August 27, 2014
މިނިވަން ނިއުސްގައި މަސައްކަތް ކުރަމުން އަންނަ ނޫސްވެރިޔާ އަހުމަދު ރިޟުވާން ގެއްލުނު މައްސަލައާ ގުޅިގެން ހަތަރު މީހެއްގެ ޕާސްޕޯޓް ހިފަހައްޓައިފި އެވެ.
ސަން އަށް އެނގިފައިވާ ގޮތުގައި އެ މައްސަލައިގެ ތުހުމަތުގައި ހަތަރު މީހެއްގެ ޕާސްޕޯޓް ހިފަހައްޓާފައި ވަނީ މިއަދުގެ ވަގުތެއްގަ އެވެ. ނަމަވެސް އެ މައްސަލާގައި ޕާސްޕޯޓް ހިފަހައްޓާފައި ވަނީ ކޮން ހަތަރު މީހެއްގެ ކަމެއް މިހާތަނަށް ވަނީ ފުލުހުން އަދި އިމިގްރޭޝަނުން ވެސް ސާފުވާ ގޮތް ނުވެފަ އެވެ.
ރިޟުވާން ގެއްލިގެން މިމަހުގެ 13 ވަނަ ދުވަހު އާއިލާ އިން ކޮށްފައިވާ ރިޕޯޓްކާ ގުޅިގެން މިހާތަނަށް ފުލުހުން އޭނާ ހޯދުމަށް ކުރަމުންގެންދާ މަސައްކަތުގެ ދަށުން ހުޅުމާލެ އާއި މާލޭގެ އިތުރުން ފަޅުރަށްތަކާއި ކަނޑާއި އެއްގަމުގައި ދުއްވާ އުޅަނދު ފަހަރުތައް ވަނީ ބަލައި ފާސްކޮށްފަ އެވެ. އަދި ފުލުހުންނާ ގުޅިގެން ސިފައިން ވެސް ގެންދަނީ އޭނާ ހޯދުމުގެ މަސައްކަތް ކުރަމުންނެވެ.
ރިޟުވާން ގެއްލިގެން އާއިލާ އިން ރިޕޯޓް ކުރިފަހުން ފުލުހުން ކުރިއަށް ގެންދިޔަ ތަހުގީގުގައި މާލޭގައި ހުންނަ ހުޅުމާލޭގެ ފެރީޓާމިނަލް އިން ޓިކެޓް ގަނެގެން އޭނާ ޓާމިނަލުން އެތެރެއަށްދާ މަންޒަރު ދައްކުވައިދޭ ސީސީޓީވީ ފުޓޭޖްއެއް އާއްމުވެފައިވި ނަމަވެސް އޭނާ ހުޅުމާލެ އަށް ގޮސްފައިވާކަން ޔަގީން ކުރެވިފައި ނުވާ ކަމަށް ފުލުހުން މިހާތަނަށް ވަނީ ބުނެފަ އެވެ.