August 22, 2014

މިނިވަން ނިއުސްގެ ނޫސްވެރިޔާ އަހްމަދު ރިލްވާން އަބްދުﷲ ގެއްލުމަކީ ހުރިހާ ނޫސްވެރިންނަށް ކުރިމަތިވި ބިރުވެރި ކަމަކަށްވާތީ، މި މައްސަލައާ ގުޅިގެން ނޫސްވެރިން ހަރަކާތްތަކެއް ހިންގަން ނިންމައިފި އެވެ.

މިކަމާ މަޝްވަރާކުރުމަށްޓަކައި ސިޓީ ހޯލްގައި ރޭ ނޫސްވެރިން ބައްދަލުކޮށް، ކުރާނެ ކަންތައްތަކަކާ ބެހޭ ގޮތުން މަޝްވަރާކުރި އެވެ.

ރޭގެ ބައްދަލުވުމުގައި ކުރެވުނު މަޝްވަރާތަކުގައި، އުމުރުން 28 އަހަރުގެ ނޫސްވެރިޔާ ގެއްލުނީ، ތަކުރާރުކޮށް ނޫސްވެރިންނަށް ބިރު ދެއްކުމާއި، ދެމުން ދިޔަ ގެއްލުންތަކަށް ފަހު ކަން ނޫސްވެރިން ފާހަގަކުރި އެވެ. އަދި ކުރިއަށް އޮތް ތަނުގައި ބިރުވެރިކަން ބޮޑުވުން އެކަށީގެންވާ ކަމަށާއި އެހެންވެ އެކަމާ ދެކޮޅަށް ކުރެވެން ހުރި ހުރިހާ މަސައްކަތެއް ކުރުމަށް ވާހަކަ ދެއްކި އެވެ.

ނޫސްވެރިންނަށް ކުރިމަތިވާ ބިރުވެރިކަން ކުޑަކުރުމަށްޓަކައި މީޑިއާ ކެމްޕޭނެއް ފެށުމަށް ވެސް ރޭ މަޝްވަރާކުރި އެވެ.

މީގެ އިތުރުން ރިލްވާން ހޯދުމުގެ މަސައްކަތުގައި އެހީތެރިވުމަށްޓަކައި އޭނާއާ ބެހޭ ވީޑިއޯ ކްލިޕްތަކާއި އޯޑިއޯ ކްލިޕްތައް ބްރޯޑްކާސްޓްކުރުމަށާއި ވެބްސައިޓްތަކުގައި އިސްތިހާރުކުރަން ނިންމި އެވެ. އޭގެ އިތުރުން ރިލްވާނާ ގުޅޭ ވީހާ ވެސް ގިނަ ލިޔުންތައް ޝާއިކުރުކުރުމާއި ބްރޯޑްކާސްޓްކުރުމަކީ މުހިންމު ކަމެއް ކަމަށް ނޫސްވެރިން ފާހަގަކުރި އެވެ. އަދި ރިލްވާންގެ މައްސަލައިގެ ތަހްގީގު އަވަހަށް ނިންމައި، އޭނާ އަށް ވީގޮތެއް އާންމުންނަށް އެންގުމަށް ބާރު އެޅުމުގެ ގޮތުން ކުރެވެން ހުރި ކަންކަން ކުރިއަށް ގެންދިއުމަށް ވެސް ނިންމި އެވެ.

“މިކަމުގައި އަޅުގަނޑުމެން ވަރަށް އަވަހަށް މަސައްކަތަކެއް ކުރަން އެބަޖެހޭ. މިއީ ކުޑަ ގޮތަކަށް ދޫކޮށްލެވޭނެ މައްސަލައެއް ނޫން،” ސަން އޮންލައިންގެ ޗީފް އެޑިޓަރު އަދި މޯލްޑިވްސް ޖާނަލިސްޓް އެސޯސިއޭޝަން ރައީސް އަހްމަދު ޒާހިރު (ހިރިގާ) ރޭ ބައްދަލުވުމުގައި ވިދާޅުވި އެވެ.

“މޮޔަމީހާ” ގެ ނަމުން ސޯޝަލް މީޑިއާގައި މަޝްހޫރުވެފައިވާ ރިލްވާން މި މަހުގެ ހަތް ވަނަ ދުވަހުގެ ރޭން ފެށިގެން ގެއްލިފައިވާއިރު، ނޫސްވެރިންނަށް ކުރިން ދީފައިވާ އަނިޔާތަކާއި ނޫސް އިދާރާތަކަށް ގެއްލުންދިން ފަރާތްތަކަށް އެކަމުގެ ހައްގު އަދަބު ދިނުން ލަސްވަމުންދާތީ އެކަމުގެ ކަންބޮޑުވުން ވެސް ނޫސްވެރިން ރޭ ފާޅުކުރި އެވެ.

މި މަސައްކަތްތައް ކުރިއަށް ގެންދިއުމަށްޓަކައި މީޑިއާގެ ހުރިހާ ފަރާތްތަކެއް ތަމްސީލުވާ ކޮމިޓީއެއް ރޭ ވަނީ އެކުލަވާލާފަ އެވެ. މިކޮމިޓީގެ ފުރަތަމަ ބައްދަލުވުން މިއަދު މެންދުރު 2:30 ގައި ސިޓީ ހޯލްގައި އޮންނާނެ އެވެ.