August 24, 2014

ގެއްލިގެން ހޯދަމުންދާ މިނިވަން ނޫހުގެ ނޫސްވެރިޔާ އަހުމަދު ރިލްވާން ފެންނަން ދެން މުޒާހަރާކޮށް، ޖަލަށް ދާން ވެސް ތައްޔާރަށް ހުންނެވި ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ރައީސް ނަޝީދު މިއަދު ކުރެއްވި ޓްވީޓެއްގައި ބުނެފައިވަނީ ރިލްވާން ފެންނަން ދެން ނުވަތަ އެކަމަށް ޒިންމާވާ މީހުން އިންސާފުގެ ކުރިމައްޗަށް ގެނެވެންދެން މުޒާހަރާކޮށް ޖަލަށް ދާން ވެސް ތައްޔާރަށް ހުންނެވި ކަމަށެވެ.

ކުރިން ނޫސްވެރިއެއްގެ ގޮތުގައި މަސައްކަތް ކުރެއްވި ރައީސް ނަޝީދު ވަނީ ރިލްވާނު ގެއްލުުނު މައްސަލާގައި ސަރުކާރަށް ވަރަށް ބޮޑަށް ފާޑު ވިދާޅުވެ ޓްވީޓް ކުރައްވާފައެވެ. އެގޮތުން ރިލްވާނު ގެއްލިގެން އެންމެހާ ފަރާތްތަކުން ކަންބޮޑުވުން ފާޅުކުރާއިރު ރައީސް އަބްދުﷲ ޔާމީން އަބްދުލް ގައްޔޫމް ވިދާޅުވާނެ އެއްޗެއް ނެތުމުން ދޭހަވަނީ މިކަން ފޮރުއްވަވާކަން ކަމަށް ވެސް ވަނީ ޓްވީޓް ކުރައްވާފައެވެ.

އިދިކޮޅު އެމްޑީޕީ އިން ވަނީ ރިލްވާން ގެއްލުނު މައްސަލަ ކުއްލި މައްސަލައެއްގެ ގޮތުގައި މަޖިލީހަށް ވައްދައި، މަޖިލީހުގެ ތިން ކޮމެޓީ އަކަށްވެސް އެ މައްސަލަ ވައްދާފައެވެ.

ރިލްވާނު އަށް ވީނުވީއެއް ނޭނގި ގެއްލުނުތާ މިއަދަށް 16 ދުވަސް ވެފައިވާއިރުވެސް އޭނާ އަށް ވީ ގޮތެއް ވަނީ ހޯދައި ނުގަނެވިފަ އެވެ. އޭނާ ހޯދުމަށް ފުލުހުން ވަނީ ހުޅުމާލެ ބެލުމުގެ އިތުރުން ހުޅުމާލޭ ކަނޑުގެ ސަރަހައްދުވެސް ފީނައިގެން ބަލާފައެވެ. ފުލުހުން ބުނީ ރިލްވާން ހޯދުމަށް ހުޅުމާލެ ފަޅުގެ ބޮޑު ސަރަހައްދަކާއި ވަށައިގެންވާ އުރަފަށުގެ ބޮޑުބައެއް ބަލާ ފާސްކޮށްފައިވާކަމަށާއި މާލެއާ ކައިރި ފަޅު ރަށްތަކާއި އަތޮޅު ތެރޭގެ ރަށްރަށްވެސް މިހާތަނަށް ބަލައި ފާސްކޮށްފައިވާކަމަށް ފުލުހުން ބުނެއެވެ.

ރިލްވާން އެންމެ ފަހުން ފެނިފައިވަނީ މިމަހުގެ ހަތްވަނަ ދުވަހުގެ ރޭ އެކެއް ޖަހަން ކައިރިވެފައިވަނިކޮށް މާލޭގައި ހުންނަ ހުޅުމާލޭ ފެރީ ޓާމިނަލުން ކަޅު ގަމީހަކާއި، ތިރިން ކަޅު ކުލައިގެ އެއްޗެއް ލައިގެން ހުއްޓައެވެ.