން އައިސް ވަޅި ގެންދިއަ ކަމަށް ވެސް އޭނާ ބުނެއެވެ.

ރިޟްވާން އުޅޭ އެޕާޓްމަންޓް ކައިރިން މީހަކު ގަދަކަމުން ވެހިކަލަކަށް އެރުވީ އިސްކޮޅުން ދިގު ހިކި ކޮށް ހުރި މީހެއް ކަމަށް ވެސް އެމަންޒަރު ފެނުނު މީހަކާއި ހަވާލާދީ މިނިވަން ނޫހުން ބުނެއެވެ. އަދި އޭނާ ހުރީ ގަދަކަމުން އަނެއް މީހާގެ ކަނާތުގައި ހިފަހަށްޓައިގެން އަނގަމަތީގައި އަތް އަޅައިގެން ކަމަށް ވެސް މަންޒަރު ފެނުނު މީހަކު ބުނެއެވެ.