August 27, 2014

މިނިވަން ނިއުސްގެ ނޫސްވެރިޔާ އަހުމަދު ރިލްވާން ގެއްލިގެން އުޅޭ މައްސަލާގައި ހަތަރު މީހެއްގެ ޕާސްޕޯޓް އިމިގްރޭޝަނުން ހިފަހައްޓައިފި އެވެ.

“ހަވީރަ”ށް އެނގިފައިވާ ގޮތުގައި އެ ހަތަރު މީހުންގެ ޕާސްޕޯޓް ހިފެހެއްޓީ މިއަދެވެ. އެކަމަކު އެ ކަމާ ބެހޭ ގޮތުން ފުލުހުން އަދި ވަކި އެއްޗެއް ނުބުނެ އެވެ.

ހުޅުމާލޭގައި ދިރިއުޅޭ ރިލްވާން މި މަހުގެ ހަތް ވަނަ ދުވަހުގެ ރޭ ދަންވަރު 12:45 ހާއިރު، ހުޅުމާލޭ ފެރީ ޓާމިނަލަށް ވަން މަންޒަރު ސީސީޓީވީ ފުޓޭޖުން ފެނުނު ނަމަވެސް، ހުޅުމާލެ އަށް ދިއުމަށް އޭނާ ފެރީއަށް އެރިކަން ނުވަތަ ހުޅުމާލެއަށް ފޭބިކަން ކަށަވަރު ނުކުރެވޭ ކަމަށް ފުލުހުން ވަނީ ބުނެފަ އެވެ.
މަރުގެ އިންޒާރުތައް ވެސް ލިބިފައިވަނިކޮށް ގެއްލުނު، ސޯޝަލް މީޑިއާގައި “މޮޔަމީހާ” ގެ ނަމުން މަޝްހޫރުވެފައިވާ ރިލްވާނު ގެއްލުނުގެ މައްސަލައިގެ ތަހްގީގާ ގުޅޭ ގޮތުން ފުލުހުން ބުނެފައިވާ ގޮތުގައި ރިލްވާންގެ ފޯންގެ ސިގްނަލް އެންމެ ފަހުން ލިބުނީ ހަތް ވަނަ ދުވަހުގެ ރޭ މެންދަމު 2:30 ގައި ހެންވޭރުގެ ސަރަހައްދަކުންނެވެ. އަދި އެންމެ ފަހުން ފޯން ކޯލެއް ކޮށްފައިވަނީ އެ ރޭ 10:19 ގައި ކަމަށް ވެސް ފުލުހުން ވަނީ ބުނެފަ އެވެ. ނަމަވެސް އެ ކޯލްކޮށްފައި ވަނީ ކާކަށް ކަމެއް ފުލުހުން ނުބުނެ އެވެ.

ރިލްވާން ހޯދުމަށްޓަކައި ފުލުހުން ވަނީ ބައެއް ތަންތަން ފާސްކޮށްފަ އެވެ.