August 28, 2014

މިމަހުގެ ހަތް ވަނަ ދުވަހުގެ ރެއިން ފެށިގެން ގެއްލިގެން ހޯދަމުންދާ މިނިވަން ނިއުސްގެ ނޫސްވެރިޔާ އަހްމަދު ރިލްވާނުގެ މައްސަލާގައި ޕޮލިސް ކޮމިޝަނަރު ހުސައިން ވަހީދު، ރައްޔިތުންގެ މަޖިލީހުގެ ގައުމީ ސަލާމަތާބެހޭ ކޮމިޓީއަށް މިރޭ ހާޒިރުކޮށްފި އެވެ.

މިރޭ 7:30 ގައި ބޭއްވި އެ ކޮމިޓީ އަށް ޕޮލިސް ކޮމިޝަނަރުގެ އިތުރުން އެސިސްޓެންޓް ކޮމިޝަނަރު އޮފް ޕޮލިސް ހަސަން ހަބީބު ވެސް ހާޒިރުކުރި އެވެ. ނަމަވެސް ބައްދަލުވުން ކުރިއަށް ގެންދިޔައީ ސިއްރުކޮށްގެންނެވެ. އެހެންވެ މީޑިއާ ވެސް އެ ބައްދަލުވުމަކަށް ނުވެއްދި އެވެ.

އުމުރުން 28 އަހަރުގެ ރިލްވާން ގެއްލުނު މައްސަލަ ކޮމިޓީ އަށް ހުށަހެޅީ އެމްޑީޕީންނެވެ.

“މެމްބަރުން ބޭނުންފުޅުވި ހުރިހާ ސުވާލަކަށް ސީޕީ ޖަވާބު ދެއްވި” ކަމަށް، ޕީޕީއެމްގެ އަޣުލަބިއްޔަތު އޮންނަ މި ކޮމިޓީގައި ހިމެނިވަޑައިގަންނަވާ އެ ޕާޓީގެ މެމްބަރަކު ވިދާޅުވި އެވެ.

ސީޕީގެ އިތުރުން ރިލްވާންގެ މައްސަލާގައި ހޯމް މިނިސްޓަރު އުމަރު ނަސީރު ވެސް ކޮމިޓީ އަށް ހާޒިރުކުރަން ވަނީ ނިންމައިފަ އެވެ. ނަމަވެސް މި ދުވަސްވަރު ހޯމް މިނިސްޓަރު މާލެއަކު ނޫޅުއްވަ އެވެ.

ރިލްވާން ގެއްލުނު މައްސަލަ ގައުމީ ސަލާމަތާ ބެހޭ ކޮމިޓީގެ އިތުރުން ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ރައްޔިތުންގެ މަޖިލީހުގެ ކޮމިޓީ އާއި ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އަށް ވެސް އިދިކޮޅު އެމްޑީޕީން ވަނީ ހުށަހަޅައިފަ އެވެ.

ރިލްވާން އެންމެ ފަހުން ފެނިފައިވަނީ މި މަހުގެ ހަތް ވަނަ ދުވަހުގެ ރޭ ހުޅުމާލެއަށް ދިއުމައްޓަކައި އެރޭ 12:45 ހާއިރު، މާލޭ ފެރީ ޓާމިނަލަށް ވަންނަނިކޮށެވެ. އެ މަންޒަރު ޓާމިނަލްގެ ސީސީޓީވީ ކެމެރާ އަށް ރެކޯޑްވެފައި ހުއްޓަސް، އެރޭ އޭނާ ހުޅުމާލެ އަށް ދިޔަ ކަމެއް ފުލުުހުން އަދި ކަށަވަރެއް ނުކޮށްދެ އެވެ. ނަމަވެސް އެރޭ 2:00 ހާއިރު، ރިލްވާން އުޅޭ އެޕާޓްމެންޓްގެ ކުރިމަތިން މީހަކު ގަދަކަމުން ކާރަކަށް އަރުވައިގެން ދިޔަ މަންޒަރު މީހަކަށް ފެނިފައިވެ އެވެ.