August 27, 2014

މިނިވަން ނިއުސްގެ ނޫސްވެރިޔާ އަހުމަދު ރިލްވާން ގެއްލިފައިވާ މައްސަލަޔާ ގުޅުން ހުރި ކަމަށް ޝައްކު ކުރެވޭ ކާރެއް ފުލުހުންގެ ބެލުމުގެ ދަށަށް ގެންގޮސްފި އެވެ.

ރިލްވާން ގެއްލުނު ރޭ، އޭނާ ދިރިއުޅެމުން ދިޔަ ފްލެޓް ކުރިމަތިން ގަދަކަމުން މީހަކު ކާރަކަށް އެރުވި މަންޒަރު އެހެން ފްލެޓެއްގައި ދިރިއުޅުނު މީހަކަށް ވަނީ ފެނިފަ އެވެ. އަދި އެ ރޭ އެކަން ފުލުހުންނަށް ވަނީ ރިޕޯޓް ވެސް ކޮށްފަ އެވެ. ރިލްވާން ގެއްލުމާ ގުޅޭ ގޮތުން ކުރާ ތަހުގީގުގައި ފުލުހުން އަންނަނީ އެ މައްސަލަ ވެސް ބަލަމުންނެވެ.

“ހަވީރަ”ށް އެނގިފައިވާ ގޮތުގައި ރިލްވާންގެ މައްސަލައާ ގުޅުން ހުރި ކަމަށް ބެލެވިގެން ފުލުހުންގެ ބެލުމުގެ ދަށަށް ކާރެއް ގެންދިޔައީ މިދިޔަ ހަފުތާގަ އެވެ. އަދި ކާރާ ގުޅުން ހުރި ފަރާތްތައް ފުލުސް އޮފީހަށް ހާޒިރުކޮށް ސުވާލު ވެސް ކޮށްފައިވާ ކަމަށް އެނގިފައިވެ އެވެ.

ނަމަވެސް އެކަމާ ގުޅިގެން ފުލުހުން އެއްވެސް އެއްޗެއް ބުނަން ބޭނުމެއް ނުވެ އެވެ. ފުލުހުން ބުނީ ރިލްވާން ހޯދުމަށް ކުރަން ޖެހޭ މަސައްކަތްތައް ވަރަށް ބާރަށް ކުރިއަށް ގެންދާ ކަމަށެވެ.

ރިލްވާން ގެއްލުނު މައްސަލަޔާ ގުޅުން ހުރި ހަތަރު މީހެއްގެ ޕާސްޕޯޓް ވެސް އިމިގްރޭޝަނުން މިއަދު ވަނީ ހިފަހައްޓައިފަ އެވެ.

ރިލްވާން އެންމެ ފަހުން ފެނިފައި ވަނީ މި މަހުގެ ހަތް ވަނަ ދުވަހުގެ ރޭ 12:45 އެހާއިރު މާލޭގައި ހުންނަ ހުޅުމާލެ ފެރީ ޓާމިނަލަށް ވަންނަނިކޮށެވެ. އޭގެ ފަހުން ރިލްވާންގެ ހަބަރެއް ނުވާ އިރު، އޭނާ އަށް ވީ ގޮތެއް އަދިވެސް ނޭނގެ އެވެ. އޭނާ ފެނޭތޯ ހުޅުމާލެ ކަނޑުގެ ސަރަހައްދާއި ބައެއް ތަންތަން ވެސް އަންނަނީ ބަލައި ފާސްކުރަމުންނެވެ.