August 14, 2014

މީގެ ހަފުތާއެއްހާ ދުވަސް ކުރިން ގެއްލުނު “މިނިވަން ނިއުސް” ގެ ނޫސްވެރިޔާ އަހުމަދު ރިލްވާން ރާއްޖެ އިން ބޭރަށް ފުރާފައި ނުވާ ކަމަށް ފުލުހުން ބުރާސްފަތި ދުވަހު މިއަދު ބުނެފި އެވެ.

ރިލްވާން ގެއްލިފައި ވަނީ މި މަހުގެ ހަތް ވަނަ ދުވަހުގެ ރެއިން ފެށިގެން ކަމަށް އޭނާގެ އާއިލާ އިން ބުނެ އެވެ.

މީގެ ކުރިން ޖަޒީރާ އާއި މިއަދު ނޫހުގައި ވެސް މަސައްކަތް ކުރި ރިލްވާނު ހޯދުމަށް ފުލުހުން ކުރާ މަސައްކަތާ ގުޅޭ ގޮތުން ފުލުުންގެ އޮފިޝަލަކު ވިދާޅުވީ ރިލްވާން ގެއްލިފައިވާ ކަމަށް އާއިލާގެ ފަރާތުން ރަސްމީކޮށް ފުލުހުންނަށް ހުށަހެޅީ ބުދަ ދުވަހު ކަމަށެވެ. އަދި ގުޅިގެން ރިލްވާން ހޯދުމަށް ކުރަން ޖެހޭ ހުރިހާ މަސައްކަތެއް ފުލުހުން ކުރަމުން އަންނަ ކަމަށް ވެސް އޭނާ ވިދާޅުވި އެވެ. ރިލްވާން ރާއްޖެ އިން ބޭރަށް ވެސް ހިނގައިދާނެ ކަމަށް ބަލައި އިމިގްރޭޝަނުން އޭނާގެ ރެކޯޑްތައް ޗެކް ކުރި ކަމަށް އޮފިޝަލް ވިދާޅުވި އެވެ. ނަމަވެސް ރިލްވާން ރާއްޖެ އިން ބޭރަށް ނުދާކަން މިހާރު ކަށަވަރު ކުރެވިފައިވާ ކަމަށް ވެސް އޮފިޝަލް ވިދާޅުވި އެވެ.

“ރިލްވާން ހޯދުމަށް ކުރަން ޖެހޭ މަސައްކަތްތައް މި އަންނަނީ ކުރަމުން. ހަމަ ގައިމު ވެސް ރިލްވާން ރާއްޖޭން ބޭރަކަށް ނުފުރާ. ރިލްވާން ހޯދުމަށް އެހެން ވެސް އިތުރު ގޮތްތައް މި އަންނަނީ ބަލަމުން،” އޮފިޝަލް ވިދާޅުވި އެވެ.

ސޯޝަލް މީޑިއާގައި ، “މޮޔަމީހާ”ގެ ނަމުން މަޝްހޫރު ވެފައިވާ ރިލްވާން އެންމެ ފަހުން އޭނާގެ އާއިލާއާ ބައްދަލުވެފައި ވަނީ މި މަހުގެ ހަތް ވަނަ ދުވަހުގެ ރޭ 10:00 ހާކަން ހާއިރު އެވެ. ހުޅުމާލޭގައި ކޮޓަރިއެއް ހިފައިގެން އެކަނި ދިރިއުޅޭ ރިލްވާން މާލޭގައި ހުންނަ އޭނާގެ ދައްތަގެ ގެއަށް ގޮސް އެ އާއިލާއާ އެކު ވަގުތު ހޭދަ ކުރި ކަމަށް ވެސް ރިލްވާންގެ ދައްތަ ވަނީ ބުނެފަ އެވެ.

އެ ރޭގެ ފަހުން ރިލްވާންގެ ފޯނަކަށް ވެސް ނުގުޅެ އެވެ. އަދި އޭނާ މަސައްކަތް ކުރާ މިނިވަން ނިއުސް އިން ވެސް ބުނީ މި މަހުގެ ހަތް ވަނަ ދުވަހުގެ ފަހުން ރިލްވާން އެ އޮފީހުގެ މަސައްކަތަށް ވެސް ނުނިކުންނަ ކަމަށެވެ. އަދި އޭނާ ދިރިއުޅޭ އެޕާޓްމަންޓް ބެލިއިރު އެތަނުގައި ވެސް ރިލްވާން ނެތް ކަމަށް އާއިލާ އިން ބުންޏެވެ.

މިނިވަން ނިއުސް އިން ބުނެފައި ވަނީ، ރިލްވާން އެންމެ ފަހުން ލައިގެން ހުރި ކަމަށް ވަނީ ޓާކޮއިޝް ކްލައިގެ ޓީޝާޓަކާއި ކަޅު ކުލައިގެ ފަޓްލޫނެއް ކަމަށެވެ.

ޝޯޝަލް މީޑިއާގައި ރިލްވާން ފާޅު ކުރާ އެކި ޝުއޫރުތަކާ ގުޅިގެން އެކި ފަހަރު އޭނާ އަށް އިންޒާރުތަކާއި ޕްރެޝަރާ ކުރިމަތިވެފައިވެ އެވެ. ރިލްވާން ހޯދުމަށް އޭނާގެ ރަހުމަތްތެރިން މިހާރު ވަނީ ހާއްސަ ހަރަކާތްތަކެއް ފެށުމަށް ނިންމައިފަ އެވެ.