August 29, 2014

ގެއްލިފައިވާ ނޫސްވެރިޔާ އަހުމަދު ރިލްވާންގެ މައްސަލައިގައި އޭނާ ހޯދަން ކުރާ މަސައްކަތުގައި ކަންބޮޑުވާ ގިނަ ކަންތައްތަކެއް ފާހަގަކޮށް ޕެޓިޝަނެއްގައި ސޮއި ކުރަން ފަށައިފި އެވެ.

ރިލްވާންގެ އާއިލާ އާއި ބައެއް ނޫސްވެރިންނާއި އާންމުން އިސްވެތިބެ، ތައްޔާކުރާ ޕެޓިޝަންގައި ރިލްވާންގެ މައްސަލައިގައި އޭނާ ހޯދުމަށް ފުލުހުން ކުރާ މަސައްކަތުގައި ބަލައި ގަނެވޭ އަދި އެކަށީގެންވާ ހޯދުންތަކެއް ހޯދައި މަސައްކަތްތަކެއް ކޮށްފައި ނުވާކަން ފާހަގަކޮށް ބައެއް ސުވާލު އުފައްދާ ފައިވެ އެވެ. އަދި ފުލުހުންނާއި ކަމާބެހޭ އެހެން ފަރާތްތަކުން މިހާތަނަށް ކަންކޮށްފައިވާ ގޮތުން މިކަމުގައި ހުރި ކަން ބޮޑުވުންތައް ފާހަކޮށް ވީހާވެސް މައުލޫމާތުގެ ހާމަ ކުރުން ބޮޑު ތަހުގީގެއް ކުރިޔަށް ގެންގޮސް މިހާތަނަށް އެއް ކުރެވިފައިވާ މައުލޫމާތު ތައް ސާފުކޮށްދޭށާއި ފުރިހަމަ ތަހުގީގެއްކޮށް ދިނުމަށް ގޮވާލާފައި ވެއެވެ.

މި ޕެޓިޝަންގައި ސޮއި ކުރަން އާންމުންނަށް ހުޅުވާލީ މިއަދު ހަވީރ 4:00 ޖެހި އިރު އާޓިފިޝަލް ބީޗްގަ އެވެ.

ރިލްވާންގެ އާއިލާގެ ފަރާތުން އޭނާގެ ބޭބެ މޫސާ ރިލްވާން މިއަދު ބުނީ ހަވީރު 4:00 އިން މިއަދު އިރު އޮއްސި 6:30 ހަމައަށް ދިޔައިރު ގިނަ އަދަދެއްގެ ބަޔަކު ޕެޓިޝަންގައި ސޮއިކޮށްފައިވާ ކަމަށައި ރައްޔިތުންގެ މަޖިލީހަށް ހުށަހަޅާ ޕެޓިޝަން މަޖިލީހާ ހަމައަށް ގެންދަނީ ވީހާވެސް ގިނަ ބަޔަކަށް ޕެޓިޝަންގައި ސޮއި ކުރުމުގެ ފުރުސަތު ދިނުމަށްފަހު ކަމަށެވެ.

“މި ޕެޓިޝަންގައި ރިލްވާން ގެއްލުނު މައްސަލައިގައި ކަންބޮޑުވާ ހުރިހަ ކަމެއް ބަލައި ދިނުމަށް، އެދިފައިވާނެ. ޕެޓިޝަން މަޖިލީހާ ހަމައަށް ގެންދާނީ ވީހާވެސް ގިނަ ބަޔަކަށް ސޮއި ކުރުމުގެ ފުރުސަތު ދިނުމަށްފަހު އެހެންވީމާ އަދި މިކަމުގައި ދެތިން ދުވަސް ވެދާނެ. މިއަދު ވެސް ވަރަށް ގިނަ ބަޔަކު ސޮއިކޮށް ވަރަށް ބޮޑު ތަރުހީބެއް ދިން،” މޫސާ ރިލްވާން ބުންޏެވެ.

މިއަދު އާޓިފިޝަލް ބީޗްގައި ޕެޓިޝަންގައި ސޮއި ކުރަން ފެށުމާއެކު އެ ސަރަހައްދަށް ގިނަ އަދަދެއްގެ މީހުންނާ ނޫސްވެރިން ޖަމާވެ ވަނީ ޕެޓިޝަންގައި ސޮއިކޮށްފަ އެވެ.

މީގެ އިތުރުން ރިލްވާންގެ މައްސަލައަށް ފަހު، މީހުން ގެއްލުމާ ދެކޮޅަށް ފަށާ ކެމްޕޭނެއްގެ ޓީޝާޓެއް ވެސް އެ ސަރަހައްދުގައި ޕްރިންޓްކޮށް މިއަދު ހަވީރު ވަނީ ހިލޭ ބަހާފަ އެވެ. އެއީ ރިލްވާންގެ ފޮޓޯއެއް ހިމެނޭ ގޮތަށް، “މިއަދު ރިލްވާން ގެއްލުވާލީ! ދެން އަހަރެންބާ؟” ޖަހާފައިވާ ޓީޝާޓެކެވެ. އެ ސަރަހައްދަށް އެއްވި ވަރަށް ގިނަ ބަޔަކު މިއަދުވަނީ އެ ޓީޝާޓް ހޯދައި ބޭނުންކޮށްފަ އެވެ.

މިއަދު ފެށި ހަރަކާތުގައި ރިލްވާންގެ މަންމަ އާއި އާއިލާގެ މެންބަރުންނާއި އޭނާގެ ރައްޓިހިންނާއި ނޫސްވެރިންނާއި ވަރަށް ގިނަ އާންމުން ބައިވެރިވި އެވެ.