August 27, 2014

ނޫސްވެރިޔާ އަހުމަދު ރިލްވާން ގެއްލިގެން އުޅޭތާ 19 ދުވަސް ފަހުން އެ މައްސަލައިގައި ތުހުމަތުވާ ހަތަރު މީހެއްގެ ޕާސްޕޯޓް އިމިގްރޭޝަނުން މިއަދު ހިފަހައްޓައިފި އެވެ.

އެ ހަތަރު މީހުންގެ ޕާސްޕޯޓް ހިފެހެއްޓިކަން ކަށަވަރުވި ނަމަވެސް ފުލުހުންނާއި އިމިގްރޭޝަނާ ސުވާލު ކުރުމުން މިއަދު އެ މައްސަލައާ ގުޅޭ އެއްވެސް ޖަވާބެއް ނުދިނެވެ. ނަމަވެސް ވީ އޮންލައިނަށް އެނގިފައިވާ ގޮތުގައި އެ ހަތަރު މީހުންގެ ޕާސްޕޯޓް ހިފެހެއްޓީ އެކަމާ ގުޅޭގޮތުން އިތުރު ތަހުގީގުތައް ކުރުމަށެވެ.

ރިލްވާން ގެއްލުނީ މި މަހުގެ ހަތް ވަނަ ދުވަހުގެ ރޭ ދަންވަރު 12:45 އެހާއިރުން ފެށިގެނެވެ.

އެ ރޭ އޭނާ ފެރީ ޓާމިނަލުން ޓިކެޓް ގަނެގެން ފެރީއަށް އެރުމަށް ދާ މަންޒަރު މާލޭގެ ޓާމިނަލްގެ ސީސީޓީވީ މަންޒަރުތަކުން ވަނީ ފެނިފަ އެވެ. ނަމަވެސް އޭނާ އެރޭ ފެރީއަށް އެރި ކަމާއި އަދި އޭނާ ހުޅުމާލެއަށް ދިޔަކަން ޔަގީން ނުވާ ކަމަށް ފުލުހުން ބުނެ އެވެ. ރިލްވާން ފެނޭތޯ ރާއްޖޭގެ ހުރިހާ ރަށެއް ވެސް މިހާރު ބަލާފައިވާ ކަމަަށް ފުލުހުން ބުނެ އެވެ.

ރިލްވާން ހޯދުމަށް ކުރަމުންދާ މަސައްކަތުގައި އޭނާގެ އާއިލާއިން ވަނީ ރައްޔިތުންގެ މަޖިލީހުގެ އެހީތެރިކަމަށް ވެސް އެދިފަ އެވެ. ރިލްވާންއާ ބެހޭ އެއްވެސް މައުލޫމާތެއް އާއިލާއަށް ނުވަތަ ފުލުހުންނަށް ދީފިނަމަ ބަދަލެއްގެ ގޮތުން ދެ ލައްކަ ރުފިޔާ ދިނުމަށް އާއިލާއިން ވަނީ ހުށަހަޅާފަ އެވެ.