August 14, 2014

“މިނިވަން ނިއުސް” ގެ ނޫސްވެރިޔާ އަހުމަދު ރިލްވާން ގެއްލިފައިވާތީ ހިއުމަން ރައިޓްސް ކޮމިޝަނުން މިރޭ ކަންބޮޑުވުން ފާޅުކޮށްފި އެވެ.

މި މަހުގެ ހަތް ވަނަ ދުވަހުގެ ރެއިން ފެށިގެން ގެއްލުނު ރިލްވާނަކީ ކުރިން ހިއުމަން ރައިޓްސް ކޮމިޝަންގައި ވަޒީފާ އަދާކުރި މީހެއް ކަމަށް އެ ކޮމިޝަނުން ބުނެ އެވެ. މީގެ ކުރިން ޖަޒީރާ އާއި މިއަދު ނޫހުގައި ވެސް މަސައްކަތް ކުރި ރިލްވާނު ގެއްލުނީ ބައެއް ނޫސްވެރިންނަށް މަރުގެ އިންޒާރު ދީފައިވަނިކޮށެވެ.

ރިލްވާނަށް ވެސް ބިރު ދައްކާފައިވާ މައުލޫމާތު ލިބިފައިވާ ކަމަށް ވެސް އެ ކޮމިޝަނުން ނެރުނު ބަޔާނުގައިވެ އެވެ.

އެ ބަޔާނުގައި ބުނެފައިވާ ގޮތުގައި ހިޔާލު ފާޅުކުރުމުގެ މިނިވަންކަން ދެމެހެއްޓުމަށްޓަކައި ނޫސްވެރިންނަށް ރައްކާތެރިކަން ދިނުމަކީ މުހިންމު ކަމެކެވެ. އަދި ކޮންމެ ދިވެހި ރައްޔިތެއްގެ ސަލާމަތާއި ރައްކާތެރިކަން ކަށްވަރުކޮށް ބޭއްވުމަށްޓަކައި ސަރުކާރުގެ ކަމާ ގުޅޭ އިދާރާތަކަށް ވެސް އެޗްއާރުސީއެމް އިން ގޮވާލި އެވެ.

ރިލްވާނު ގެއްލުމާއި ނޫސްވެރިންނާއި މަޖިލީހުގެ މެމްބަރުންނަށް މަރުގެ އިންޒާރު ދިން މައްސަލަ ވަރަށް ގާތުން ބަލަމުންދާ ކަމަށާއި މި މައްސަލަތައް އދ. ގެ ސަމާލުކަމަށް ގެނެސްފައިވާ ކަމަށް އެޗްއާރުސީއެމް އިން ބުނެ އެވެ.

އޭނާ ހޯދުމުގެ މަސައްކަތް ފުލުހުން ފަށާފައި ވާއިރު، އޭނާ ރާއްޖޭން ބޭރަށް ފުރާފައި ނެތް ކަމަށް ފުލުހުން ބުނެ އެވެ.