August 29, 2014

މިނިވަން ނިއުސްގެ ނޫސްވެރިޔާ އަހްމަދު ރިލްވާން، 28، ގެއްލުނު މައްސަލާގައި ފުލުހުން އަމަލުކޮށްފައިވާ ގޮތް ސާފުކުރުމަށް އެދި ޕެޓިޝަނެއްގައި މިއަދު ސޮއިކުރަން ފަށައިފި އެވެ.

ރިލްވާންގެ އާއިލާ އާއި އޭނާގެ އެކުވެރިން އިސްނަގައިގެން ތައްޔާރުކުރާ މި ޕެޓިޝަންގައި ސޮއިކުރަން ފެށީ މިއަދު ހަވީރު އާޓިފިޝަލް ބީޗު ސަރަހައްދުގަ އެވެ. ރިލްވާންގެ މަންމަ އާއި ތިމާގެ މީހުން އަދި އޭނާގެ އެކުވެރިން ބައިވެރިވި މި ހަރަކާތުގައި، އާންމުންގެ ގިނަ އަދަދެއްގެ ބަޔަކު ޕެޓިޝަންގައި ސޮއިކުރި އެވެ.

ޕެޓިޝަންގައި ސޮއިކުރަމުން ދިޔައިރު، ރިލްވާންގެ ފޮޓާ ޖަހާފައިވާ ޓީޝާޓް ޕްރިންޓްކޮށް ބަހަމުންދިޔަ އެވެ.

ރިލްވާން ގެއްލުނު މައްސަލާގައި މަޖިލީހުގެ ކޮމިޓީ އަށް ހުށަހަޅާ ޕެޓިޝަންގައި މިއަދު ބަޔަކު ސޮއިކުރަނީ.—ހަވީރު ފޮޓޯ: ނިޝާން އަލީ
ރިލްވާން ގެއްލުނު މައްސަލާގައި މަޖިލީހުގެ ކޮމިޓީ އަށް ހުށަހަޅާ ޕެޓިޝަންގައި މިއަދު ބަޔަކު ސޮއިކުރަނީ.—ހަވީރު ފޮޓޯ: ނިޝާން އަލީ
ރައްޔިތުންގެ މަޖިލީހުގެ ގައުމީ ސަލާމަތާބެހޭ ކޮމިޓީ އަށް ހުށަހަޅަން ތައްޔާރުކުރާ ޕެޓިޝަންގައި، ރިލްވާންގެ ގެއްލުމާ ގުޅޭ ގޮތުން އުފައްދާފައިވާ ގިނަ ސުވާލުތަކަކަށް ޖަވާބު ހޯދައި ދިނުމަށް އެދިފައިވެ އެވެ.

އެ ސުވާލުތަކުގެ ތެރޭގައި ރިލްވާނަށް ލިބުނު މަރުގެ އިންޒާރުތަކާ ގުޅޭ ގޮތުން ފުލުހުން މަސައްކަތް އަމަލުކޮށްފައިވާ ގޮތާއި އެ ކަންކަމުގައި އެއްވެސް ބަޔަކަށް ތުހުމަތު ކުރެވި ސުވާލު ކޮށްފައިވާތޯ ސާފުކުރުމަށް އެދިފައިވެ އެވެ.

ރިލްވާން ގެއްލުނު ރޭ، ހުޅުމާލޭގައި އޭނާ ދިރިއުޅޭ އެޕާޓްމަންޓްގެ ކުރިމަތިން މީހަކު ގަދަކަމުން ކާރަކަށް އަރުވައިގެން ގެންދިޔަ މަންޒަރު ފެނުނު މައްސަލާގައި ފުލުހުން އަމަލުކުރީ، އެފަދަ މައްސަލައެއްގައި އަމަލުކުރަން އޮންނަ އުސޫލުތަކާ އެއްގޮތަށް ތޯ އާއި އެއީ ކާކުތޯ ޔަގީން ކުރަން އާންމުންގެ އެހީތެރިކަން ހޯދަން ފުލުހުން، އެކަން އާންމު ނުކުރީ ކީއްވެގެންތޯ އަދި އެ މީހާ ކާރަކަށް އަރުވައިގެން ގެންދިޔަ މައްސަލާގައި ފުލުހުން ތަހްގީގުނކޮށްފައިވަނީ ކޮންގޮތަކަށްތޯ ބަލައި ދިނުމަށް ވެސް ޕެޓިޝަންގައި އެދިފައިވެ އެވެ. އަދި ގަދަކަމުން ކާރަށް އެރުވީ ރިލްވާންތޯ ކަށަވަރުވޭތޯ އާއި އެ ރޭ ހުޅުމާލޭގެ ލަފާ ފުރާ ހުރިހާ ހިސާބެއް ފުލުހުންގެ ބެލުމުގެ ދަށަށް ގެންދިޔަތޯ އޮޅުން ފިލުވައި ދިނުމަށް ވެސް އެދިފައިވެ އެވެ.

ސޯޝަލް މީޑިއާގައި “މޮޔަމީހާ” ގެ ނަމުން މަޝްހޫރުވެފައިވާ ރިލްވާން، މި މަހުގެ ހަތް ވަނަ ދުވަހުގެ ރެ އިން ފެށިގެން ގެއްލިފައި ވާއިރު، އޭނާ އަށް ވީ ހިކިނެއް ކަމެއް އަދި ނުހޯދެ އެވެ. މި މައްސަލާގައި ފުލުހުން ބެލުމުގެ ދަށަށް ކާރެއް ގެންގޮސަފައި ވާއިރު، ހަތަރު މީހެއްގެ ޕާސްޕޯޓް ވަނީ ހިފަހައްޓައިފަ އެވެ. ނަމަވެސް އެއްވެސް މީހަކު އަދި ހައްޔަރުކުރި ކަމެއް ފުލުހުން ނުބުނެ އެވެ.

ރިލުވާން ހޯދުމުގެ މަސައްކަތް ހަލުވިކަމާ އެކު ކުރިއަށް އެބަދާ ކަމަށާއި އޭނާ ގެއްލުނު މައްސަލައިގައި މިހާތަނަށް ދުއިސައްތައެއްހާ މީހުންނާ ސުވާލުކޮށް 80 އަށް ވުރެ ގިނަ މީހުންގެ ބަޔާން ނަގާފައިވާ ކަމަށް ފުލުހުން ރޭ ބުނެފައިވެ އެވެ.