August 28, 2014
ގެއްލިފައިވާ ނޫސްވެރިޔާ އަހުމަދު ރިލްވާން ހޯދުމުގެ މަސައްކަތުގެ ތަހުގީގާ ގުޅޭ މައުލޫމާތު ސާފުކުރަން ކޮމިޝަނާ އޮފް ޕޮލިސް ހުސައިން ވަހީދު ހާޒިރުކޮށް ސުވާލު ކުރަން މިރޭ ބޭއްވި ރައްޔިތުންގެ މަޖިލީހުގެ ގައުމީ ސަލާމަތުގެ ކޮމިޓީ ސިއްރުކޮށްފި އެވެ.
އެގާރަ މެމްބަރުން ހިމެނި ވަޑައިގަންނަވާ އެ ކޮމިޓީގެ ބައްދަލުވުން މިރޭ 7:30 އަށް ސެޑިއުކޮށްފައި އޮތް އިރު ކޮމެޓީ އަޑު އެހުމަށް ނޫސްވެރިން ދިއުމުން މަޖިލީހުން ވަނީ ކޮމެޓީ ސިއްރުކޮށްފައިވާ ކަމަށް އަންގާފަ އެވެ. ނަމަވެސް ސަބަބެއް ނުބުނެ އެވެ.
މިރޭ ކޮމެޓީގައި ކުރިއަށް ގެންދަން އޮތީ މިނިވަން ނިއުސްގެ ރިލްވާންގެ މައްސަލައިގެ ތަހުގީގާ ގުޅޭ ގޮތުން ކޮމިޝަނާއާ ސުވާލު ކުރުމެވެ. ވީ ނިއުސްއަށް މައުލޫމާތު ލިބިފައިވާ ގޮތުގައި މިރޭ ކޮމެޓީގައި ދައްކާފައިވާ ގިނަ ވާހަކަތަކަކީ މިހާރު ވެސް ނޫސްތަކުގައި ތިލަކޮށްފައި ހުރި ވާހަކަތަކެވެ.
މި ރޭ ކޮމެޓީ ސިއްރު ކުރި އިރު އެންމެ ފަހުން ބޭއްވި މި ކޮމިޓީގެ ބައްދަލުވުމުގައި މައްޗަންގޯޅި އުތުރު ދާއިރާގެ މެމްބަރު މާރިޔާ އަހުމަދު ދީދީ ވަނީ ކޮމިޓީ ސިއްރު ނުކޮށް ކުރިއަށް ގެންދިއުމަށް ހުށައަޅާފަ އެވެ. އެދުވަހު ކޮމިޓީގައި މާރިޔާ ވިދާޅުވީ ރިލްވާން ގެއްލުމާއި އޭނާ ހޯދަން ކުރާ މަސައްކަތަކީ ރައްޔިތުންނާ ވަރަށް ބޮޑަށް ގުޅިފައިވާ މައްސަލައަކަށްވާތީ ވީހާވެސް ހާމަކޮން ބޮޑުކޮށް ކޮމިޓީ ކުރިއައް ގެންދަން އެދި ވަޑައިގަންނަވާ ކަމަށެވެ. ނަަމަވެސް އެދުވަހުގެ ކޮމިޓީގައި ވެސް އެ ހުށައެޅުމަށް ވޯޓަށް އަހާފައެއް ނުވެއެވެ.
މި މައްސަލައިގައި ކޮމިޝަނާގެ އިތުރުން ހޯމް މިނިސްޓަރު އުމަރު ނަސީރު ވެސް ވަނީ މި ކޮމިޓީއަށް ހާޒިރު ކުރަން ނިންމާފަ އެވެ. ނަމަވެސް އުމަރު މިވަގުތު ހުންނެވީ ސިންގަޕޫރުގަ އެވެ.
ރިލްވާން ގެއްލުނު މައްސަލަ ގައުމީ ސަލާމަތާ ބެހޭ ކޮމިޓީގެ އިތުރުން ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއާއި ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އަށް ވެސް އިދިކޮޅު އެމްޑީޕީން ވަނީ ހުށަހަޅާފަ އެވެ.
ރިލްވާން ގެއްލުނީ މިމަހުގެ ހަތްވަނަ ދުވަހު އެވެ. އޭނާ ގެއްލުނު ފަހުން މިއަދަށް 20 ދުވަސް ވެފައިވާއިރު މައްސަލައާ ގުޅިގެން ހަތަރު މީހެއްގެ ޕާސްޕޯޓް ހިފަހައްޓައި ކާރެއް ވެސް ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ. ހުޅުމާލޭގައި ރިލްވާން އުޅުނު އެޕާޓްމަންޓް ކައިރިން ރިލްވާން ކަމަށް ބެލެވޭ މީހަކު ގަދަކަމުން ކާރަކަށް އެރުވި މަންޒަރު ބައެއް މީހުންނަށް އެ ރޭ ދަންވަރު ފެނުނެވެ.