August 24, 2014
މި މަހުގެ ހަތް ވަނަ ދުވަހުން ފެށިގެން ވީނުވީއެއް ނޭނގި ގެއްލުނު މިނިވަން ނިއުސްގެ ޖާނަލިސްޓް އަހުމަދު ރިލްވާން ހޯދުމަށް ގެސްޓު ހައުސްތަކާއި ބައެއް އުޅަނދުތަކާއި ރަށްތައް ވެސް ބަލަމުން އަންނަ ކަމަށް ފުލުހުން މިއަދު ބުނެފި އެވެ.
ރިލްވާން ހޯދަން ކުރާ މަސައްކަތްތަކާ ގުޅޭ ގޮތުން ފުލުހުން ނެރުނު ނޫސް ބަޔާނެއްގައި ބުނީ އޭނާ ހޯދަން ފުލުހުން ފަށާފައިވާ ހާއްސަ މަސައްކަތްތައް ހުއްޓުމެއް ނެތި ކުރަމުން އަންނަ ކަމަށެވެ. އެގޮތުން އޭނާ ހޯދުމަށް، ހުޅުމާލޭގައި މީހުން ދިރިއުޅޭ ސަރަހައްދުތަކާއި މީހުން ދިރިނޫޅޭ ސަރަހައްދުތައް ވެސް ބަލައި ފާސްކޮށް ނިމިފައިވާ ކަމަށް ފުލުހުން ބުންޏެވެ.
އެ ބަޔާނުގައި ބުނިގޮތުގައި ފުލުހުންނަށް ލިބޭ މައުލޫމާތުތަކުގެ މައްޗަށް ބިނާކޮށް، މީހުން ދިރިއުޅޭ ބައެއް ފްލެޓްތަކާއި ތަންތަނާއި ގެސްޓު ހައުސް ފަދަ ތަންތަން ވެސް މިހާރު އަންނަނީ ފާސްކުރަމުންނެވެ. ރިލްވާން ހޯދަން ހުޅުމާލެ ފަޅުގެ ބޮޑު ސަރަހައްދަކާއި ވަށައިގެންވާ އުރަފަށުގެ ބޮޑުބައެއް ވެސް ބަލާފައިވާ ކަމަށް ފުލުހުން ބުންޏެވެ.
“އަދި މާލެއާ ކައިރި ފަޅު ރަށްތަކާއި އަތޮޅު ތެރޭގެ އިތުރު ރަށްރަށް ވެސް މިހާތަނަށް ބަލައި ފާސްކޮށްފައިވާއިރު ބޮޑެތި ރަށްރަށަށް ވައިގެ މަގުންނާއި ކަނޑު މަގުން ދަތުރުކުރާ އުޅަނދުފަހަރާއި މާލެއާއި ހުޅުމާލޭގެ ފަޅުގައިހުރި ބައެއް އުޅަނދުތައް ވެސް މި ދަނީ ބަލައި ފާސްކުރަމުންނެވެ،” ފުލުހުންގެ ބަޔާނުގައިވެ އެވެ.
ރިލްވާން ހޯދުމަށް ފުލުހުން ކުރާ މަސައްކަތުގައި އެއްބާރުލުންދީ، އޭނާއާ ބެހޭ އެއްވެސް މައުލޫމާތެއް ލިބިފައިވާ ނަމަ ހިއްސާކޮށްދިނުމަށް ފުލުހުން އެދެ އެވެ.
ވީނުވީއެއް ނޭނގި ރިލްވާން ގެއްލިފައިވާއިރު، އޭނާގެ އާއިލާ އާއި މިނިވަން ނިއުސް އިން ވެސް ބުނެފައި ވަނީ ފަހަކަށް އައިސް ރިލްވާނަށް ވަރަށް ބޮޑެތި އިންޒާރުތަކާއި ޕްރެޝަރު އައިސްފައިވާ ކަމުގެ މައުލޫމާތު ލިބޭ ކަމަށެވެ. އަދި އޭނާ އަށް ބިރުދައްކާފައިވާ ކަމުގެ މައުލޫމާތު ލިބިފައިވާ ކަމަށް ހިއުމަން ރައިޓްސް ކޮމިޝަން (އެޗްއާރުސީއެމް) އިން ވެސް ވަނީ ބުނެފަ އެވެ.
އަދި ރިލްވާން ގެއްލުނު ރޭ، ހުޅުމާލޭގައި އޭނާ ދިރިއުޅެމުން އަންނަ އެޕާޓްމެންޓް ކައިރިން ގަދަކަމުން މީހަކު ވެހިކަލަކަށް އަރުވައިގެން ގެންދިޔަ މަންޒަރު ދެ މީހަކަށް ފެނިފައިވެ އެވެ. ކާރަށް ގަދަކަމުން މީހަކު އަރުވައިގެން ދިޔައިރު، ވެއްޓުނު ކަމަށް ބެލެވޭ ވަޅިއެއް ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް މަންޒަރު ދުށް މީހުން ވަނީ ބުނެފަ އެވެ.