August 23, 2014

ގެއްލިގެން ހޯދަމުންދާ “މިނިވަން ނިއުސް” ގެ ނޫސްވެރިޔާ އަހުމަދު ރިލްވާންއާއި ގުޅޭ އެއްވެސް މައުލުމާތެއް ލިބިފައިވާ ފަރާތަކަށް ބައިލައްކަ ރުފިޔާގެ އިނާމެއް ދޭން ނިންމާފައިވާ ކަމަށް އޭނާގެ އާއިލާއިން ބުނެފިއެވެ.

“ވީ އޮންލައިން” އާއި މިއަދު ވާހަކަ ދައްކަމުން ރިލްވާމްގެ އެއްބަނޑު އެއްބަފާ ބޭބެ މޫސާ ރިލްވާން ބުނީ ރިލްވާން އާއި ގުޅޭ އެއްވެސް މައުލޫމާތެއްދީ އޭގެ އެއްވެސް ކުރިއެރުމެއް ފުލުހުންނަށް ލިބޭ ނަމަ އެ ފަރާތަކަށް ބައިލައްކަ ރުފިޔާގެ އިނާމެއް ދޭނެ ކަމަށެވެ.

“ފުލުހުންނަށް އޭގެ ސަބަބުން އެއްވެސް ލީޑެއް ލިބޭނަމަ 50،000 ރުފިޔާގެ އިނާމެއްް ދޭނަން،” މޫސާ ރިލްވާން ބުންޏެވެ.

މީގެ އިތުރުން ރިލްވާން ހޯދުމުގައި މިހާތަނަށް ލިބުނު ކުރިއެރުމަކީ ކޮބާތޯ ސުވާލު ކުރުމުން ރިލްވާންގެ ބޭބޭ ބުނީ “އެއްވެސް ކުރިއެރުމެއް ނުލިބޭ” ކަމަށެވެ.

މީގެ އިތުރުން ރިލްވާންގެ ބެބޭ ބުނީ ރިލްވާންއާއި ގުޅޭ އެއްވެސް މައުލޫމާތެއް ލިބިފައިވާ ނަމަ އެ މައުލޫމާތެއް ލަސްނުކޮށް ހިއްސާ ކުރުމަށް އެދޭ ކަމަށެވެ. އެގޮތުން 7791126 ނުވަތަ 7773250 ނަމްބަރަށް ގުޅުމަށް އޭނާ އެދެއެވެ.

ރިލްވާން ގެއްލިފައި ވަނީ މި މަހުގެ އަށް ވަނަ ދުވަހުއެވެ. އަދި އޭނާ ގެއްލިގެން ރިޕޯޓު ކޮށްފައި ވަނީ މި މަހުގެ 13 ވަނަ ދުވަހުއެވެ. ފުލުހުން ބުނީ ިރިލްވާން ހޯދުމަށް ހުޅުމާލެ “އެއްކޮށް” ކަހަލަ ގޮތަކަށް ހޯދިފައިވާ ކަމަށާއި އެމްއެންޑީއެފާއި ގުޅިގެން ކަނޑުގެ މަގުންވެސް ރިލްވާން ހޯދުމުގެ މަސައްކަތް ކުރަމުންދާ ކަމަށެވެ